«Jandeks Braŭzier» analizuje navat asabistyja paviedamleńni. Voś jakija źviestki źbirajuć braŭziery i čamu heta važna

Ekśpierty Surfshark praanalizavali palityki pryvatnaści 15 papularnych mabilnych braŭzieraŭ u Google Play Store.

U trojku hałoŭnych antylidaraŭ pa zbory danych uvajšli «Jandeks Braŭzier» (źbiraje 25 typaŭ danych z 38 mahčymych), Microsoft Edge (20) i Google Chrome (19). Jany adsočvajuć historyju pošuku, łakacyju, finansavuju infarmacyju, fota i navat aŭdyja.

Jandeks adznačyŭsia tym, što źbiraje paviedamleńni ŭnutry braŭziera, choć kampanija śćviardžaje, što havorka idzie vyklučna pra čaty sa słužbaj padtrymki. U Biełarusi dola «Jandeks Braŭziera» — kala 15%.

Na inšym baku znachodziacca małapapularnyja braŭziery, aryjentavanyja na pryvatnaść karystalnikaŭ. Pavodle infarmacyi z Play Store, Brave, Tor i Mi Browser naohuł nie źbirajuć danych karystalnikaŭ. DuckDuckGo, Samsung Internet i Ecosia źbirajuć minimalnuju kolkaść infarmacyi, naprykład, tolki danyja pra ŭzajemadziejańnie z prahramaj abo spravazdačy pra zboi.

Ale źbirać danyja — heta tolki pałova biady, bo niekatoryja braŭziery jašče i pieradajuć ich trecim asobam dla analityki i tarhietavanaj rekłamy. Naprykład, Microsoft Edge dzielicca dakładnym i prykładnym miescaznachodžańniem karystalnika, a Yandex pieradaje płaciežnuju infarmacyju. U śpis tych, chto dzielicca vašymi danymi, taksama patrapili Phoenix, Opera i Aloha.

Jak heta ŭpłyvaje na zvyčajnych karystalnikaŭ? Kali vy dajacie zhodu na zbor danych, vy de-fakta hublajecie kantrol nad ułasnym ličbavym žyćciom. Vašy štodzionnyja zvyčki mohuć vydać nadzvyčaj adčuvalnuju infarmacyju: schavanyja prablemy sa zdaroŭjem, finansavy stan, palityčnyja pohlady ci navat asabistyja ciažkaści.

Na asnovie hetaha masivu karparacyi stvarajuć padrabiazny ličbavy profil, kab pradkazvać vašyja pavodziny. Heta dazvalaje im naŭprost manipulavać vami: naprykład, pakazvać roznyja ceny na adny i tyja ž tavary ŭ zaležnaści ad vašaha profilu, albo prapanoŭvać śpiecyfičny kantent, jaki moža paŭpłyvać na vašyja rašeńni i mierkavańni.

Akramia psichałahičnaha i finansavaha ŭździejańnia, bieskantrolny abmien asabistymi danymi niasie i pramyja pahrozy vašaj biaśpiecy. Kali kampanija, jakaja zachoŭvaje vaš «ličbavy partret», sutykniecca z chakierskaj atakaj, vašy sakrety stanuć zdabytkam złačyncaŭ. Zhodna sa spravazdačaj IBM, mienavita asabistyja danyja karystalnikaŭ byli samym častym typam infarmacyi, jakaja traplała ŭ sietku padčas uciečak u 2025 hodzie.

Novyja «razumnyja» braŭziery z ubudavanym štučnym intelektam, jakija ciapier nabirajuć papularnaść, naprykład, Perplexity's Comet ci prahrama čat-bota ChatGPT, nie vyrašajuć prablemu pryvatnaści. Jany źbirajuć historyi prahladu staronak i dakładnuju łakacyju, a taksama dzielacca identyfikatarami pryład z trecimi asobami.

Kab abaranić siabie i minimizavać ličbavy śled, ekśpierty rajać kardynalna pierahledzieć svaje zvyčki: davajcie braŭzieram minimum nieabchodnaj infarmacyi i rehularna praviarajcie dazvoły prahram u naładach telefona. Adklučajcie dostup da hieałakacyi, mikrafona, kamiery i kantaktaŭ, kali heta nie źjaŭlajecca krytyčna važnym dla pracy. Taksama jany rajać karystacca ŭnikalnymi parolami, uklučać dvuchfaktarnuju aŭtentyfikacyju (2FA) i nie zabyvać svoječasova abnaŭlać braŭzier.

• 6
• 0
• 1
• 1
• 1
• 0
• 9
• 0