Ajcišnikaŭ, jakija absłuhoŭvali «Biełsat», abvinavacili ŭ vyvadzie 1,8 młn dalaraŭ praź fiktyŭnyja pasłuhi
Akruhovaja prakuratura Varšavy raskryła schiemu vyvadu šmatmiljonnych srodkaŭ ź dziaržaŭnaha polskaha telebačańnia praź fiktyŭnyja pasłuhi dla telekanała «Biełsat». Dvoje padazravanych na praciahu niekalkich hadoŭ padrablali rachunki-faktury i zavyšali košt IT-rabot, naniosšy vializnyja finansavyja straty miedyjachołdynhu.
Prakuratura vystaviła aficyjnyja abvinavačvańni dvum mužčynam — Kšyštafu M. i Šymanu P. Jak paviedamlaje vydańnie Interia Wydarzenia, kryminalnyja spravy inicyjavanyja na padstavie zajavy likvidatara Telewizja Polska (TVP), padadzienaj u lipieni 2024 hoda. Ciapier viedamstva viadzie dva asobnyja rasśledavańni, jakija tyčacca machinacyj ź finansami pry absłuhoŭvańni biełaruskamoŭnaha telekanała TV Biełsat.
Ahulnaja suma strat, naniesienych asobami, adkaznymi za majomasnyja pytańni TVP u pieryjad z žniŭnia 2018 pa studzień 2024 hoda, aceńvajecca ŭ bolš za 7 miljonaŭ złotych, što ŭ ekvivalencie składaje kala 1,8 miljona dalaraŭ.
Zhodna z materyjałami śledstva, Kšyštaf M. sistematyčna atrymlivaŭ uznaharodžańnie za IT-pasłuhi dla «Biełsata», jakich u realnaści nie vykonvaŭ. Abvinavačvany vystaviŭ 385 fiktyŭnych rachunkaŭ-faktur na sumu kala 4,5 miljona złotych (zvyš 1,1 miljona dalaraŭ), a paźniej vykarystaŭ hetyja padroblenyja dakumienty pry padačy padatkovych dekłaracyj. Druhoje rasśledavańnie, jakoje achoplivaje pieryjad z krasavika 2019 pa studzień 2024 hoda, vyjaviła vystavu falšyvych PDV-faktur na sumu zvyš 5,1 miljona złotych (prykładna 1,3 miljona dalaraŭ) za nieakazanyja pasłuhi.
Druhi fihurant spravy, Šyman P., abvinavačvajecca ŭ śviadomym uviadzieńni kiraŭnictva TVP u zman adnosna realnaha koštu svajoj pracy. Zavyšajučy košt infarmatyčnych pasłuh dla «Biełsata», jon aformiŭ 295 rachunkaŭ, praź jakija vyvieŭ kala 4,2 miljona złotych (bolš za 1 miljon dalaraŭ). Prakuratura kvalifikavała hetyja dziejańni jak daviadzieńnie da nievyhodnaha rasparadžeńnia majomaściu ŭ bujnym pamiery.
Abodva fihuranty spravy kateharyčna nie pryznali svajoj viny ŭ pradjaŭlenych abvinavačvańniach. Kab harantavać dalejšaje praviadzieńnie śledčych dziejańniaŭ, prakuratura prymianiła da padazravanych žorstkija miery strymańnia. Kšyštaf M. abaviazany ŭnieści majomasny załoh u pamiery 170 tysiač złotych (kala 44 tysiač dalaraŭ), a Šyman P. — 200 tysiač złotych (kala 51 tysiačy dalaraŭ). Dadatkova mužčynam zabaroniena pakidać terytoryju Polščy z kanfiskacyjaj pašpartoŭ, i jany musiać dvojčy na tydzień adznačacca ŭ palicejskim pastarunku ŭ miežach pracedury nahladu.
Redki vypadak: pamiłavany biełaruski palitviazień pajšoŭ na vajnu suprać Ukrainy16
Redki vypadak: pamiłavany biełaruski palitviazień pajšoŭ na vajnu suprać Ukrainy
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1212
Kamientary