U Minsku pabudujuć niezvyčajnuju škołu pa matyvach «Hary Potera» i filmaŭ pra kosmas, paviedamiła vydańniu Times.by kampanija-zabudoŭščyk.
Novuju škołu raźmieściać u žyłym kompleksie «Zialonaja havań» niedaloka ad dziciačaha sada «Ptušyny dom», jaki adkryŭsia ŭ kastryčniku minułaha hoda. U pierśpiektyvie tam źjavicca sacyjalny kłastar z handlovym centram, paliklinikaj, jašče adnoj škołaj i spartyŭnymi placoŭkami.
Navučalnaja ŭstanova atrymaje nazvu Škoła Adkryćciaŭ. Zabudoŭščykam vystupaje kampanija A-100 Deviełapmient.
Škoła budzie aryjentavanaja na pryrodaznaŭčyja navuki — chimiju, fiziku, bijałohiju, astranomiju, hieahrafiju — i składacca z troch karpusoŭ roznaj vyšyni: «Miesiac» (3 pavierchi), «Mars» (4 pavierchi) i «Sonca» (4 pavierchi). Pieršyja dva pryznačanyja dla zaniatkaŭ, a ŭ «soniečnym» korpusie płanujecca raźmiaścić sportzały, stałovuju i aktavuju zału.
Kožny pavierch atrymaje svaje tematyčnyja nazvy. Naprykład, u «Miesiacy» pieršy ŭzrovień budzie nazyvacca «Zorny akijan», druhi — «Płanietarnaja faŭna», treci — «Kaśmičny sad». «Mars» ža budzie składacca z «Načnoha nieba», «Soniečnaj sistemy», «Najdalejšaj hałaktyki» i «Teoryi vialikaha vybuchu».
Interjery ŭsich karpusoŭ buduć vytrymanyja ŭ stylistycy navukova-daśledčaj stancyi.
Zabaronieny les — jak u Chohvartsie
Školny dvor abstalujuć roznymi zonami i prastorami z ekaciežkami i vieładarožkami. Zabudoŭščyk abiacaje zrabić «padabienstva Zabaronienaha lesu» — jak u škole čaraŭnictva Chohvarts ź filmaŭ pra Hary Potera.
U spartyŭnaj zonie buduć placoŭka dla futboła, baskietboła i valejboła, tenisnyja korty, stały dla nastolnaha tenisa, pałasa pieraškod i trenažory dla varkaŭtu.
Budzie zona ź vietrakami, soniečnymi panelami, padzornymi i recha-trubami, aharodam, ciaplicami, horkami i roznymi «łazałkami».
«U aharodach i mini-ciaplicach dzieci buduć pravodzić ekśpierymienty i vyroščvać raśliny pad kiraŭnictvam nastaŭnika bijałohii. Amal jak u znakamitym Chohvartsie», — adznačyli ŭ kampanii.
Najcišejšaja častka dvara — zona «Ukryćcio», dzie možna dzialicca tajamnicami ŭ śpiecyjalnych «šušukalnicach» (zacišnych altankach). Taksama tam buduć siadzieńni-pianiočki, sad kamianioŭ, špakoŭni, karmuški i placoŭki dla nazirańnia za kuzurkami.
Škoła raźličanaja na 1125 čałaviek, zdać jaje płanujecca ŭ 2028 hodzie.
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku
Kamientary