Niamieckija ŚMI nazvali imia biełarusa, jakoha padazrajuć u padrychtoŭcy terakta ŭ Lejpcyhu

Niamieckija śledčyja vyjšli na dvuch mierkavanych udzielnikaŭ sproby ataki bieśpiłotnikami z vybuchoŭkaj na aeraport Lejpcyha. Adzin ź ich — rasijanin, jakoha niamieckija ŭłady źviazvajuć z HRU, druhi — hramadzianin Biełarusi, jaki raniej traplaŭ u pole zroku jeŭrapiejskich pravaachoŭnych orhanaŭ. Pra heta paviedamiła Welt am Sonntag, jakaja aznajomiłasia z sakretnymi materyjałami rasśledavańnia, piša «Ahienctva».

Rasijanina vydańnie nazyvaje Aleham Le. (Oleg Le.), nie raskryvajučy jaho poŭnaha proźvišča. Pavodle viersii śledstva, jon adkazvaŭ za padrychtoŭku i łahistyku apieracyi i źviazany z rasijskaj vajennaj raźviedkaj.

Aleh Le. prylacieŭ u Hiermaniju praz aeraport Bierlin-Brandenburh z Turcyi, a paźniej vylecieŭ adtul u Sierbiju. Ciapier jon znachodzicca ŭ Rasii.

Niamieckim siłavikam jašče padčas jaho ŭjezdu było viadoma, što rasijanina adnosiać da atačeńnia HRU, adnak nazirańnie za im nie ŭstaloŭvali.

Druhi padazravany — hramadzianin Biełarusi Andrej Ka. (Andrei Ka.).

Vyjści na jaho śledčym dapamahli reštki palčatki sa śladami DNK, znojdzienyja na antennaj kanstrukcyi, jakaja, pavodle viersii ŭładaŭ, vykarystoŭvałasia dla kiravańnia dronam. Hetyja ž ślady raniej fiksavalisia ŭ Finlandyi i Litvie. Tam Ka. fihuruje ŭ materyjałach ab ahulnakryminalnych złačynstvach, u Finlandyi — u tym liku ŭ suviazi z kradziažom.

Polskija ŭłady taksama źviazvajuć Ka. z pažaram u budaŭničaj kramie ŭ Łodzi letam 2024 hoda. Polskaja prakuratura kvalifikavała hety pažar jak dyviersiju, a śledstva zajaŭlała pra rasijski śled. Źjaŭleńnie Ka. u spravie ab atacy ŭ Lejpcyhu niamieckija śledčyja ličać jašče adnoj prykmietaj mahčymaha kiravańnia apieracyjaj z boku rasijskich struktur.

Pavodle viersii śledstva, vybuchoŭku dastavili ŭ Hiermaniju praz Bałharyju i Sierbiju. Jaje mahli pieravozić u schavanych połaściach hruzavikoŭ, a zatym chavać u tajnikach u ziamli. Niekalki mierkavanych tajnikoŭ palicyja vyjaviła ŭ vakolicach aeraporta paśla analizu danych arandavanaha padazravanymi aŭtamabila.

Usiaho dla ataki, pavodle danych śledstva, padrychtavali kala 1,8 kh Semtex. Adzin z dronaŭ dalacieŭ da ŭkrainskaha transpartnaha samalota, zapraŭlenaha prykładna 25 tysiačami litraŭ hazy, ale nie ŭzarvaŭsia: u pryłady adarvaŭsia detanatar. Śledčyja ličać, što ŭ vypadku vybuchu mahła być razburana častka aeraporta.

Ataka adbyłasia ŭviečary 4 žniŭnia. Bieśpiłotnik z vybuchoŭkaj vyjavili pobač z ukrainskim transpartnym samalotam i abiasškodzili, jašče dva aparaty byli znojdzienyja ŭ rajonie aeraporta.

U pačatku vieraśnia kiraŭnik MZS Hiermanii Jochan Vadeful i ministr unutranych spraŭ Alaksandr Dobrynt publična ŭskłali adkaznaść za ataku na Rasiju. Pa danych Welt am Sonntag, padstavaj dla hetaha stali sabranyja śledstvam dokazy, u tym liku źviestki ab padazravanych. Maskva admaŭlaje dačynieńnie da apieracyi.

• 7
• 0
• 0
• 1
• 4
• 0
• 6
• 0