Што цяпер з італьянскімі візамі? Масавыя адмовы? Турфірмы называюць альтэрнатыву
Складанасці з італьянскімі візамі пачаліся пасля таго, як стала вядома, што падазраваны ў дыверсіі ў аэрапорце Лейпцыга грамадзянін Расіі атрымаў італьянскую візу ў пасольстве ў Мінску. Раней Італія лічылася адной з самых спрыяльных краін па выдачы шматразовых доўгатэрміновых віз беларусам. Пацікавіліся, што цяпер.
Пра шматразовыя італьянскія візы можна забыць?
Сітуацыя змянілася. Па-першае, рэгістрацыя ў ліст чакання VFS з 15 верасня прыпыненая. Пры гэтым тых, хто раней быў зарэгістраваны ў спісе чакання, працягнуць абслугоўваць. А гэта дзясяткі тысяч чалавек.
Па-другое, новыя заявы прымаюць толькі ад турфірмаў. Пры гэтым, як кажуць самі тураператары, цяпер доўгатэрміновая італьянская віза — гэта хутчэй выключэнне.
Маўляў, можна атрымаць як на месяц, так і толькі пад паездку. Радзей даюць на паўгода — такую інфармацыю агучылі ў адной з турфірмаў.
У іншай кажуць, што новы консул пакуль не асабліва прадказальны, таму раяць не разлічваць на атрыманне візы на 1‑3 гады, як гэта было раней.
Гэта не азначае, што Італія больш зусім не дае шматразовыя турыстычныя візы. Проста колькасць такіх кратна меншая ў параўнанні з тым, што было яшчэ нядаўна, патлумачылі сітуацыю яшчэ ў адным турагенцтве.
Якія ёсць альтэрнатывы?
Літаральна ва ўсіх візавых агенцтвах, куды «Наша Ніва» звярталася пад выглядам кліента, ахвотным атрымаць візу замест Італіі прапануюць Іспанію.
Гэта паўднёваеўрапейская краіна па-ранейшаму добра выдае візы для індывідуальнага турызму.
Што да адмоўных рашэнняў па іспанскіх візах, то памагатары называюць ад 1% да 3%.
Пры гэтым тэрміны атрымання візы даволі вялікія. На сам запіс сыходзіць ад двух тыдняў да двух-трох месяцаў. У дадатак ідзе яшчэ 45 дзён на разгляд заявы пасля падачы.
Але ёсць варыянт паскорыць працэс, праўда, для гэтага давядзецца ехаць у Маскву. Разам з трансферам з Мінска адна з кампаній бярэ за свае пасрэдніцкія паслугі 750 рублёў. Плюс яшчэ каля 100 еўра трэба будзе заплаціць за візу і іншыя выдаткі ўжо ў Маскве. Таму калі дабірацца ў Іспанію праз Маскву, то візу атрымаць можна на 20 дзён хутчэй, чым на месцы ў Беларусі.
І нягледзячы на тое, што тэрміны выглядаюць далёка не ідэальнымі, памагатары называюць Іспанію адным з самых хуткіх варыянтаў для атрымання візы.
Для тых, хто не хоча замарочвацца з верыфікацыяй і чаканнем пры падачы на Іспанію, ёсць VIP-пакеты, якія каштуюць па 1500—1700 рублёў за візу з чалавека пад ключ.
Пры гэтым, як прызнаюцца агенты, найбольш імаверна, што гэта будзе трохмесячная мультывіза. На больш працяглыя тэрміны могуць разлічваць тыя, хто ўжо меў іспанскую візу раней і можа даказаць, што сапраўды дабіраўся да Іспаніі.
Цяпер чытаюць
Бабарыка расказаў, як хадзіў у КДБ знаёміцца са справай свайго рэпрэсаванага дзеда, які мог быць расстраляны ў Курапатах5
Бабарыка расказаў, як хадзіў у КДБ знаёміцца са справай свайго рэпрэсаванага дзеда, які мог быць расстраляны ў Курапатах
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых1616
Каментары