Cichanoŭskaja jedzie ŭ Ńju-Jork. Jana moža pierasiekčysia z pradstaŭnikami Łukašenki, ale hałoŭnuju intryhu pakul nie raskryvajuć
Śviatłana Cichanoŭskaja razam sa svajoj kamandaj voźmie ŭdzieł u Tydni vysokaha ŭzroŭniu Hienieralnaj Asamblei AAN u Ńju-Jorku. Daviedalisia, što tam budzie.
Hienieralnyja debaty 81‑j siesii AAN pačnucca 22 vieraśnia i praciahnucca da 28 vieraśnia. U hetyja dni ŭ štab-kvateru arhanizacyi źjazdžajucca kiraŭniki dziaržaŭ, premjer-ministry, ministry zamiežnych spraŭ i inšyja vysokapastaŭlenyja čynoŭniki. U kamandzie Śviatłany Cichanoŭskaj nazyvajuć hetaje mierapryjemstva «alimpijadaj suśvietnaj dypłamatyi».
Sama Śviatłana Cichanoŭskaja nie budzie vystupać z trybuny Hienasamblei: tam Biełaruś aficyjna pradstaŭlaje ŭłada Łukašenki. Jaje kamanda robić staŭku na sustrečy na palach AAN — jak zapłanavanyja zahadzia, tak i karotkija razmovy, jakija ŭźnikajuć užo ŭ Ńju-Jorku.
«Dla demakratyčnaj Biełarusi heta ŭnikalnaja mahčymaść być pačutaj na samym vysokim uzroŭni. U Cichanoŭskaj zapłanavany šerah važnych sustreč. My pracujem nad razmovami z suśvietnymi lidarami, ministrami zamiežnych spraŭ i inšymi vysokapastaŭlenymi čynoŭnikami. Buduć taksama sustrečy z pradstaŭnikami ZŠA, u tym liku z amierykanskimi sienatarami», — raskazaŭ «Našaj Nivie» daradca Śviatłany Cichanoŭskaj pa dypłamatyi Dzianis Kučynski.
Poŭny śpis surazmoŭcaŭ kamanda pakul nie nazyvaje: častka sustreč jašče ŭzhadniajecca, a niekatoryja mohuć adbycca niepasredna padčas Tydnia vysokaha ŭzroŭniu.
Niekalki chvilin u kalidory mohuć zapuścić palityčny praces
Asobnaje značeńnie ŭ kamandzie Cichanoŭskaj nadajuć niefarmalnym kantaktam. U adnym budynku i na adnych pryjomach akazvajucca ludzi, sustreču ź jakimi ŭ inšych abstavinach daviałosia b rychtavać miesiacami.
«U dypłamatyi vielmi časta rečy vyrašajucca nie tolki za aficyjnym stałom, ale i padčas karotkaj razmovy ŭ kalidory, na pryjomie ci pamiž mierapryjemstvami. Za niekalki chvilin možna danieści pazicyju Biełarusi niepasredna čałavieku, jaki prymaje rašeńni, damovicca pra nastupnuju sustreču ci zapuścić novy palityčny praces», — tłumačyć Dzianis Kučynski.
U papiarednija hady ŭ Ńju-Jorku zdaralisia i karotkija kantakty pamiž kamandaj Cichanoŭskaj i pradstaŭnikami aficyjnaha Minska. Pavodle Kučynskaha, na palach Hienasamblei jany pierasiakalisia z Uładzimiram Makiejem, Siarhiejem Alejnikam i Maksimam Ryžankovym, jakija ŭ roznyja hady ŭznačalvali biełaruskaje Ministerstva zamiežnych spraŭ.
Padčas takich razmoŭ pradstaŭniki demakratyčnych sił, jak śćviardžaje daradca, havaryli pra nieabchodnaść spynić represii, vyzvalić palitviaźniaŭ i pačać dyjałoh ź biełaruskim hramadstvam.
