Jachty Kim Čen Yna patrapili na spadarožnikavyja zdymki. Jak vyhladaje raskoša kirujučaha kłana Paŭnočnaj Karei
80‑mietrovaje sudna z 50‑mietrovym basiejnam ciažka nie zaŭvažyć navat z kosmasu.
Kala rezidencyi paŭnočnakarejskaha lidara spadarožniki zafiksavali čatyry vialikija jachty. Na samaj bujnoj jość basiejn i vodnyja horki.
BBC praanalizavała spadarožnikavyja zdymki, zroblenyja ź lipienia da siaredziny kastryčnika, i prasačyła za pieramiaščeńniami hetaj jachty kala paŭnočnakarejskaha porta Vonsan.
Paśla niekalkich miesiacaŭ techničnaha absłuhoŭvańnia jachta vyjšła z doka i pieramiaściłasia da paŭvostrava Kalma. Pobač znachodzicca kompleks vił, jakimi karystajucca Kim Čen Yn i jaho siamja.
Tam ža nieadnarazova zaŭvažali jašče try sudny daŭžynioj kala 50, 55 i 60 mietraŭ. Aficyjna Pchieńjan nie raskryvaje ich uładalnikaŭ. Ale byłyja čynoŭniki i ekśpierty, apytanyja BBC, ličać amal niemahčymym, kab takimi jachtami svabodna karystaŭsia niechta biez suviaziaŭ z kiraŭnictvam krainy.
Sami zdymki nie dakazvajuć, što na borcie byŭ Kim. Adnak pieramiaščeńni sudnaŭ supadali ź pieryjadami, kali jon źnikaŭ z publičnaj prastory. Dziaržaŭnyja miedyja amal nie raskazvajuć pra adpačynak kiraŭnika krainy — takija pajezdki zvyčajna padajuć jak pracoŭnyja vizity.
Košt zaŭvažanych jacht nieviadomy. Anałahičnyja sudny mohuć kaštavać dziasiatki miljonaŭ dalaraŭ, a niekatoryja — bolš za 100 miljonaŭ.
Jak adpačyvajuć u KNDR
Pobač z zakrytym śvietam rezidencyj pracuje kurort «Vonsan-Kalma», adkryty ŭ lipieni 2025 hoda. Jaho hateli, restarany, akvaparki i spartyŭnyja abjekty raźličanyja na 20 tysiač naviednikaŭ. Adpačyvać tam mohuć i hramadzianie KNDR. Pavodle paŭdniovakarejskich miedyja, niekatorym prapanoŭvali čatyry nočy prykładna za 100 dalaraŭ — vialikuju sumu dla bolšaści nasielnictva.
Pry hetym u Paŭnočnaj Karei jość i svoj siaredni kłas. Za apošnija dziesiacihodździ handal i pryvatnaja inicyjatyva stvaryli płast ludziej, čyj dabrabyt zaležyć ad pradprymalnictva. Jaho zamožnuju častku nazyvajuć donču — «haspadary hrošaj». Jany zajmajucca pastaŭkami tavaraŭ, pieravozkami, kredytavańniem, zabiaśpiečvajuć syravinaj dziaržaŭnyja pradpryjemstvy i dzielać ź imi prybytak. Hety płast vyras z rynkaŭ, jakija dapamahali ludziam vyžyvać paśla hoładu 1990-ch.
Dla takich siemjaŭ prykmietami dastatku stali lepšyja kvatery, mabilnyja telefony i pralnyja mašyny. Ale bahaćcie nie harantuje palityčnaj abarony: pradprymalniki zaležać ad čynoŭnikaŭ, płaciać chabar i ryzykujuć stracić majomaść padčas kampanij suprać pryvatnaha biznesu. Paśla pačatku pandemii ŭłady rezka ŭzmacnili kantrol nad rynkami.
I navat tym, chto maje hrošy, ciažka vyrvacca na adpačynak. Pavodle surazmoŭcaŭ BBC, rabotniki farmalna majuć prava na 14 dzion štohadovaha adpačynku, ale na praktycy praciahły pierapynak — redkaść. Dla pajezdki za miežy svajho horada ci rehijona patrebny aficyjny dazvoł. Tamu mahčymaść prosta sabrać rečy i pajechać da mora zastajecca pryvilejaj.
Pavodle acenki AAN, jakuju pryvodzić BBC, i siońnia kala 40% nasielnictva KNDR niedajadajuć.
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary