Rasijanie ŭdaryli pa parku ŭ Charkaŭskaj vobłaści. Piaciora zahinułych, u tym liku niemaŭla ŭ vazku
Rasijski bieśpiłotnik udaryŭ pa centralnym parku haradskoha pasiołka Novaja Vadałaha ŭ Charkaŭskaj vobłaści Ukrainy. Ataka adbyłasia siarod biełaha dnia, kali ŭ parku było šmat ludziej, u tym liku siemjaŭ ź dziećmi, paviedamlaje Ukrainskaja słužba Bi-bi-si.
Pieršapačatkova ratavalniki paviedamili pra hibiel dźviuch žančyn i niemaŭlaci, jakoje znachodziłasia ŭ dziciačym vazočku. Jašče 14 čałaviek atrymali ranieńni, siarod ich było siamiora dziaciej.
Paźniej kiraŭnik Charkaŭskaj abłasnoj vajskovaj administracyi Aleh Siniehubaŭ paviedamiŭ, što kolkaść zahinułych pavialičyłasia da šaści čałaviek, u tym liku troch dziaciej, a paciarpiełych — da 15-ci. Adnak paźniej Nacyjanalnaja palicyja paviedamiła pra piać zahinułych: troch žančyn i dźviuch dziaŭčynak.
Prezident Ukrainy Uładzimir Zialenski paviedamiŭ, što zahinuła dziaŭčynka Anhielina, jakoj było krychu bolš za hod. Jana naradziłasia ŭ žniŭni 2025 hoda. Jaje maci Ina taksama pamierła ŭ balnicy. Druhoj zahinułaj dziaŭčyncy było 11 hadoŭ.
U vyniku ŭdaru paciarpieŭ budynak kaviarni ŭ parku. Na miesca zdareńnia prybyli ekstrannyja słužby, paranienych bryhady reanimacyi dastaŭlali ŭ balnicy Charkava. U Dziaržaŭnaj słužbie Ukrainy pa nadzvyčajnych situacyjach nazvali ataku čarhovym rasijskim udaram pa mirnych žycharach i padkreślili, što napad na dziaciej nie mieŭ nijakaha vajennaha sensu.
Pa słovach Aleha Siniahubava, za sutki rasijskija vojski atakavali 17 nasielenych punktaŭ Charkaŭskaj vobłaści i sam Charkaŭ. Bolš za dziesiać čałaviek atrymali ranieńni, u tym liku dvoje dziaciej. Pad udaram apynulisia jak krytyčnaja, tak i cyvilnaja infrastruktura. Za papiaredni tydzień siły supraćpavietranaj abarony źbili nad Charkavam i vobłaściu bolš za 700 pavietranych celaŭ.
Rasija praciahvała atakavać i inšyja ŭkrainskija harady. U noč na 19 kastryčnika ŭ vyniku balistyčnaha ŭdaru pa Kijevie zahinuła 21‑hadovaja dziaŭčyna, byli paranienyja ludzi. Jašče adzin čałaviek zahinuŭ u Irpieni Kijeŭskaj vobłaści, dzie taksama zafiksavali značnyja razbureńni. Dva čałavieki zahinuli ŭ vyniku ŭdaru pa Kryvym Rozie.
Ranicaj 19 kastryčnika Rasija taksama atakavała Lvoŭ i Ivana-Frankoŭsk reaktyŭnymi bieśpiłotnikami typu «Šachied».
Kamientary