Ci adbudziecca padobny kantakt sioleta, zahadzia nieviadoma. Ale imaviernaść pierasiačeńnia zastajecca: delehacyi aficyjnaha Minska i demakratyčnych sił znoŭ buduć pracavać u adnoj dypłamatyčnaj prastory.
Asobnaja sustreča pa Biełarusi i «važny siurpryz»
Centralnaj padziejaj vizitu pavinna stać asobnaje mierapryjemstva, pryśviečanaje Biełarusi. Jaho prymie Pradstaŭnictva Jeŭrapiejskaha Sajuza pry AAN. Čakajecca ŭdzieł ministraŭ zamiežnych spraŭ i inšych vysokapastaŭlenych pradstaŭnikoŭ roznych krain.
Biełaruskaje pytańnie płanujuć abmiarkoŭvać nie tolki jak unutrany palityčny kryzis i prablemu represij. Kamanda Cichanoŭskaj choča havaryć pra miesca Biełarusi ŭ sistemie rehijanalnaj i jeŭrapiejskaj biaśpieki.
Letaś padobnaja sustreča sabrała bolš za 40 pradstaŭnikoŭ zamiežnapalityčnych viedamstvaŭ i mižnarodnych arhanizacyj. A ŭ 2024 hodzie padčas mierapryjemstva na palach Hienasamblei Śviatłana Cichanoŭskaja zaklikała šukać dypłamatyčnyja šlachi vyzvaleńnia palitviaźniaŭ. Niekalki krain tady zajavili pra hatoŭnaść padtrymać Mižnarodny humanitarny fond dapamohi represavanym.
Sioletni skład udzielnikaŭ pakul trymajuć u sakrecie.
«Pakiniem nievialikuju intryhu: čakajem udziełu niekatorych novych ministraŭ i partnioraŭ, jakija raniej u takim biełaruskim farmacie nie ŭdzielničali. Dumaju, heta budzie važny i značny siurpryz», — kaža Dzianis Kučynski.
Akramia taho, Śviatłana Cichanoŭskaja pavinna naviedać niekalki mižnarodnych mierapryjemstvaŭ z udziełam suśvietnych lidaraŭ.
Navošta Śviatłanie Cichanoŭskaj znoŭ jechać u Ńju-Jork
Pajezdka adbyvajecca ŭ momant, kali ŭvaha zachodnich krain skancentravanaja na vojnach, biaśpiecy i pierabudovie mižnarodnych adnosin. Za miesca ŭ paradku dnia davodzicca kankuravać ź dziasiatkami kryzisaŭ, a biełaruskaja tema praz šeść hadoŭ paśla vybaraŭ 2020 hoda ŭžo nie maje toj navizny, jakaja była napačatku.
Mienavita tamu štohadovy ŭdzieł u Tydni vysokaha ŭzroŭniu maje dla kamandy Śviatłany Cichanoŭskaj praktyčny sens: za niekalki dzion možna sustrecca ź dziasiatkami palitykaŭ, da jakich u inšy čas daviałosia b jechać u roznyja krainy.
«Ciapier, kali vyrašajecca budučynia biaśpieki śvietu i Jeŭropy, dla nas pryncypova važna, kab demakratyčnaja Biełaruś nie vypadała ź mižnarodnaha paradku dnia. Tydzień vysokaha ŭzroŭniu daje redkuju mahčymaść być tam, dzie adbyvajucca klučavyja razmovy suśvietnaj dypłamatyi, i niepasredna danosić biełaruskuju pazicyju tym, chto prymaje rašeńni», — padkreślivaje Dzianis Kučynski.
Kaho mienavita Śviatłana Cichanoŭskaja sustrenie ŭ Ńju-Jorku i chto stanie anansavanym «siurpryzam», jaje kamanda abiacaje paviedamić užo padčas vizitu.
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma12
Kamientary
dyk a ci padtrymali? vyniki jość, akrom słoŭ?