Pa kolkaści samahubstvaŭ u Jeŭrasajuzie lidziruje Litva. A što z hetym u Biełarusi?
U 2023 hodzie Litva mieła samy vysoki ŭ Jeŭrapiejskim sajuzie pakazčyk śmiarotnaści ad samahubstvaŭ — 18,8 vypadku na 100 tysiač žycharoŭ. Usiaho ŭ krainach ES, pavodle źviestak Jeŭrastata, za hety hod u vyniku naŭmysnaha pryčynieńnia sabie škody pamierli 48,3 tysiačy čałaviek, paviedamlaje Thinktanks.pro.
Paśla Litvy najvyšejšyja pakazčyki byli ŭ Słavienii — 16,4 vypadku na 100 tysiač žycharoŭ, i Vienhryi — 16,1. Najnižejšaja śmiarotnaść ad samahubstvaŭ była na Kipry — 3,5 vypadkaŭ, u Hrecyi — 4,3 i na Malcie — 5,5.
U krainach ES uzrovień śmiarotnaści ad samahubstvaŭ u cełym pavialičvajecca z uzrostam. Siarod dziaciej da 15 hadoŭ jon składaŭ 0,2 vypadku na 100 tysiač čałaviek, a siarod ludziej va ŭzroście 65 hadoŭ i starej — 17,3 vypadku. U mužčyn pakazčyk byŭ vyšejšy va ŭsich uzrostavych hrupach, za vyklučeńniem dziaciej da 15 hadoŭ, dzie pakazčyki dla chłopčykaŭ i dziaŭčynak byli prykładna adnolkavymi.
U Biełarusi aficyjnaja statystyka śmiarotnaści ad samahubstvaŭ nie publikujecca ŭ adkrytym dostupie. Adnak adpaviednyja źviestki pryvodziacca ŭ artykule, apublikavanym u vydańni «Sociołohičieskij almanach».
Pavodle hetych danych, najbolš vysoki ŭzrovień samahubstvaŭ u Biełarusi byŭ zafiksavany ŭ 1990‑ia hady. Kali ŭ siaredzinie 1980‑ch hadoŭ jon składaŭ kala 23 vypadkaŭ na 100 tysiač nasielnictva, to ŭ 1996 hodzie dasiahnuŭ 47,8 vypadku na 100 tysiač.
U 2023 hodzie ŭ Biełarusi na 100 tysiač nasielnictva prypadała 15 samahubstvaŭ. Heta było mienš za pakazčyk Litvy, ale bolš za siaredni ŭzrovień u ES.
Pry hetym u Biełarusi isnuje značnaja roźnica pamiž horadam i vioskaj. Pavodle miedycynskaj statystyki za 2023 hod, u haradach pakazčyk składaŭ kala 11,3 vypadku na 100 tysiač žycharoŭ, a ŭ sielskaj miascovaści — 28,6 vypadku. Takim čynam, u vioskach uzrovień byŭ bolš čym u dva z pałovaj razy vyšejšy, čym u haradach.
Ciapier čytajuć
Mama Baženy Jaremič, jakaja rychtuje pryhažuń dla Łukašenki, kupiła elitny katedž koštam $837 tysiač25
Kamientary
GDP PPP adroźnivajecca ŭ razy, a ŭ Lituvie samahubstvy - na niekalki pracentaŭ.
A kali b "orhany" kvalifikavali ŭsie realnyja samahubstvy, a nie niaščasnyja vypadki adpaviedna realnym, to było b nieviadoma, u kaho jaki uzrovień "cisku VUP"