Cana rasijskaj nafty na fonie abvastreńnia na Blizkim Uschodzie padskočyła da $110 za baral

Jak paviedamlaje Reuters sa spasyłkaj na trejdaraŭ, u paraŭnańni z pačatkam lipienia rasijskaja nafta padaražeła na 175%. Jaje košt dasiahnuŭ maksimalnaha ŭzroŭniu z krasavika, kali padčas vajny ZŠA ź Iranam byli zabłakavanyja pastaŭki nafty praz Armuzski praliŭ.

Ciapier prablemy ŭźnikli i z pastaŭkami saudaŭskaj nafty praz Čyrvonaje mora. U vyniku ataki chusitaŭ byŭ paškodžany naftapravod, jaki pierapampoŭvaŭ praz pustyniu kala 3 miljonaŭ baralaŭ nafty na sutki. Jaho praca spynienaja na niavyznačany termin.

Saudaŭskaja Aravija ŭžo papiaredziła klijentaŭ pra admienu častki vieraśnioŭskich pastavak. Na fonie niedachopu blizkaŭschodniaj nafty ŭ Indyi rasijski Urals upieršyniu za praciahły čas pradajecca nie sa źnižkaj, a, naadvarot, z nadbaŭkaj. Pavodle krynic Reuters, jaho košt tam prykładna na 8 dalaraŭ za barel vyšejšy za košt Brent. U Kitai nadbaŭka na Urals dasiahnuła 20 dalaraŭ za barel, pavodle danych Argus.

Takaja dynamika cen moža istotna palepšyć situacyju z naftahazavymi dachodami rasijskaha biudžetu. Raniej za studzień — žnivień fiederalny biudžet Rasii atrymaŭ ad nafty i hazu kala 5,02 tryljona rubloŭ (kala 54 miljardaŭ dalaraŭ). Heta na 17% mienš, čym za taki ž pieryjad minułaha hoda, i prykładna na tracinu mienš, čym za studzień — žnivień 2024 hoda.

Pry hetym ciapierašni košt Urals amal udvaja pieravyšaje ŭzrovień, zakładzieny ŭ rasijski biudžet na 2026 hod, — 59 dalaraŭ za baral. Siaredniaja cana rasijskaj nafty z pačatku vieraśnia — 81 dalar za baral.

Adnak vysokija ceny na syruju naftu nie abaviazkova całkam vypraviać stanovišča rasijskaha biudžetu. Adnoj z prablem stali ŭdary pa naftapierapracoŭčych zavodach. Z-za deficytu paliva rasijskija ŭłady ŭviali zabaronu na ekspart bienzinu i dyzielnaha paliva.

U vyniku Rasija praciahvaje vyvozić syruju naftu prykładna ŭ raniejšych abjomach, ale ahulny ekspart nafty i naftapraduktaŭ źniziŭsia da minimalnaha ŭzroŭniu z časoŭ pandemii — prykładna da 28 miljonaŭ ton na miesiac, aceńvajuć analityki Rajfajzienbanka. Pavodle ich, rost cany nafty, jaki čakajecca pa vynikach vieraśnia, naŭrad ci całkam kampiensuje padzieńnie ekspartu. Akramia taho, skaračajecca i rasijski nienaftahazavy ekspart.

Pry padrychtoŭcy biudžetu na 2026 hod rasijskaje Ministerstva finansaŭ raźličvała skaracić letašni deficyt z 5,7 da 3,6 tryljona rubloŭ (z 67,10 miljarda da 42,38 miljarda). Adnak užo pa vynikach pieršaha kvartała hadavy płan deficytu byŭ pieravyšany.

Da pačatku vieraśnia deficyt rasijskaha biudžetu vyras da 5,8 tryljona rubloŭ. Na jaho pavieličeńnie ŭ tym liku paŭpłyvali rekordnyja vajskovyja vydatki, jakija za pieršaje paŭhodździe pieravysili 10 tryljonaŭ rubloŭ.

Hazprambank aceńvaje, što da kanca 2026 hoda deficyt rasijskaha biudžetu moža pavialičycca da 6,5—7,5 tryljona rubloŭ (76,52—88,29 miljarda dalaraŭ).

• 1
• 0
• 0
• 2
• 0
• 0
• 0
• 0