Chočacie schudnieć? Mahčyma, vam treba jeści bolš, a nie mienš

Na pieršy pohlad, parada jeści bolš, kab schudnieć, supiarečyć łohicy: kali čałaviek atrymlivaje bolš kałoryj, čym raschoduje, jon nabiraje vahu. Adnak prafiesar Univiersiteta Paŭdniovaj Kalifornii Valter Łonha, jaki daśleduje prablemy daŭhalećcia, raić tym, chto choča schudnieć, nie mienš jeści, a bolš. Hałoŭnaje — pravilna vybirać pradukty.

Jak tłumačyć śpiecyjalist, ježa, bahataja na klatčatku i białok, lepš nasyčaje i dapamahaje daŭžej nie adčuvać hoładu. Da taho ž harodnina i sadavina zvyčajna majuć nievysokuju kałaryjnaść. Tamu možna źjeści vialikuju porcyju takoj ježy i atrymać mienš kałoryj, čym ad niekalkich sałodkich pierakusaŭ.

Peŭnyja pradukty taksama spryjajuć vypracoŭcy ŭ arhaniźmie harmona GLP-1, jaki ŭdzielničaje ŭ rehulavańni apietytu. Mienavita na dziejańni hetaha harmonu zasnavany efiekt niekatorych sučasnych preparataŭ dla źnižeńnia vahi, u tym liku «Aziempiku».

Čamu lepš dadavać, a nie zabaraniać

Taki padychod pracuje jašče i dziakujučy «efiektu vyciaśnieńnia». Kali čałaviek pačynaje jeści bolš sadaviny, harodniny, babovych i sucelnaziernievych praduktaŭ, jany pastupova zajmajuć miesca mienš karysnaj ježy.

Naprykład, daśledavańni pakazvajuć, što dzieci, jakim rajać jeści bolš sadaviny, časam krychu chudniejuć. Reč u tym, što sadavina nie prosta dadajecca da raniejšaha mieniu, a častkova zamianiaje inšyja pradukty.

Heta adna z pryčyn, čamu taki padychod moža być bolš pradukcyjnym za žorstkija dyjety. Pastajannyja zabarony i abmiežavańni časta pakidajuć čałavieka hałodnym i niezadavolenym, tamu doŭha prytrymlivacca ich składana.

Da praduktaŭ, jakija varta čaściej uklučać u racyjon, śpiecyjalisty adnosiać harodninu, sadavinu, fasolu, sačavicu, sucelnyja złaki i niatłustyja krynicy białku.

Važna nie tolki charčavańnie, ale i ruch

Ale navat pravilna składzieny racyjon — tolki častka spravy. Nie mienš važna, nakolki aktyŭny čałaviek u paŭsiadzionnym žyćci.

Daśledavańnie, apublikavanaje ŭ 2019 hodzie, pakazała, što apietyt lepš rehulujecca, kali čałaviek i bolš jeść, i bolš ruchajecca. Fizičnaja aktyŭnaść dapamahaje kantralavać vahu nie tolki dziakujučy spalvańniu kałoryj, ale i praz upłyŭ na adčuvańnie hoładu i sytaści.

Pry hetym arhanizm čałavieka prystasavany da ekanomii enierhii. Kali doŭha i istotna abmiažoŭvać charčavańnie, jon moža źnižać jaje raschod, što ŭskładniaje pachudzieńnie. Tamu spałučeńnie siadziačaha ładu žyćcia i žorstkaj dyjety nie zaŭsiody daje ŭstojlivy vynik.

• 4
• 0
• 4
• 1
• 0
• 0
• 0
• 0