Los Mierca vyrašajuć vybary na ŭschodzie Hiermanii

U Bierlinie i Mieklenburhu-Piaredniaj Pamieranii (poŭnač byłoj HDR) vybarčyja ŭčastki adkrylisia a 8:00 i začyniacca a 18:00. Ad ich vynikaŭ zaležyć, siarod inšaha, ci sydzie Frydrych Mierc u adstaŭku, piša DW.

Hałoŭnaja dla jaho ličba — piać pracentaŭ. Kali jaho kansiervatyŭnaja partyja, Chryścijanska-demakratyčny sajuz (CHDS), nie pieraadoleje prachadny barjer na vybarach u Ziamielny parłamient (łandtah) u Mieklenburhu-Piaredniaj Pamieranii na paŭnočnym uschodzie FRH, šancaŭ zastacca va ŭładzie ŭ Bierlinie ŭ kanclera budzie mała, ličać ahladalniki. U niamieckaj stalicy ŭ hety dzień taksama projduć važnyja vybary — pałaty deputataŭ. 

Napiaredadni hałasavańnia CHDS bałansavała na miažy: roznyja apytańni pakazali padtrymku partyi na ŭzroŭni šaści-siami pracentaŭ.

Hałoŭnaje supiernictva ŭ hetaj ziamli sa stalicaj u Švierynie idzie pamiž kiroŭnymi sacyjał-demakratami i apazicyjnaj ultrapravaj «Alternatyvaj dla Hiermanii» (AdH).

Apytańni pakazvajuć minimalnuju pieravahu AdH z pakazčykam kala 37 pracentaŭ. SDPH adstaje na adzin — dva pracentnyja punkty, ale na finišnaj pramoj razryŭ źnik.

Ahladalniki źviazvajuć heta z asabistaj papularnaściu kirujučaha premjer-ministra ad SDPH, 52‑hadovaj Manueły Šviezih. Jaje hałoŭny supiernik — 56‑hadovy Lajf-Eryk Cholm, deputat bundestaha ad AdH, były elektramancior i były radyjoviadučy.

Šancaŭ uznačalić urad u Cholma niama. Navat kali AdH atrymaje pieršaje miesca, partyja nie zmoža sfarmavać kaalicyju, bo inšyja na heta nie pojduć. U adroźnieńnie ad Saksonii-Anchalt, u Švierynie ziamielnaje viedamstva pa abaronie Kanstytucyi nie pryznała AdH pravaekstremisckaj. Jaje prahrama vyhladaje mienš radykalna.

Padčas vybarčaj kampanii Cholm prapanoŭvaŭ paśla zakančeńnia vajny Rasii suprać Ukrainy, jakuju jon asudziŭ u jaje pačatku, viarnucca da zakupak rasijskaha trubapravodnaha hazu pa acalełaj paśla dyviersii adnoj z čatyroch nitak hazapravodaŭ «Paŭnočnaja płyń». Mienavita ŭ Mieklenburhu-Piaredniaj Pamieranii hazapravod pa dnie Bałtyjskaha mora vychodzić na sušu. A ciapierašniaja premjer, sacyjał-demakrat Šviezih raniej vystupała adnym z prychilnikaŭ SP-2, ale paśla 2022 hoda źmianiła pazicyju.

U Bierlinie, jaki maje status asobnaj fiederalnaj ziamli, u partyi Mierca pazicyi našmat lepš, čym na poŭnačy, ale ŭ Bierlinie CHDS moža stracić važnuju pasadu kirujučaha burhamistra.

Za niekalki miesiacaŭ da vybaraŭ CHDS źmianiła pieršy numar u vybarčym śpisie — burhamistr Kaj Viehnier admoviŭsia ad pieravybrańnia na fonie skandału. Vyśvietliłasia, što padčas vyklikanaha dyviersijaj błekaŭta ŭ pačatku hoda palityk zmaŭčaŭ pra toje, što ŭ pieršy dzień kryzisu hulaŭ u tenis.

Apytańni pakazvajuć, što ŭ Bierlinie try partyi iduć sinchronna z pakazčykam kala 20 pracentaŭ kožnaja — CHDS, Levaja partyja i AdH. Vybary ŭ Bierlinie cikavyja jašče i tym, što ŭpieršyniu pasadu burhamistra moža zaniać pradstaŭnica Levaj partyi — 45‑hadovaja Elif Eralp, niemka z tureckimi karaniami, što naradziłasia ŭ Miunchienie.

Hetyja vybary zaviaršajuć mini-sieryju hałasavańniaŭ na ŭschodzie FRH, za jakimi bieź pierabolšańnia sočyć uvieś śviet.

Paśla pravalnych vybaraŭ u łandtah Saksonii-Anchalt 6 vieraśnia, dzie CHDS straciła pałovu hałasoŭ, a pieramožcam stała AdH z rekordnymi dla Hiermanii amal 44% i realnym šancam upieršyniu pryjści da ŭłady, cisk na kanclera raście. U ŚMI adkryta abmiarkoŭvajuć jaho mahčymuju zamienu na bolš papularnaha palityka biez praviadzieńnia daterminovych vybaraŭ. 

• 0
• 2
• 1
• 1
• 0
• 0
• 0
• 0