U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma

Jak stała viadoma «Našaj Nivie», pry ćmianych abstavinach u Biełaruś viarnuŭsia padpałkoŭnik u adstaŭcy Dźmitryj Zara.

Dźmitryj Zara naradziŭsia ŭ 1981 hodzie ŭ Kobrynie. Jon prafiesijny vajskoviec, słužbu pačaŭ u čaści ŭnutranych vojskaŭ 5448, potym pieravioŭsia ŭ Marjinu Horku. Padrabiazna jaho karjera nam nieviadomaja. Pry kancy karjery Zara zajmaŭ administratyŭnuju pasadu ŭ 50‑j źmiašanaj avijabazie ŭ Mačuliščach, dzie dasłužvaŭ da vajskovaj piensii.

Pavialičyć

Ź Biełarusi Zara vyjechaŭ nie raniej za krasavik 2022-ha, u mai taho ž hoda zavioŭ instahram, u jakim staŭ publikavać fota ź Jeŭrasajuza.

Siamja Dźmitryja zastałasia ŭ Biełarusi. A heta žonka, ź jakoj jon byŭ razam z vučelni, a taksama troje dziaciej — starejšamu ciapier 17 hadoŭ.

U Jeŭropie Dźmitryj Zara zajmaŭsia pramysłovym alpinizmam, a taksama byŭ instuktaram pa skačkach z parašutam — jak desantnik jon mieŭ vialikuju kolkaść skačkoŭ u Biełarusi. Płanavaŭ zdać usie nieabchodnyja zaliki i narmatyvy, kab mieć dopusk da samych składanych kamiercyjnych skačkoŭ. 

Jak ličycca, paralelna z hetym u 2022‑m Zara dałučyŭsia da kamandy Valeryja Sachaščyka — byłoha kamandzira desantnaj čaści ŭ Breście, jaki na karotki čas zaniaŭsia palitykaj u aljansie z Vadzimam Prakopjevym.

Pa słovach znajomych Zary, mienavita ŭ pracy na Sachaščyka jaho abvinavačvajuć łukašenkaŭskija siłaviki. Ličycca, što padpałkoŭnik zajmaŭsia zboram infarmacyi i analityčnaj rabotaj u kamandzie.

Pavialičyć

U vieraśni 2022‑ha Łukašenka svaim ukazam pazbaviŭ Dźmitryja Zaru zvańnia. 

Kali ž svajho rodu štab Sachaščyka spyniŭ dziejnaść, a sam jon adyšoŭ ad palityki, Zara praciahvaŭ zajmacca ŭsio tym ža — vyšynnymi rabotami i padrychtoŭkaj achvotnych da skačkoŭ z parašutam.

Ale ŭ pačatku 2026 hoda Zara, jaki žyŭ Polščy adzin, raptoŭna źnik. Jak stała viadoma «Našaj Nivie», nieŭzabavie jon apynuŭsia ŭ SIZA KDB, dzie sutyknuŭsia z katavańniami.

Hałoŭnaje pytańnie — a jak Zara ŭvohule trapiŭ u Biełaruś? Adkazu na jaho niama, ale centralnaj viersijaj treba razhladać toje, što mužčyna viarnuŭsia ŭ Biełaruś sam.

Apošni hod pierad viartańniem u Biełaruś Dźmitryj Zara sprabavaŭ lehalizavacca ŭ Polščy i atrymać palityčny prytułak. Mahčyma, biespaśpiachova.

Adnačasova z hetym jon staŭ vieści svoj instahram vielmi śpiecyfična, kali nie skazać, što pa-varjacku. Pra hetym, hradus varjactva narastaŭ štomiesiac.

Zara publikavaŭ mnostva biessuviaznych paviedamleńniaŭ štodzień, karystaŭsia šyframi i niaisnymi słovami, cytavaŭ Bibliju, kiravaŭsia «enierhijami vyšejšaha paradku» i hetak dalej. Pryznačyŭ siabie hienierałam i vydavaŭ dekrety na «ŭžyvańnie boskich siłaŭ», jakija davodziŭ da členaŭ svajoj siamji, jakija zastalisia ŭ Biełarusi. 

Pavialičyć

Ź dziećmi Dźmitryj byŭ na pastajannaj videasuviazi. Žonka tehała jaho na svaich fota, budučy ŭ Biełarusi. Imavierna, jon taksama bačyŭsia ź siamjoj letam 2025‑ha ŭ treciaj krainie. 

Zara abjadnoŭvaŭ siabie i svaju siamju ŭ niejkaje padabienstva relihijnaj siekty z nazvaj G-13 (Gate-13, Brama/Varoty-13). A taksama šukaŭ asabistaha pamočnika, jaki budzie dapamahać jamu raspaŭsiudžvać infarmacyju pra Gate-13, kab abjadnoŭvać inšych ludziej, jakija chočuć nakiroŭvać «da Boha, da Ałacha» enierhiju ŭvierch pavodle ałharytmaŭ. 

3 lutaha 2026 hoda Dźmitryj Zara apublikavaŭ u sacsietkach błytany dopis pra samaachviarnaść Isusa Chrysta. Heta stała jaho apošnim paviedamleńniem u instahramie. Chutčej za ŭsio, adrazu ŭśled za hetym Zara viarnuŭsia ŭ Biełaruś.

Pavialičyć

«Naša Niva» źviazałasia z Valeryjem Sachaščykam, jon nie staŭ kamientavać situacyju.

* * *

Były kamandzir bieraściejskich desantnikaŭ Valeryj Sachaščyk staŭ «ministram abarony» ŭ Abjadnanym pierachodnym kabiniecie ŭ 2022 hodzie, sprabavaŭ stvaryć biełaruskaje padraździaleńnie va Ukrainie.

* * *

Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.

Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ. 

«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy. 

• 1
• 0
• 2
• 13
• 3
• 6
• 3
• 0