Heta moža vyznačyć budučyniu internet-pakupak. Sprava Amazon suprać zasnavanaha biełarusam Perplexity
Technałahičny hihant Amazon treci miesiac vajuje sa startapam Perplexity AI. Heta nie prosta jurydyčnaja sprečka, a bitva za toje, chto budzie kantralavać našy pakupki — my sami, rekłamnyja ałharytmy ci štučny intelekt.
Kanflikt pačaŭsia ŭ listapadzie 2025 hoda, kali Amazon abvinavaciŭ Perplexity u machlarstvie i parušeńni biaśpieki. Pryčynaj staŭ pamočnik u braŭziery ad Perplexity, Comet, jaki moža samastojna afarmlać zamovy na sajtach, imitujučy pavodziny čałavieka. Amazon ličyć, što Comet maskiruje aŭtamatyzavany dostup pad dziejnaść realnych karystalnikaŭ, što supiarečyć praviłam płatformy.
Jurysty Perplexity ŭ adkaz zajaŭlajuć, što sapraŭdnaja pryčyna hnievu Amazon — strach stracić prybytki ad rekłamy. Jany trapna zaŭvažajuć, što ŭ ŠI-ahientaŭ niama vačej, kab bačyć naviaźlivuju rekłamu, jakoj Amazon litaralna bambardziruje svaich naviedvalnikaŭ.
Comet pracuje tak — analizuje ŭsie dastupnyja prapanovy i abiraje najbolš vyhadnuju dla karystalnika. Jon ihnaruje prapłačanyja rekamiendacyi i proma-akcyi, što stavić pad pahrozu rekłamnuju madel najbujniejšaha rytejlera śvietu.
Amazon nastojvaje, što abaraniaje intaresy svaich karystalnikaŭ. Kampanija śćviardžaje, što praz Comet ludzi mohuć prapuścić bolš tannyja prapanovy, chutkuju dastaŭku ci sapraŭdy karysnyja parady ad servisu. Pry hetym Amazon nie admaŭlajecca ad štučnaha intelektu: jany supracoŭničajuć z OpenAI i raźvivajuć ułasnaha bota Rufus. Ale chočuć, kab hety praces zastavaŭsia pad ich kantrolem.
Ciapier sud pavinien vyrašyć, ci majuć mašyny prava karystacca internetam ad imia ludziej, kali ŭładalniki sajtaŭ suprać hetaha.
Vynik hetaj spravy moža źmianić ekanamičnuju madel usiaho internetu. Imavierna, nieŭzabavie navat źjavicca rekłama, dapasavanaja pad ałharytmy štučnaha intelektu, dzie brendy buduć sprabavać pierakanać ałharytmy štučnaha intelektu, kab tyja abirali mienavita ich tavary.
Taksama padobna, što z raźvićciom ŠI rola čałavieka-pakupnika budzie źviedzienaja da minimumu — mašyny buduć vyrašać za nas, dzie i što vyhadniej kupić.
Adzin z zasnavalnikaŭ Perplexity AI — biełarus Dzianis Jarac. Jon zajmaje pasadu techničnaha dyrektara (CTO). Dzianis — vypusknik BDU, jaki pierad zapuskam Perplexity zrabiŭ karjeru ŭ suśvietnych technałahičnych hihantach, u tym liku pracavaŭ daśledčykam u AI-padraździaleńni Facebook (Meta).
«Naša Niva» — bastyjon biełaruščyny
PADTRYMAĆCiapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5959
Kamientary