U Šviecyi levyja partyi atrymali bolšaść na vybarach, premjer pajšoŭ u adstaŭku

Krystersan abviaściŭ pra adstaŭku ranicaj 17 vieraśnia paśla taho, jak byli apublikavanyja papiarednija vyniki niadzielnaha hałasavańnia. Levy błok pieramoh ź vielmi nievialikim adryvam — kala 50 tysiač hałasoŭ.

Pavodle papiarednich padlikaŭ, levyja i levacentrysckija partyi atrymajuć 176 z 349 miescaŭ u parłamiencie, što na adzin mandat bolš za kolkaść, nieabchodnuju dla bolšaści. Pravacentrysckija partyi razam atrymlivajuć 173 miescy.

Padlik hałasoŭ jašče nie zavieršany. U sieradu pačali padličvać biuleteni daterminovaha hałasavańnia, jakija pastupili sa spaźnieńniem, a taksama biuleteni z zamiežnych učastkaŭ. Kančatkovyja vyniki čakajucca ŭ vychadnyja.

Pry hetym, pavodle šviedskich palitołahaŭ, źmiena ŭrada istotna nie paŭpłyvaje na palityku krainy ŭ dačynieńni da Rasii i Ukrainy. U šviedskim hramadstvie isnuje šyroki kansensus nakont taho, što Rasija niasie surjoznuju pahrozu dla Šviecyi, a Ukrainie nieabchodna dapamahać. Hetuju pazicyju padzialajuć navat ultrapravyja «Šviedskija demakraty».

U šviedskaj palitycy skłałasia sistema dvuch asnoŭnych błokaŭ — levaha i pravaha, u kožnym ź jakich pa čatyry partyi. Tamu kaalicyjnyja ŭrady i ŭrady mienšaści źjaŭlajucca zvyčajnaj źjavaj.

Paśla adstaŭki premjer-ministra śpikier Ryksdaha pavinien pravieści pieramovy z usimi parłamienckimi partyjami i vyłučyć kandydata na pasadu kiraŭnika ŭrada. Paśla hetaha parłamient prahałasuje pa jaho kandydatury.

Mahdalena Andersan užo pačała pieramovy ab stvareńni kaalicyi z tryma inšymi partyjami, laviejšymi ad centra — Levaj partyjaj, Centrysckaj partyjaj i Partyjaj zialonych. Adnak pieramovy mohuć być składanymi i zaciahnucca, pakolki hetyja partyi majuć roznyja pazicyi ŭ niekatorych važnych pytańniach, u tym liku ab padatkach.

Paśla vybaraŭ 2022 hoda na farmavańnie ŭrada spatrebiłasia 37 dzion, a paśla vybaraŭ 2018 hoda hety praces zaniaŭ kala čatyroch z pałovaj miesiacaŭ.

U svaim paviedamleńni ab adstaŭcy Ulf Krystersan adznačyŭ, što ciapier asnoŭnaja rola ŭ farmavańni novaha ŭrada naležyć śpikieru, i paprasiŭ vyzvalić jaho ad pasady, kab hety praces moh pačacca nieadkładna.

Andersan paśla vybaraŭ zajaviła, što šviedski narod prahałasavaŭ za novy kurs krainy. Sacyjał-demakraty na praciahu bolšaj častki XX stahodździa byli hałoŭnaj palityčnaj siłaj Šviecyi i zastajucca adnoj ź viadučych partyj. Kali Andersan znoŭ uznačalić urad, jana vierniecca da ŭłady paśla čatyrochhadovaha pierapynku.

U pravacentryscki błok, akramia Partyi ŭmieranych Krystersana, uvachodziać ultrapravaja antyimihracyjnaja partyja «Šviedskija demakraty», Chryścijanska-demakratyčnaja i Libieralnaja partyi.

«Šviedskija demakraty» byli zasnavanyja ŭ 1980‑ch hadach ludźmi z pranacysckimi pohladami, tamu asnoŭnyja šviedskija partyi doŭhi čas admaŭlalisia ad supracoŭnictva ź imi. U siaredzinie 2000‑ch partyja źmianiła svoj imidž, stała bolš pamiarkoŭnaj i nabrała papularnaść.

Na vybarach 2022 hoda «Šviedskija demakraty» zaniali druhoje miesca, vystupajučy ŭ tym liku z antyimihracyjnaj i antyzłačynnaj paviestkaj. Jany nie ŭvajšli va ŭrad Krystersana, sfarmavany tryma inšymi pravacentrysckimi partyjami, ale padtrymlivali jaho hałasami ŭ parłamiencie. Pierad ciapierašnimi vybarami Krystersan abiacaŭ u vypadku pieramohi dać pradstaŭnikam «Šviedskich demakrataŭ» ministerskija pasady.

Adnak na hetych vybarach «Šviedskija demakraty» vystupili słabiej, čym čatyry hady tamu, atrymaŭšy prykładna na try pracentnyja punkty mienš hałasoŭ.

• 1
• 2
• 0
• 3
• 0
• 0
• 0
• 0