Novy ci ŭžyvany? Kolki kaštujuć Geely i Belgee z prabieham i ci mocna jany stračvali ŭ canie
Apošnija niekalki hadoŭ aŭtamabili biełaruskaj vytvorčaści, jakija vypuskajucca pad markami Geely i Belgee, zajmajuć bolš za 50% rynku novych aŭto. Pahladzieli, što saboj ujaŭlaje druhasny rynak mašyn ajčynnaj zborki.
Belgee S50
Siedan Belgee S50 novym pradajecca pa cenach ad 58 200 rubloŭ (kala $19 250) za bazavuju viersiju ź miechaničnaj karobkaj pieradač.
Za patrymanyja Geely Emgrand (da rebrendynhu tak nazyvaŭsia Belgee S50) ź miechaničnaj karobkaj pieradač 2022—2024 hadoŭ vypusku, jakija nie paśpieli papracavać u taksi, prosiać ad 33 da 45 tysiač rubloŭ (kala 10 900—14 900 dalaraŭ).
Belgee S50 z aŭtamatyčnaj karobkaj pieradač novym pradajecca pa cenach ad 62 400 rubloŭ (kala $20 650) u kamplektacyi Comfort+ i ad 67 800 rubloŭ (kala $22 400) u kamplektacyi Flagship Plus.
Za mašyny 2025 hoda z aŭtamatyčnaj karobkaj pieradač u zaležnaści ad prabiehu i kamplektacyi prosiać ad 45 da 55 tysiač rubloŭ (kala 14 900—18 200 dalaraŭ).
Siarod abjaŭ ab prodažy chapaje mašyn, u jakich papiaredni ŭłaśnik užo zrabiŭ dadatkovuju antykarazijnuju apracoŭku abo nakleiŭ braniaplonku, kab abaranić łakafarbavaje pakryćcio ad paškodžańniaŭ.
Samyja tannyja mašyny, naturalna, tyja, što paśla pracy ŭ taksi. Za aŭtamabil z prabieham pad 400 tysiač kiłamietraŭ prosiać 22 700 rubloŭ (kala 7500 dalaraŭ), i heta najtańniejšy varyjant, kali nie ŭličvać mašyny, paškodžanyja ŭ DTZ. Aŭtamabil 2023 hoda vypusku, maje hazavaje abstalavańnie na mietanie.
Na fota bačna, što na parohach jość ślady karozii, farba łuščycca i jość pahnutaści — typovyja «asablivaści» aŭtamabilaŭ, jakija doŭha pracavali ŭ taksi.
Jašče adzin Emgrand 2023 hoda na mietanie, jaki pracuje ŭ taksi i maje prabieh kala 370 tysiač kiłamietraŭ, pradajuć za 31 700 rubloŭ (kala 10 500 dalaraŭ).
Ahułam siarod užyvanych Emgrand i S50 pradajecca niamała mašyn, jakija vykarystoŭvalisia ŭ taksi. Bolšaść ź ich maje zajaŭleny prabieh kala 200 tysiač kiłamietraŭ.
Nakolki dobra karystajucca popytam takija aŭtamabili na druhasnym rynku, dakładna nie viadoma. Ale ahułam S50 maje davoli niebłahija vodhuki ad ułaśnikaŭ. Jak biudžetnik, S50, možna skazać, maje niašmat kankurentaŭ na biełaruskim rynku, bo paśla sychodu z Rasii suśvietnych aŭtavytvorcaŭ, u Biełarusi źnikli z prodažu raniej papularnyja VW Polo, Skoda Rapid i Renault rasijskaj zborki.
Hałoŭnaj paradaj dla ŭłaśnikaŭ Geely/Belgee nazyvajuć naniasieńnie dadatkovaj antykarazijnaj apracoŭki. Heta mast chev, inakš na dniščy aŭtamabila i ŭ schavanych paražninach davoli chutka pačynaje źjaŭlacca irža.
Belgee X50 — sapraŭdny biestsieler
Samy papularny aŭtamabil u Biełarusi, jaki pradajuć novym, — heta kampaktny krosovier Belgee X50, jaki da rebrendynhu nazyvaŭsia Geely Coolray.
Novy Belgee X50+ (restajlinhavaja viersija X50) pradajuć pa cenach ad 61 900 rubloŭ ($20 600) za aŭto ŭ kamplektacyi Comfort, ad 64 900 rubloŭ ($21 600) u kamplektacyi Luxury i ad 71 900 rubloŭ ($23 950) u kamplektacyi Flagship.
Za ŭžyvanyja Belgee X50 2023 hoda prosiać ad 45 500 rubloŭ (kala 15 150 dalaraŭ).
Stolki prosiać za aŭtamabil z prabieham pad 100 tysiač kiłamietraŭ. U apisańni paznačana, što mašyna abklejenaja achoŭnaj plonkaj i pradajecca ad pieršaha ŭłaśnika, jaki nabyŭ jaje novaj u dylera i tam ža paśla absłuhoŭvaŭ.
Geely Coolray 2020—2021 hadoŭ pradajuć pa cenach ad 40 tysiač rubloŭ (kala 13 500 dalaraŭ).
Nakolki vysokim popytam karystajucca šaścihadovyja Coolray z prabieham kala 100—150 tysiač kiłamietraŭ pa cenach ad 40 tysiač rubloŭ, kali novyja i ŭžo paśla restajlinhu kaštujuć ad 58 tysiač, — pytańnie składanaje. Tym bolš novyja aŭto možna nabyć z vykarystańniem ilhotnaha kredytavańnia.
Z druhoha boku, davoli vysokija ceny na ŭžyvanyja aŭto — heta dobry sihnał dla tych, chto źbirajecca nabyć takoje aŭto, u tym liku novaje. Bo vyhladaje, što Geely i Belgee u Biełarusi nie paŭtarajuć historyi sa šmatlikimi kitajskimi mašynami, jakija za pieršyja dva-try hady hublali pałovu cany.
Ahułam u Biełarusi ciapier pradajecca kala 300 užyvanych Coolray i X50 — prykładna ŭ roŭnych praporcyjach.
Atlas
Jašče adzin biestsieler ź minułaha, Geely Atlas, kaštuje ad 33 tysiač rubloŭ (11 tysiač dalaraŭ). Stolki prosiać za mašyny 2017—2019 hadoŭ vypusku z prabieham kala 200 tysiač kiłamietraŭ.
Što da ahulnych ličbaŭ, to na av.by raźmieščana amal 2000 abjaŭ ab prodažy Geely i Belgee. Naturalna, što nie ŭsie jany sabranyja ŭ Biełarusi, bo niekatoryja madeli pryvoziać naŭprost z Kitaja. Ale ŭ lubym vypadku hetyja ličby śviedčać pra toje, što Geely/Belgee stali sapraŭdy narodnymi aŭtamabilami.
Ciapier čytajuć
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma14
Kamientary