Jak «razumnyja televizary» sočać za hledačami — vyniki novaha rasśledavańnia

U centry rasśledavańnia, jakoje praviali aŭtary YouTube-kanała Gamers Nexus supolna z Level1Techs i dvuma śpiecyjalistami pa biaśpiecy, apynulisia razumnyja televizary LG. Na jaho vyniki źviartaje ŭvahu The Times.

Jak piša vydańnie, daśledčyki vyjavili, što televizary LG mohuć zapisvać huk u pakoi navat u režymie čakańnia abo kali ekran vyklučany.

Adklučeńnie televizara ad internetu, pavodle rasśledavańnia, taksama nie spyniaje zboru aŭdyja. Fajły mohuć zachoŭvacca ŭ pamiaci pryłady, a paśla adnaŭleńnia złučeńnia adpraŭlacca.

Padčas testaŭ daśledčyki vyjavili jašče adnu asablivaść. Paśla hałasavoj kamandy «akno» raspaznavańnia hołasu zastavałasia adkrytym jašče prykładna 10‑15 siekund. U hety čas televizar praciahvaŭ raspaznavać havorku ŭ pakoi, a jaje transkrypcyja mahła zachoŭvacca ŭ pamiaci pryłady.

LG hetyja vysnovy admaŭlaje. U kampanii zajavili, što televizary apracoŭvajuć hałasavyja źviestki tolki tady, kali karystalnik naciskaje i ŭtrymlivaje knopku hałasavoha kiravańnia na pulcie abo kali paśla aktyvacyi adpaviednaj funkcyi pryłada raspaznaje frazu «Vitaju, LG» («Hi LG»). Pa-za hetymi vypadkami, śćviardžaje vytvorca, televizary nie źbirajuć i nie zapisvajuć fonavych razmoŭ.

Televizar viedaje, što mienavita vy hledzicie

Aŭdyja — tolki častka infarmacyi, jakuju zdolny źbirać sučasny Smart TV. U asnovie ekasistemy razumnych televizaraŭ LG lažyć technałohija aŭtamatyčnaha raspaznavańnia kantentu — Automatic Content Recognition (ACR). Padobnyja sistemy vykarystoŭvaje bolšaść bujnych vytvorcaŭ Smart TV.

ACR fiksuje nievialikija frahmienty aŭdyja i videa i paraŭnoŭvaje ich ź vialikimi bazami miedyjakantentu. Tak sistema moža vyznačyć, što mienavita pakazvajecca na ekranie abo hučyć praz dynamiki, — ad stryminhavych servisaŭ i efirnaha telebačańnia da kantentu z padklučanych pryład.

Heta dazvalaje adsočvać zvyčki hledača i vykarystoŭvać atrymanyja źviestki dla piersanalizacyi kantentu i rekłamy.

Smartfony, hadzińniki i Wi-Fi

Adnak daśledčyki śćviardžajuć, što zbor infarmacyi nie abmiažoŭvajecca tym, što adbyvajecca na ekranie televizara. Padčas testaŭ pryłady skanavali łakalnuju sietku i vyjaŭlali inšaje abstalavańnie. Naprykład, smartfony i razumnyja hadzińniki. Taksama źbiralisia źviestki pra Wi-Fi-sietki pablizu.

Takija danyja patencyjna dazvalajuć atrymać bolš padrabiaznaje ŭjaŭleńnie nie tolki pra toje, što hladziać pa televizary, ale i pra toje, jakija pryłady znachodziacca pobač.

LG nie admaŭlaje, što jaje televizary mohuć skanavać łakalnuju sietku, adnak tłumačyć heta standartnymi funkcyjami Smart TV, nieabchodnymi dla pošuku, padklučeńnia i ŭzajemadziejańnia ź inšymi pryładami.

Maštab takoj ekasistemy vialiki. Pavodle źviestak z veb-sajta LG, technałohija ACR vykarystoŭvajecca na 49 miljonach razumnych televizaraŭ u ZŠA i amal na 216 miljonach va ŭsim śviecie. Jana taksama daje LG dostup da prykładna 363 miljonaŭ druhasnych pryład, takich jak smartfony, padłučanyja da toj ža sietki Wi-Fi.

Prablema nie tolki ŭ LG

Technałohija ACR nie źjaŭlajecca vynachodstvam abo asablivaściu LG. Jaje vykarystoŭvajuć i inšyja vytvorcy razumnych televizaraŭ dla raspaznavańnia kantentu i zboru infarmacyi pra prahlady.

Tamu ekśpierty papiaredžvajuć, što pytańni, jakija ŭźnikli paśla rasśledavańnia, mohuć datyčyć usioj industryi Smart TV.

Siońnia kupić sučasny televizar biez padklučeńnia da internetu i «razumnych» funkcyj stanovicca ŭsio składaniej. A heta aznačaje, što razam z ekranam čałaviek faktyčna prynosić dadomu jašče adzin padklučany da sietki kampjutar z dostupam da łakalnaj sietki, a ŭ niekatorych madelach taksama ź mikrafonam i kamieraj.

LG: karystalniki sami dajuć zhodu

U LG padkreślivajuć, što funkcyja ACR pracuje na asnovie zhody karystalnika i pryznačana dla piersanalizavanych rekamiendacyj, servisaŭ i rekłamy. Kali ŭładalnik televizara nie prymaje adpaviednaha dadatkovaha pahadnieńnia, śćviardžaje kampanija, danyja ACR nie vykarystoŭvajucca ŭ rekłamnych metach.

Adnak pahadnieńni, ź jakimi prapanujuć aznajomicca ŭładalnikam televizaraŭ LG, davoli abjomnyja. Pavodle The Times, razam jany naličvajuć kala 50 tysiač słoŭ. Siaredniamu darosłamu čałavieku spatrebiłasia b prykładna try-čatyry hadziny, kab pračytać ich całkam.

U vyniku karystalnik moža farmalna pahadzicca na apracoŭku danych, nie abaviazkova razumiejučy ŭvieś abjom infarmacyi, jakuju dazvalaje źbirać televizaru.

Jak abmiežavać zbor danych u smart-televizarach

Adnu z asnoŭnych sistem zboru infarmacyi pra prahlady, ACR, na televizarach LG možna adklučyć. Adpaviednaja funkcyja nazyvajecca Live Plus.

Jaje možna znajści ŭ mieniu:

Settings → General → System → Advanced Settings → Live Plus.

Adnak adklučeńnie Live Plus abmiažoŭvaje tolki aŭtamatyčnaje raspaznavańnie i zbor danych pra kantent. Inšyja sietkavyja i hałasavyja funkcyi televizara pry hetym zastajucca aktyŭnyja.

• 0
• 0
• 0
• 1
• 2
• 0
• 6
• 1