Jak za dziesiacihodździe Šviecyja amal zakryła dźviery dla mihrantaŭ
Jašče dziesiać hadoŭ tamu Šviecyja trymałasia adnoj z samych libieralnych mihracyjnych palityk u Jeŭropie. Ciapier ža jaje praviły — adny z najstražejšych na kantyniencie. Jak adbyłasia takaja rezkaja źmiena i čamu raniejšy kurs naŭrad ci vierniecca, tłumačyć vydańnie The Conversation.
Adnoj z najbolš prykmietnych źmien u šviedskaj palitycy za apošniaje dziesiacihodździe staŭ novy padychod da mihracyi. Jak z adnoj z samych adkrytych dla mihrantaŭ krain Šviecyja stała adnoj z samych zakrytych, na staronkach The Conversation analizuje Chienryk Emilsan, staršy vykładčyk Univiersiteta Malmio.
Jak adznačaje daśledčyk, pavarotnym momantam staŭ mihracyjny kryzis 2015 hoda. Tady za hod u Šviecyi paprasili prytułku bolš za 160 tysiač čałaviek, što składała zvyš 12% usich zajavak u Jeŭrasajuzie. Siarod ich było kala 35 tysiač niepaŭnaletnich biez supravadžeńnia darosłych, što składała bolš za tracinu ahulnajeŭrapiejskaha pakazčyka.
Nieŭzabavie šviedskija partyi dasiahnuli šyrokaj damoŭlenaści ab uzmacnieńni praviłaŭ atrymańnia prytułku i ŭźjadnańnia siemjaŭ. Źjaviŭsia časovy pamiežny kantrol, a pastajannyja dazvoły na žycharstva dla bolšaści biežancaŭ zamianili časovymi. Charakterna, što hetyja zachady ŭvodziŭ levy ŭrad sacyjał-demakrataŭ. Tamu jany akazalisia nie prosta časovaj reakcyjaj na kryzis, a pačatkam novaha palityčnaha kansensusu: mihracyju treba istotna abmiežavać.
Novy ŭrad pajšoŭ jašče dalej
Nastupny vialiki pavarot adbyŭsia paśla vybaraŭ 2022 hoda, kali da ŭłady pryjšła pravacentrysckaja kaalicyja na čale z premjer-ministram Ulfam Krystersanam. Novy ŭrad pastaviŭ zadaču zrabić praviły atrymańnia prytułku nastolki žorstkimi, nakolki dazvalajuć minimalnyja patrabavańni zakanadaŭstva ES i mižnarodnaje prava.
Źmieny zakranuli praktyčna ŭsie śfiery mihracyjnaj palityki: pryjom biežancaŭ, uźjadnańnie siemjaŭ, pracoŭnuju mihracyju, hramadzianstva, departacyju i dostup da sacyjalnych vypłat. Vyklučeńnie zrabili dla vysokakvalifikavanych śpiecyjalistaŭ.
Pieršyja novyja praviły pačali dziejničać u kancy 2023 hoda. Ułady ŭskładnili ŭźjadnańnie siemjaŭ i atrymańnie dazvołu na žycharstva z humanitarnych pryčyn, a hadavuju kvotu na pierasialeńnie biežancaŭ skaracili z 5000 da 900 čałaviek.
Asnoŭnaja ž častka reformaŭ była pryniataja ŭ 2025‑2026 hadach. Dostup da niekatorych sacyjalnych vypłat, u tym liku dapamohi na dziaciej i vypłat padčas baćkoŭskaha adpačynku, ciapier budzie zaležać ad vykanańnia patrabavańniaŭ da pražyvańnia i pracy ŭ krainie.
Składaniej budzie atrymać i šviedskaje hramadzianstva. Uličvacca buduć praciahłaść pražyvańnia, pavodziny čałavieka, viedańnie movy i asnoŭ žyćcia ŭ Šviecyi, a taksama zdolnaść samastojna siabie zabiaśpiečvać.
Akramia taho, ułady istotna spraścili mahčymaść departacyi zamiežnikaŭ, asudžanych za złačynstvy.
