Dzianis Kučynski zajaviŭ, što novy palityčny siezon moža być vyrašalnym
Dypłamatyčny daradca Śviatłany Cichanoŭskaj raskazaŭ, čaho čakać ad novaha palityčnaha siezonu. Pa jaho słovach, jon moža stać vyrašalnym.
«Spadziajemsia, što vierasień, novy palityčny siezon, jon pačniecca z dobrych navin pa vyzvaleńni našych biełaruskich hierojaŭ i hieraiń. Tut vielizarnuju pracu praviała amierykanskaja administracyja, ź jakoj my razam pracujem, i my budziem praciahvać tuju pracu da momantu, jak nie budzie vyzvaleny kožny i kožnaja z našych hierojaŭ i hieraiń. Taksama budziem dbać pra toje, jak dapamahčy vyzvalenym palitźniavolenym. Spadziajemsia, što ŭ novym palityčnym siezonie zmožam pavialičyć Mižnarodny humanitarny fond, jaki dapamahaje biełaruskim palitviaźniam», — raskazaŭ Dzianis Kučynski ŭ videa.
Jon zaznačyŭ, što ŭ vieraśni ŭ Ńju-Jorku tradycyjna projdzie Hienasambleja AAN.
Pa jaho słovach, Śviatłana Cichanoŭskaja budzie prysutničać na adnoj placoŭcy z prezidentam Trampam i prezidentam Zialenskim.
«Unikalnaja mahčymaść pahavaryć z suśvietnymi lidarami ŭ kułuarach i viarnuć Biełaruś taksama ŭ paradak dnia. Nu i zrazumieła, što novy palityčny zvon dla nas budzie iści pad ściaham Ukrainy, i my dasiahnuli vialikich pośpiechaŭ z ukrainskimi ŭładami i, zrazumieła, praciahniem hetaje supracoŭnictva. I tut vielmi važnaje, kaniečnie, toje, što los Biełarusi taksama zaležyć ad losu Ukrainy», — kaža Kučynski.
Budzie praciahvacca praca pa dapamozie biełarusam jak unutry krainy, hetak i za miažoj, ź biełarusami ŭ Polščy, u Litvie, u inšych krainach, ź lehalizacyjaj, z bankaŭskimi rachunkami, z dazvołami na žycharstva.
«Tamu praca praciahvajecca, praca idzie. Heta budzie vielmi važny palityčny siezon. I ja dumaju, što jon moža stać sapraŭdy vyrašalnym jak dla Biełarusi, hetak i dla Ukrainy», — padsumavaŭ dypłamatyčny daradca.
Kamientary
Vielmi ŭpeŭniena dy słušna ŭsio kaža daradca!