Čamu salony ahurok śviecicca ad elektryčnaści? Navukoŭcy znajšli tłumačeńnie
Kali prapuścić elektryčny tok praz salony ahurok, toj moža pačać śviacicca jarkim aranžavym śviatłom. Hety efiekt daŭno viadomy, ale jaho dakładny miechanizm zastavaŭsia pradmietam sprečak. Amierykanski daśledčyk pravioŭ bolš za sotniu ekśpierymientaŭ i vyśvietliŭ, što adbyvajecca ŭnutry ahurka.
Na pieršy pohlad heta dziŭny fokus. U salony ahurok ustaŭlajuć dva mietaličnyja elektrody, prapuskajuć praź ich tok — i adzin kaniec ahurka pačynaje śviacicca aranžavym koleram. Pry hetym čujecca šypieńnie i źjaŭlajecca charakterny pach.
Jak piša ScienceAlert, ekśpierymient viadomy ŭžo niekalki dziesiacihodździaŭ. Adnak navukoŭcy doŭha nie mahli dakładna rastłumačyć, što mienavita vyklikaje śviačeńnie.
Pieršaja viersija hruntavałasia na tym, što rasoł dobra pravodzić elektryčny tok, ale pry mocnym nahravańni pačynaje kipieć. Vakoł elektroda ŭtvarajucca połaści, zapoŭnienyja paraj, jakija časova pieraryvajuć elektryčny kantakt. Kali para astyvaje i rasoł znoŭ nabližajecca da mietału, pamiž imi moža praskočyć iskra.
Pavodle druhoj viersii, śviačeńnie źviazana z elektrolizam. Pad uździejańniem elektryčnaha toku vada ŭ rasole raskładajecca z utvareńniem kisłarodu i vadarodu. Pry hetym hazapadobny vadarod vydzialajecca tolki kala admoŭnaha elektroda, što moža tłumačyć, čamu ahurok śviecicca tolki z adnaho boku. Mierkavałasia, što haz zaharajecca ad mocna nahretych elektrodaŭ, vyklikajučy nievialikija vybuchi ŭnutry ahurka.
Vyśvietlić, jakoje z dvuch tłumačeńniaŭ pravilnaje, vyrašyŭ inžynier-elektryk Džoš Miendes (Josh Méndez) z Portlendskaha dziaržaŭnaha ŭniviersiteta ŭ ZŠA.
Jaho daśledavańnie pakazała, što sapraŭdnaja pryčyna spałučaje abodva miechanizmy. Vadarod sapraŭdy ŭtvarajecca, ale zapalvajecca jon nie ad vysokaj tempieratury, a ad elektryčnaj iskry.
«Tut sapraŭdy ŭdzielničaje vadarod, ale zapalvaje jaho nie nahravańnie, a iskra. Mienavita tamu nielha zapalvać cyharetu na zapraŭcy: iskra moža padpalić haz», — tłumačyć sam daśledčyk.
Čamu ahurok śviecicca mienavita aranžavym?
Koler śviačeńnia maje inšaje tłumačeńnie. Jon źviazany z natryjem, jaki źmiaščajecca ŭ soli. Pad uździejańniem elektryčnaha razradu iony i atamy natryju ŭzbudžajucca, a kali viartajucca ŭ zvyčajny stan, vypramieńvajuć śviatło charakternaha žoŭta-aranžavaha koleru. Padobny pryncyp vykarystoŭvajecca ŭ piratechnicy: roznyja chimičnyja elemienty nadajuć fiejervierkam roznyja kolery.
Pavodle daśledčyka, kali zasalić ahurok z vykarystańniem inšaj soli, koler śviačeńnia taksama moža źmianicca.
UVAHA! Paŭtarać hety dośled u chatnich umovach niebiaśpiečna: padklučeńnie elektrodaŭ da bytavoj sietki biez adpaviednaha abstalavańnia moža pryvieści da paražeńnia elektryčnym tokam, apiokaŭ abo ŭzharańnia.
23‑hadovaha aficera bryhady śpiecnaza asudzili na 19 hadoŭ za «zdradu dziaržavie»17
23‑hadovaha aficera bryhady śpiecnaza asudzili na 19 hadoŭ za «zdradu dziaržavie»
Dziaržbiaśpieka Litvy: «Naš dom» Karač štučna stvaraje ŭmovy, kab biełarusy, što nie adpaviadajuć kryteryjam mižnarodnaj abarony, atrymlivali VNŽ u Litvie4242
Dziaržbiaśpieka Litvy: «Naš dom» Karač štučna stvaraje ŭmovy, kab biełarusy, što nie adpaviadajuć kryteryjam mižnarodnaj abarony, atrymlivali VNŽ u Litvie42
«Ludzi kamientavali, što salmanieła ŭvajšła ŭ čat». Biełarus pajechaŭ pracavać u Kremnijevuju dalinu — i staŭ kulinarnym błohieram na 28 miljardaŭ prahladaŭ88
Kamientary