Što viadoma pra chakiejnaha sudździu, zatrymanaha pa padazreńni ŭ zabojstvie ciažarnaj minčanki

Haŭrylonak sapraŭdy prafiesijny chakieist, ale ŭ minułym, raskazvaje «Trybuna». Hulaŭ da 28 hadoŭ, dziejničaŭ na pazicyi abaroncy, pryčym davoli žorstka — u dvuch siezonach kolkaść štrafnoha času pieravaliła sto chvilin.

Karjera prajšła ŭ ekstralizie — minskaje «Dynama», «Kieramin» i «Brest». Hałoŭnaje dasiahnieńnie — Kubak Biełarusi ŭ siezonie-2006/07 z dynamaŭcami. Praŭda, Haŭrylonak u tym turniry pravioŭ tolki adnu hulniu.

Haŭrylonak moh hulać u adnoj kamandzie ź Dźmitryjem Baskavym. Haŭrylonak vystupaŭ za «Brest» z 2008 da 2015 hoda, a Baskaŭ viartaŭsia tudy na siezon 2008/2009.

Pavialičyć

Taksama Haŭrylonak vystupaŭ za moładzievyja zbornyja Biełarusi. U składzie U-20 źjeździŭ na čempijanat śvietu-2007. Tam pravioŭ šeść matčaŭ pry pakazčyku karysnaści «-2». Pa vynikach turniru Biełaruś pakinuła elitny dyvizijon.

U lipieni 2015‑ha Haŭrylonak skasavaŭ kantrakt z «Brestam» pa zhodzie bakoŭ i bolš prafiesijna nie hulaŭ. Adnak z chakiejem nie skončyŭ — staŭ arbitram. Haŭrylonak u asnoŭnym absłuhoŭvaŭ matčy čempijanatu Biełarusi. U sudziejskija skandały nie traplaŭ, publičnaj krytyki ad sudździaŭ i hulcoŭ u jaho bok nie było.

Samy surjozny matč u karjery adpracavaŭ u sakaviku 2019-ha. Tady jaho pastavili druhim hałoŭnym refiery razam z Uładzimiram Nalivajkam na druhuju hulniu paŭfinalnaj sieryi płej-of pamiž «Niomanam» i «Šachcioram» (2:5).

U ekstralizie-2026/27 papracavać nie paśpieŭ — turnir startavaŭ 9 vieraśnia, na nastupny dzień paśla zabojstva. Zatoje Kubak krainy hetym letam začapiŭ. 10 žniŭnia ŭ Baranavičach sudziŭ sustreču miascovaha «Avijatara» i «Šachciora» — heta pakul apošniaja darosłaja hulnia, na jakoj jon pracavaŭ.

U 2020‑m Haŭrylonak vychodziŭ jak hulec za zbornuju Minskaj vobłaści ŭ matčy suprać kamandy Alaksandra Łukašenki. Čakana, pieramahła kamanda Łukašenki.

Paśla hetaha Haŭrylonak pracavaŭ na matčach, dzie hulała kamanda Łukašenki, jak sudździa. Apošni raz ź jej pierasieksia 14 lutaha hetaha hoda — ničyja sa zbornaj Minskaj vobłaści 5:5 biez udziełu samoha Łukašenki.

Baćka eks-chakieista, Alaksandr Haŭrylonak, u minułym viadomy bramnik. Abaraniaŭ varoty minskaha «Dynama» i «Civali», čatyry razy braŭ zołata čempijanatu Biełarusi. Maje 17 matčaŭ za zbornuju Biełarusi, dzie kankuryravaŭ z Andrejem Miezinym, Alaksandram Šumidubam i Leanidam Facikavym. Pravioŭ dźvie hulni na čempijanacie śvietu — 1998.

Skončyŭšy hulać paśla siezona 2002/03, Haŭrylonak-starejšy staŭ trenieram. Pracavaŭ u sistemie minskaha «Dynama», moładzievych zbornych Biełarusi i zbornaj Estonii. Z 2009‑ha da 2015‑ha ŭznačalvaŭ «Brest», dzie ŭ abaronie vystupali jaho syny Alaksiej i Mikałaj. Pieršy skončyŭ karjeru jakraz u hetaj kamandzie, kali baćka pakinuŭ pasadu.

U minułym siezonie Alaksandr Haŭrylonak treniravaŭ moładzievyja kamandy «Pinskich jastrabaŭ». Jaho starejšy syn — Mikałaj — da «Bresta» hulaŭ u abaronie minskaha «Dynama» (u 2006‑m uziaŭ srebra ekstralihi) i «Niomana». Zakončyŭ karjeru ŭ Žłobinie.

Pra zabojstva žančyny stała viadoma 11 vieraśnia. Jaje šukali z 8 vieraśnia. Paviedamleńnie pra źniknieńnie Taćciany Marciščanki pastupiła ŭ milicyju ad jaje dački praz dva dni paśla zabojstva. Na praciahu sutak padazravanaha zatrymali. U dačynieńni da jaho zaviali kryminalnuju spravu.

Pavialičyć

• 0
• 0
• 0
• 0
• 0
• 0
• 0
• 0