Rasija i Ukraina abmianialisia ŭdarami pa enierhaabjektach paśla słoŭ Trampa pra enierhietyčnaje pieramirje

Ukraina ranicaj u aŭtorak atakavała naftapierapracoŭčy zavod u Samarskaj vobłaści, a rasijski dron trapiŭ pa aŭtazapraŭcy ŭ Kijevie. Ataki adbylisia praź niekalki hadzin paśla zajavy prezidenta ZŠA Donalda Trampa pra toje, što Maskva i Kijeŭ nibyta damovilisia nie nanosić udary pa enierhietyčnych abjektach adzin adnaho, źviartaje ŭvahu «Ahienctva».

Ukrainskija bieśpiłotniki paškodzili adno z pramysłovych pradpryjemstvaŭ Samarskaj vobłaści, paviedamiŭ hubiernatar rehijona Viačasłaŭ Fiadoryščaŭ. Ukrainskija manitorynhavyja telehram-kanały apublikavali fota i videa, na jakich, jak śćviardžajecca, bačnyja pažary na atakavanym NPZ u Syzrani. 

Pavialičyć

Syzranski NPZ, pavodle danych «Rasnafty», štohod pierapracoŭvaje 6,1 młn ton nafty. Pry hetym pradpryjemstva vypuskaje 2,1 młn ton dyzielnaha paliva, što aznačaje, što biez uvahi zastałasia i niadzielnaja zajava Trampa, jaki zaklikaŭ Kijeŭ spynić udary pa vytvorčaści dyzielnaha paliva ŭ Rasii.

U Rasii, akramia Syzranskaha NPZ, byŭ atakavany skład Ozon u Tahanrozie.

Rasija ŭ noč na aŭtorak naniesła ŭdary pa Charkaŭskaj vobłaści i Kijevie. U stalicy Ukrainy, pavodle paviedamleńnia mera Vitala Klički, zafiksavana traplańnie bieśpiłotnika pa aŭtamabilnaj zapraŭcy.

U paniadziełak prezident ZŠA napisaŭ u Truth Social, što «Ukraina pahadziłasia nie nanosić udary pa rasijskich enierhietyčnych abjektach, Rasija pahadziłasia rabić toje ž samaje».

Paźniej Uładzimir Zialenski zajaviŭ, što Ukraina hatovaja spynić udary, kali partniory zmohuć zabiaśpiečyć admovu Rasii ad atak na ŭkrainskuju enierhietyku, krytyčnuju infrastrukturu i maršruty pieravozki charčavańnia. «Ukraina nie ŭpeŭnienaja, što Rasija maje žadańnie vykonvać jakija-niebudź damoŭlenaści», — paviedamiŭ Zialenski.

Na apošnich pieramovach u Maskvie pamiž amierykanskaj delehacyjaj i Uładzimiram Pucinym rašeńnie ab enierhietyčnym pieramirji nie prymałasia, paviedamiła «Ahienctvu» rasijskaja krynica, znajomaja z chodam pieramoŭ.

«Ekspromt Trampa», — skazaŭ surazmoŭca «Ahienctva».

Financial Times adznačyŭ, što zajava Trampa zaśpieła ŭkrainskich čynoŭnikaŭ źnianacku. Krynica FT, znajomaja z rasijskaj pazicyjaj, paćvierdziła, što Maskva i Kijeŭ adnavili abmierkavańnie mahčymaha enierhietyčnaha pieramirja. Adnak surazmoŭcy haziety, znajomyja z nastrojami ŭ Kramli, śćviardžajuć, što Pucin nie choča zaklučać takoje pahadnieńnie pierad zimoj.

Pavodle ich słoŭ, u Maskvie raźličvajuć, što ŭdary pa ŭkrainskaj enierhietycy ŭ chałodny siezon uzmocniać cisk na Kijeŭ i prymusiać jaho pajści na sastupki.

Padčas vizitu ŭ Irłandyju ŭ niadzielu prezident ZŠA zajaviŭ, što ŭkrainskija ŭdary pa rasijskich pradpryjemstvach pa vytvorčaści dyzielnaha paliva «nanosiać škodu ŭsiamu śvietu». Jon zajaviŭ, što paprasiŭ Zialenskaha spynić udary.

• 2
• 0
• 1
• 3
• 0
• 0
• 0
• 0