U Breście pradajuć maleniečkuju adnapakajoŭku, dzie paśla zastanucca žyć maci i dačka. U čym prykoł?
«Jak heta tak? Ja nabyvaju kvateru 20 mietraŭ i žyvu ŭ joj z žančynaj i jaje dziciom?» — cikavicca brestčanka Kaciaryna. Akazvajecca, za niezvyčajnaj abviestkaj ab prodažy kvatery chavajecca sapraŭdnaja siamiejnaja drama.
Kaciaryna na «Kufary» znajšła abviestku ab prodažy adnapakajoŭki ŭ Breście. Kvatera znachodzicca ŭ domie 4 na vulicy Maładahvardziejskaj.
Dom 1979 hoda, pieršy pavierch, ahulnaja płošča kvatery krychu mienš za 20 kvadrataŭ, ź ich žyłaja — usiaho kala 11 kvadrataŭ. Hanna, jakaja apublikavała abviestku, paznačyła canu 35 tysiač dalaraŭ — ale dadała vialikimi litarami, što mahčymy «dobry torh».
Darečy, nielha skazać, što heta vielmi tanna — bo ŭ hetym ža domie za adnapakajoŭku płoščaj 29 kvadrataŭ (nie na pieršym paviersie) prosiać 41 tysiaču dalaraŭ.
Ale ž u abviestcy Hanny jość adzin cikavy niuans: paznačana, što ŭ kvatery zarehistravana žančyna ź dziciom — i jany zastanucca tam žyć navat paśla prodažu nieruchomaści.
Vidavočna, što novy ŭłaśnik nie zmoža ni žyć tam, ni zdavać u arendu kvateru — bo miesca i tak kot napłakaŭ.
«Jak heta tak? Ja nabyvaju kvateru 20 mietraŭ i žyvu ŭ joj z žančynaj i jaje dziciom?» — spytała Kaciaryna ŭ karystalnikaŭ Threads.
Dopis zavirusiŭsia i ŭ chutkim časie ŭ kamientarach źjaviłasia taja samaja žančyna, jakaja žyvie ŭ hetaj adnapakajoŭcy sa svajoj dačkoj-školnicaj. Zavuć jaje Natalla Aniščuk.
Vyśvietliłasia, što pa-za kadram zastavałasia sapraŭdnaja siamiejnaja drama.
U siamji Natalli było troje dziaciej — jana i jašče dva braty. Baćki ŭžo pamierli, paśla ich zastałasia kvatera. Pry žyćci baćka chacieŭ pryvatyzavać jaje, ale nie paśpieŭ, bo chvareŭ na ankałohiju.
U toj momant starejšy brat Natalli ŭžo byŭ u šlubie i žyŭ asobna, Natalla taksama mieła žanicha i płanavała pierajechać da jaho. Tamu jany vyrašyli admovicca ad svaich dolaŭ na karyść małodšaha brata. Ale pakinuli za saboj pažyćciovaje prava ŭładańnia i karystańnia baćkoŭskaj kvateraj — nataryus zapeŭniŭ, što tak mahčyma zrabić.
Natalla i jaje starejšy brat pavieryli, što bieź ich zhody ich nikoli nie vypišuć z baćkoŭskaj kvatery: «Bo kamu vieryć, kali nie svajakam?».
Pryvatyzacyja adbyvałasia ŭ 2015 hodzie. Natalla śćviardžaje, što dva hady (da 2017) jana sama apłačvała tuju pryvatyzacyju, bo małodšy brat byŭ u armii.
U 2017 hodzie žančyna vyjšła zamuž, naradziła dzicia i pierajechała da muža ŭ kvateru — piać hadoŭ, pakul žančyna nie žyła ŭ baćkoŭskaj kvatery, jana nie apłačvała tam kamunalnyja pasłuhi. U 2022 hodzie šlub raskidaŭsia, Natalla razam z dačkoj vyrašyła viarnucca ŭ siamiejnaje hniazdo — ale małodšy brat, jaki ŭžo sam paśpieŭ ažanicca, byŭ kateharyčna suprać.
Pakolki ŭ siastry nie było ŭłasnaj nieruchomaści, jon uziaŭ kredyt, nabyŭ maleńkuju adnapakajoŭku i praz sud vypisaŭ Natallu tudy. Ciapier mužčyna zajaviŭ, što vypłačvać kredyt jamu niecikava, tamu jon choča pradać tuju druhuju kvateru (Natalla zarehistravanaja tam i žyvie razam z dačkoj): «Jon prapanavaŭ mnie čatyry varyjanty: 1. Jon pradaje kvateru razam sa mnoj i dziciom. 2. Padsialaje da mianie ŭźbiekaŭ. 3. Nabyć u jaho kvateru pa rynkavaj canie. 4. Kali ja nie pahadžusia na adzin z varyjantaŭ, jon niešta zrobić».
Kamientatary ŭ žachu ad situacyi. Maŭlaŭ, sumlenna było b adrazu pradać baćkoŭskuju kvateru, a hrošy padzialić paroŭnu. Ale Natalla kaža, što taki varyjant joj nichto nie prapanoŭvaŭ.
Kuplać adnapakajoŭku ŭ brata Natalla nie choča — bo za tyja ž hrošy plus kredyt jana moža nabyć sabie z dačkoj niešta bolš kamfortnaje.
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma12
Kamientary