Na Minskim paŭmarafonie pamior 50‑hadovy biahun. Voś što viadoma pra Alaksieja Dašynieviča
Spartsmienu stała drenna paśla taho, jak jon prabieh 12 kiłamietraŭ.
Jak raspaviadajuć śviedki, adbyłasia biada niedaloka ad Pałacu Respubliki — pobač z punktam, dzie razdavali vadu. Alaksiej Dašynievič prosta ruchnuŭ na asfalt. Niekalki inšych udzielnikaŭ paŭmarafonu adrazu padbiehli da mužčyny i pačali samastojna jaho reanimavać.
Apieratyŭna vyklikali chutkuju dapamohu. Nieabyjakavyja biehuny rabili niepramy masaž serca kala 7‑8 chvilin da prybyćcia miedykaŭ. U toj momant Alaksiej byŭ jašče žyvy. Kali mužčynu pieranieśli ŭ karetu chutkaj dapamohi, jon mieŭ puls. Spartoŭcy, jakija jamu dapamahali, da apošniaha byli ŭpeŭnienyja, što zmahli vyratavać jamu žyćcio.
Znajomyja Alaksieja kažuć, što pierad startam jon adčuvaŭ siabie dobra, i jak minimum pieršy kiłamietr trasy vyhladaŭ badziora.
Na sajcie Minskaha paŭmarafonu paznačana, što mužčyna pad numaram 2292 paśpieŭ prabiehčy 12,1 kiłamietra za 1 hadzinu 7 chvilin i 28 siekund.
Dla mužčyny heta byŭ nie pieršy zabieh, jon šmat treniravaŭsia, biehaŭ vialikija dystancyi. Uvohule, Alaksiej vioŭ zdarovy ład žyćcia, nie piŭ, nie kuryŭ.
Alaksiej Dašynievič byŭ inžynieram. Jon pracavaŭ u kampanii «Armad», a pierad tym byŭ dyrektaram staličnaha ŽES №119.
Žonka Alaksieja daviedałasia žudasnuju navinu tolki tady, kali paśla šmathadzinnych biespaśpiachovych pošukaŭ muža źviarnułasia ŭ milicyju.
Na žal, takija vypadki na spartyŭnych mierapryjemstvach zdarajucca rehularna. Navat učora byli inšyja vypadki, kali biehunam spatrebiłasia dapamoha miedykaŭ. A ŭ 2019 hodzie na ekamarafonie ŭ Homieli pamior 43‑hadovy pijanist i adzin z zasnavalnikaŭ futbolnaha kłuba «Krumkačy» Juryj Blinoŭ. Jon taksama byŭ daśviedčanym spartsmienam, biehaŭ vialikija dystancyi — ale ŭ rakavy dzień nie zmoh dabiehčy da finišu litaralna piać mietraŭ.
Ciapier čytajuć
Deputatka, jakaja rychtuje pryhažuń dla Łukašenki, vyjšła zamuž14
Kamientary