На Мінскім паўмарафоне памёр 50‑гадовы бягун. Вось што вядома пра Аляксея Дашыневіча
Спартсмену стала дрэнна пасля таго, як ён прабег 12 кіламетраў.
Як распавядаюць сведкі, адбылася бяда недалёка ад Палацу Рэспублікі — побач з пунктам, дзе раздавалі ваду. Аляксей Дашыневіч проста рухнуў на асфальт. Некалькі іншых удзельнікаў паўмарафону адразу падбеглі да мужчыны і пачалі самастойна яго рэанімаваць.
Аператыўна выклікалі хуткую дапамогу. Неабыякавыя бегуны рабілі непрамы масаж сэрца каля 7‑8 хвілін да прыбыцця медыкаў. У той момант Аляксей быў яшчэ жывы. Калі мужчыну перанеслі ў карэту хуткай дапамогі, ён меў пульс. Спартоўцы, якія яму дапамагалі, да апошняга былі ўпэўненыя, што змаглі выратаваць яму жыццё.
Знаёмыя Аляксея кажуць, што перад стартам ён адчуваў сябе добра, і як мінімум першы кіламетр трасы выглядаў бадзёра.
На сайце Мінскага паўмарафону пазначана, што мужчына пад нумарам 2292 паспеў прабегчы 12,1 кіламетра за 1 гадзіну 7 хвілін і 28 секунд.
Для мужчыны гэта быў не першы забег, ён шмат трэніраваўся, бегаў вялікія дыстанцыі. Увогуле, Аляксей вёў здаровы лад жыцця, не піў, не курыў.
Аляксей Дашыневіч быў інжынерам. Ён працаваў у кампаніі «Армад», а перад тым быў дырэктарам сталічнага ЖЭС №119.
Жонка Аляксея даведалася жудасную навіну толькі тады, калі пасля шматгадзінных беспаспяховых пошукаў мужа звярнулася ў міліцыю.
На жаль, такія выпадкі на спартыўных мерапрыемствах здараюцца рэгулярна. Нават учора былі іншыя выпадкі, калі бегунам спатрэбілася дапамога медыкаў. А ў 2019 годзе на экамарафоне ў Гомелі памёр 43‑гадовы піяніст і адзін з заснавальнікаў футбольнага клуба «Крумкачы» Юрый Бліноў. Ён таксама быў дасведчаным спартсменам, бегаў вялікія дыстанцыі — але ў ракавы дзень не змог дабегчы да фінішу літаральна пяць метраў.
Цяпер чытаюць
На Мінскім паўмарафоне памёр 50‑гадовы бягун. Вось што вядома пра Аляксея Дашыневіча2
Каментары