Va Ukrainie amal skončylisia rakiety dla F-16, jakimi źbivajuć reaktyŭnyja drony

Va Ukrainie amal vyčarpalisia zapasy rakiet amierykanskaj vytvorčaści AIM-120 i AIM-9 dla źniščalnikaŭ F-16, jakimi pierachoplivajuć rasijskija kryłatyja rakiety i novyja reaktyŭnyja drony, piša «Ukrainskaja praŭda» sa spasyłkaj na Economist.

Ukrainskaj supraćpavietranaj abaronie nie staje rakiet dla źbivańnia novych rasijskich BPŁA «Hierań-4» i «Hierań-5», jakija latajuć z chutkaściu da 600 km/h, a tempy ich vytvorčaści ŭ Rasii dasiahajuć kala 3000 adzinak na miesiac.

Turbareaktyŭnyja ruchaviki dla ich pieravažna pastupajuć z Kitaja, adnak častku ahrehataŭ vyrablajuć niepasredna ŭ RF na kantrabandnych zachodnich 3D-pryntarach. Razam z bolš bujnymi dronami «Banderol» hetyja bieśpiłotniki ŭsio bolš nahadvajuć niedarahija kryłatyja rakiety, dla źniščeńnia jakich źniščalnikam F-16 krytyčna nie staje rakiet AIM-120 i AIM-9.

Ukraina raspracoŭvaje ŭłasnyja drony-pierachopniki dla procidziejańnia rasijskim BPŁA, adnak situacyja z abaronaj ad balistyčnaj zbroi jašče bolš składanaja.

Ciapier ukrainskija zapasy rakiet PAC-3 dla sistem Patriot amal vyčarpanyja. Novyja maštabnyja pastaŭki sa ZŠA małavierahodnyja z-za źniasileńnia amierykanskich składoŭ u vyniku vajny ź Iranam.

Adnačasova Rasija naraściła vytvorčaść balistyčnych rakiet prykładna da 100 adzinak u miesiac: 60 rakiet «Iskander-M» i 40 rakiet RM-48U.

Peŭnyja čakańni źviazvajuć z budučaj pieradačaj Ukrainie niekalkich bolš starych franka-italjanskich batarej SPA SAMP/T razam z rakietami Aster da kanca 2026 hoda. U nastupnym hodzie Ukraina pavinna atrymać vosiem najnoŭšych kompleksaŭ viersii SAMP/T NG.

«U adroźnieńnie ad PAC-3, jakaja vykarystoŭvaje kinietyčny pierachop (pramoje traplańnie), rakieta Aster abstalavanaja bajavoj častkaj, jakaja vybuchaje pobač z varožaj rakietaj. Adnak krynicy ŭ francuzskim vojsku śćviardžajuć, što ŭ niekatorych aśpiektach jana pieraŭzychodzić Patriot. Jaje košt taksama składaje mienš za pałovu ad 7 miljonaŭ dalaraŭ — cany apošniaj ekspartnaj viersii PAC-3», piša Economist.

Pa licenzii ŭ Hiermanii płanujuć vyrablać da 200 mienš mahutnych rakiet PAC-2 na hod, častka ź jakich moža pastupić va Ukrainu sa zhody krain NATO.

Fundamientalna źmianić situacyju zaklikany sumiesny jeŭrapiejska-ŭkrainski prajekt Freyja, maštabnaść jakoha paraŭnoŭvajuć z prahramaj «palotu na Miesiac». Jaho meta — dać Ukrainie i jaje jeŭrapiejskim sajuźnikam značna bolš tannuju i masavuju alternatyvu rakietam PAC-3, jakaja budzie pracavać z radarami i sistemami pieradačy danych standartu NATO.

Zapłanavany pierachopnik bazujecca na ŭkrainskaj balistyčnaj rakiecie małoj dalokaści FP-7. Sensary, sistemy naviadzieńnia i kiravańnia buduć pastaŭlać 12 jeŭrapiejskich abaronnych kampanij, siarod jakich francuzskaja Thales, italjanskaja Leonardo, niamieckaja Diehl i šviedskaja Saab.

• 0
• 2
• 0
• 0
• 0
• 0
• 2
• 0