U Słucku žančynu aštrafavali za pakinutyja kala śmietnicy dobraje adzieńnie i linoleum. Ludzi nie vytrymali, daviedaŭšysia pra heta
Siužet pra słuččanku Irynu, jakuju pryciahnuli da adkaznaści za vyniesienyja da kantejnieraŭ rečy, spravakavaŭ emacyjnuju reakcyju.
Słuččanka Iryna vyniesła da śmiećcievych bakaŭ dva pakiety z nošanym, niepatrebnym joj bolš, ale dobrym adzieńniem i rułon linoleuma ŭ nadziei, što rečy spatrebiacca inšym. Adnak hety ŭčynak trapiŭ u abjektyŭ kamiery videanazirańnia: žančynu vyklikali ŭ ŽES i skłali pratakoł za pakidańnie bujnahabarytnaha śmiećcia nie tam, dzie treba. Ciapier joj pahražaje štraf da 1350 rubloŭ.
Svajoj historyjaj Iryna padzialiłasia na jutub-kanale «Słuck TV», paśla čaho na jaje źviarnuli ŭvahu aŭtary tyktok-akaŭnta «Biełaruśfakty». Kali aryhinalnaje videa za 12 dzion nabrała ścipłyja 1,5 tysiačy prahladaŭ, to rolik u tyktoku za sutki pahladzieli bolš za 3,4 miljona razoŭ, pakinuŭšy amal 4300 kamientaroŭ.
Absalutnym lidaram pa vodhukach (bolš za 86 tysiač łajkaŭ) stała iraničnaja replika:
«Samy niebiaśpiečny złačynca złoŭleny, kraina moža spać spakojna».
Druhaja pa papularnaści replika:
«Užo nie viedajuć, jak ź ludziej hrošy adabrać».
Nie mienš padtrymki znajšoŭ i zaklik:
«Ludzi, što z vami?!!!! Machlaroŭ łavicie! Dziaŭčyna svaim pakietam mahła realna kamuści dapamahčy».
U kamientarach ludzi ščyra nie razumiejuć łohiki:
«Chto heta prydumlaje?»
Mnohija z horkaj ironijaj zaŭvažajuć:
«Štraf za dabryniu! Kazała mnie babula: nie chočaš zła — nie rabi dabra», «Nielha ŭ RB rabić dabro, sabie horš zrobiš…»
Karystalniki masava adznačajuć, što taki sposab pazbaŭlacca ad niepatrebnych, ale prydatnych rečaŭ — zvykłaja praktyka:
«Boža, jakoje tryźnieńnie, čałaviek chacieŭ dobruju spravu zrabić»; «Poŭnaje tryźnieńnie, ja zaŭsiody pakidaju adzieńnie»; «Pieršy raz takoje čuju, što nielha. Heta dapamoha niščymnym, chiba heta drenna?»; «Pieršy raz takoje čuju. U nas u dvary ŭsie tak robiać».
Kamientatary achvotna dzielacca ŭłasnym dośviedam:
«Čamu heta zabaroniena? Ja sa śmietnika tak ściahnuŭ mikrachvaleŭku, 3 pracoŭnyja kinieskopavyja televizary, 2 kampjutary, pasudamyjku i čajnik ź nievialikimi pałomkami».
«MINSK… 2 pavierch kvatery, naziraju: dziaŭčyna pastaviła 2 vielizarnyja pakiety z adzieńniem… Padyšli babuli i maładaja žančyna, pierahledzieli abodva pakiety, padzialili paroŭnu i zabrali dadomu… Kali adzieńnie dobraje, navošta kidać u kantejnier? U Hjermanii dy ŭ krainach jeŭrapiejskich staviać pakiety z adzieńniem. Patrebnaje zabiaruć… U čym vina dziaŭčyny?»
Pry hetym biełarusy źviartajuć uvahu na adsutnaść adpaviednaj infrastruktury:
«Cikava, a dzie ŭ nas staviać kantejniery dla bujnahabarytnaha śmiećcia? Nivodnaha nie bačyła», «Čamu ŭ nas niama kantejnieraŭ dla adzieńnia, jak u inšych krainach?!»
Pavodziny pradstaŭnikoŭ žyllova-kamunalnaj haspadarki vyklikali ŭ ludziej asobnuju chvalu emocyj.
«Usio narmalna? Z hłuzdu źjechali? Dziaŭčyna dobruju spravu zrabiła», — zaŭvažaje niechta.
«Dobraja sprava — pastavili kamiery kala śmietnikaŭ: možna lohka stvaryć bačnaść aktyŭnaj pracy, nie padymajučysia z kresła…», — dadaje jašče adzin karystalnik.
Biełarusy prapanujuć:
«A moža, ich aštrafavać za adsutnaść patrebnych kantejnieraŭ?»
«Dyk niachaj staviać kantejniery Čyrvonaha Kryža ci jašče jakich arhanizacyj pabolej, a nie adzin kantejnier na horad».
«A čamu ŽESy nie karajuć za nievykanańnie svaich niepasrednych abaviazkaŭ? Naprykład, kali ŭ šmatpaviarchovikach svoječasova nie prybirajuć padjezdaŭ, a na niekatorych padvorkach i prylehłych terytoryjach doŭhi čas valajecca śmiećcie i jaho nie prybirajuć, bo brakuje dvornikaŭ i h.d. A, ja zabyŭsia, heta ž inšaje».
Jość i bolš emacyjnyja zapisy:
«Absurd tvorycca ŭ krainie z usimi hetymi zabaronami!!! U Rasii vučymsia tatalnamu teroru?? Zaŭtra budziecie rehistravać kurej i trusoŭ??? Sabak i katoŭ užo paličyli…… Deputaty!, vy ž byli zvyčajnymi ludźmi, a ciapier što robicca ŭ vas u hałovach??? Zabylisia, jak žyvie zvyčajny narod??? Uklučycie choć reštki sumleńnia!!!!!!»
Zrešty, siarod tysiač aburanych kamientaroŭ znachodziacca i adzinokija hałasy prychilnikaŭ ćviordaha paradku:
«Miarkujučy pa kamientarach, u krainie ładu nikoli nie budzie».
Ciapier čytajuć
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma10
Kamientary