Z 160 tysiač zajavak da niekalkich tysiač
Na fonie novaj palityki kolkaść achvotnych atrymać prytułak rezka skaraciłasia. U 2025 hodzie ŭ Šviecyi było zarehistravana kala 6700 pieršasnych zajavak na prytułak. Stanoŭčaje rašeńnie atrymali tolki 23% zajaŭnikaŭ. U raźliku na kolkaść nasielnictva heta mienš za pałovu siaredniaha pakazčyka pa Jeŭrasajuzie. Pry hetym šviedskaje mihracyjnaje viedamstva čakaje dalejšaha źnižeńnia: prykładna da 4200 zajavak u 2026 hodzie i 3700 u 2027-m.
Takim čynam, kraina, jakaja ŭ 2015 hodzie była siarod jeŭrapiejskich lidaraŭ pa kolkaści prośbaŭ ab prytułku na dušu nasielnictva, praź dziesiać hadoŭ apynułasia ŭ nižniaj častcy hetaha śpisu.
Adnak jašče bolš istotnaj za sami ličby aŭtar materyjału ličyć źmienu palityčnaha klimatu. Siońnia siarod asnoŭnych šviedskich partyj isnuje kansensus nakont taho, što žorstkuju mihracyjnuju palityku treba zachoŭvać.
Sacyjał-demakraty, jakija kiravali krainaj padčas kryzisu 2015 hoda, adkryta abo maŭkliva padtrymali bolšaść reformaŭ ciapierašniaha ŭrada. Partyja dała zrazumieć, što navat paśla viartańnia da ŭłady nie źbirajecca admaŭlacca ad ciapierašniaha kursu.
Źmianiłasia i hramadskaja dumka. Paśla kryzisu 2015 hoda vyrasła dola šviedaŭ, jakija vystupajuć za skaračeńnie imihracyi, asabliva pryjomu biežancaŭ.
I navat kali paśla parłamienckich vybaraŭ 13 vieraśnia źmienicca ŭrad, viartańnia da raniejšaha, značna bolš libieralnaha kursu nie budzie.
U Šviecyi na vypadak vajny rychtujuć miesca dla pachavańnia paŭmiljona čałaviek
Pryharad Stakholma, dzie arudujuć bandyty-padletki ź liku mihrantaŭ, staŭ adnym z samych niebiaśpiečnych miescaŭ Jeŭropy
Šviecyja, dzie amal admovilisia ad najaŭnych hrošaj, viartaje ich u paŭsiadzionnaje žyćcio
Šviecyja: Biełarusam-emihrantam bolš nie treba jechać u Biełaruś pa novy pašpart
Ciapier čytajuć
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma14
Kamientary
1% ad 1% ad 6 miljardaŭ.
Heta možna zrabić 3-4-5 stupienčaty adbor i brać tych, chto padychodzić pa kvalificykacyi, śvietapohladu i mientalitetu. I anijakich sacyjalnych prablemaŭ, i ekanamična zapiaśpiečany pracoŭnaj siłaj hod-pahod, stabilna i na dziesiacihodździ napierad.
Što dakazvaje, što masavaja mihracyja, jakuju zapuścili z 00-ch, a dzie levyja va ŭładzie, toje praciahvajuć i zaraz - jak u Ispanii, nie zvažajučy na sacyjalnyja i kryminalnyja nastupstvy, - vyklučna palityčny prajekt stvareńnia novaha łajalnaha elektaratu, jaki b źmieńšyŭ palityčny i ekanamičny bałans u dačynieńni staraha, h.zn. zvyčajnych jeŭrapiejcaŭ.
Kab prosty jeŭrapiejec mieŭ mieńš pravoŭ i mahčymaściaŭ dla niehacyjacyi sacyjalnaj damovy ź biurakratyčna-akademičnym kłasam. A kali jon pasprabuje - biaskonca stydzić jaho, paviesić taŭro "fašysta" i "nacdema", i kateharyčna nie davać anijakaj publičnaj płatformy, a pažadana jašče ŭ turmu sadžać za mierkavańni jak za złačynstvy. Nu, jak novy stary SSSR.
I kali ab hetym razmaŭlaješ ź jakim prafiesaram - u adkaz čuješ, što ŭsie hetak robiać. Heta narmalna! I kali heta nie zrobim my (niemcy, francuzy), to inšym bolej dastniecca (ułady i resursaŭ, bieniefitaŭ i mierapryjemstvaŭ). Ludzi hatovyja źniščyć ułasnuju cyvilizacyju za pryhožuju karcinku i pačućcio ŭłasnaj maralnaj pieravahi pierad susiedam-praletaryjam.
Voś dzie parazityčny kłas. Pa Veblenu ci pa Leninu.
Dobry prykład.