Гэта можа вызначыць будучыню інтэрнэт-пакупак. Справа Amazon супраць заснаванага беларусам Perplexity
Тэхналагічны гігант Amazon трэці месяц ваюе са стартапам Perplexity AI. Гэта не проста юрыдычная спрэчка, а бітва за тое, хто будзе кантраляваць нашы пакупкі — мы самі, рэкламныя алгарытмы ці штучны інтэлект.
Канфлікт пачаўся ў лістападзе 2025 года, калі Amazon абвінаваціў Perplexity у махлярстве і парушэнні бяспекі. Прычынай стаў памочнік у браўзеры ад Perplexity, Comet, які можа самастойна афармляць замовы на сайтах, імітуючы паводзіны чалавека. Amazon лічыць, што Comet маскіруе аўтаматызаваны доступ пад дзейнасць рэальных карыстальнікаў, што супярэчыць правілам платформы.
Юрысты Perplexity ў адказ заяўляюць, што сапраўдная прычына гневу Amazon — страх страціць прыбыткі ад рэкламы. Яны трапна заўважаюць, што ў ШІ-агентаў няма вачэй, каб бачыць навязлівую рэкламу, якой Amazon літаральна бамбардзіруе сваіх наведвальнікаў.
Comet працуе так — аналізуе ўсе даступныя прапановы і абірае найбольш выгадную для карыстальніка. Ён ігнаруе праплачаныя рэкамендацыі і прома-акцыі, што ставіць пад пагрозу рэкламную мадэль найбуйнейшага рытэйлера свету.
Amazon настойвае, што абараняе інтарэсы сваіх карыстальнікаў. Кампанія сцвярджае, што праз Comet людзі могуць прапусціць больш танныя прапановы, хуткую дастаўку ці сапраўды карысныя парады ад сэрвісу. Пры гэтым Amazon не адмаўляецца ад штучнага інтэлекту: яны супрацоўнічаюць з OpenAI і развіваюць уласнага бота Rufus. Але хочуць, каб гэты працэс заставаўся пад іх кантролем.
Цяпер суд павінен вырашыць, ці маюць машыны права карыстацца інтэрнэтам ад імя людзей, калі ўладальнікі сайтаў супраць гэтага.
Вынік гэтай справы можа змяніць эканамічную мадэль усяго інтэрнэту. Імаверна, неўзабаве нават з'явіцца рэклама, дапасаваная пад алгарытмы штучнага інтэлекту, дзе брэнды будуць спрабаваць пераканаць алгарытмы штучнага інтэлекту, каб тыя абіралі менавіта іх тавары.
Таксама падобна, што з развіццём ШІ роля чалавека-пакупніка будзе зведзеная да мінімуму — машыны будуць вырашаць за нас, дзе і што выгадней купіць.
Адзін з заснавальнікаў Perplexity AI — беларус Дзяніс Ярац. Ён займае пасаду тэхнічнага дырэктара (CTO). Дзяніс — выпускнік БДУ, які перад запускам Perplexity зрабіў кар'еру ў сусветных тэхналагічных гігантах, у тым ліку працаваў даследчыкам у AI-падраздзяленні Facebook (Meta).
«Наша Нiва» — бастыён беларушчыны
ПАДТРЫМАЦЬЦяпер чытаюць
У Чэхіі малады беларус трапіў у кому — наглытаўся таблетак праз праблемы з легалізацыяй і разрыў з дзяўчынай23
Каментары