Što ciapier ź italjanskimi vizami? Masavyja admovy? Turfirmy nazyvajuć alternatyvu

Pra šmatrazovyja italjanskija vizy možna zabyć?

Situacyja źmianiłasia. Pa-pieršaje, rehistracyja ŭ list čakańnia VFS z 15 vieraśnia prypynienaja. Pry hetym tych, chto raniej byŭ zarehistravany ŭ śpisie čakańnia, praciahnuć absłuhoŭvać. A heta dziasiatki tysiač čałaviek.

Pa-druhoje, novyja zajavy prymajuć tolki ad turfirmaŭ. Pry hetym, jak kažuć sami turapieratary, ciapier doŭhaterminovaja italjanskaja viza — heta chutčej vyklučeńnie.

Maŭlaŭ, možna atrymać jak na miesiac, tak i tolki pad pajezdku. Radziej dajuć na paŭhoda — takuju infarmacyju ahučyli ŭ adnoj z turfirmaŭ.

U inšaj kažuć, što novy konsuł pakul nie asabliva pradkazalny, tamu rajać nie raźličvać na atrymańnie vizy na 1‑3 hady, jak heta było raniej.

Heta nie aznačaje, što Italija bolš zusim nie daje šmatrazovyja turystyčnyja vizy. Prosta kolkaść takich kratna mienšaja ŭ paraŭnańni z tym, što było jašče niadaŭna, patłumačyli situacyju jašče ŭ adnym turahienctvie.

Jakija jość alternatyvy?

Litaralna va ŭsich vizavych ahienctvach, kudy «Naša Niva» źviartałasia pad vyhladam klijenta, achvotnym atrymać vizu zamiest Italii prapanujuć Ispaniju.

Heta paŭdniovajeŭrapiejskaja kraina pa-raniejšamu dobra vydaje vizy dla indyvidualnaha turyzmu.

Pavialičyć

Što da admoŭnych rašeńniaŭ pa ispanskich vizach, to pamahatary nazyvajuć ad 1% da 3%.

Pry hetym terminy atrymańnia vizy davoli vialikija. Na sam zapis sychodzić ad dvuch tydniaŭ da dvuch-troch miesiacaŭ. U dadatak idzie jašče 45 dzion na razhlad zajavy paśla padačy.

Ale jość varyjant paskoryć praces, praŭda, dla hetaha daviadziecca jechać u Maskvu. Razam z tranśfieram ź Minska adna z kampanij biare za svaje pasrednickija pasłuhi 750 rubloŭ. Plus jašče kala 100 jeŭra treba budzie zapłacić za vizu i inšyja vydatki ŭžo ŭ Maskvie. Tamu kali dabiracca ŭ Ispaniju praz Maskvu, to vizu atrymać možna na 20 dzion chutčej, čym na miescy ŭ Biełarusi.

I niahledziačy na toje, što terminy vyhladajuć daloka nie idealnymi, pamahatary nazyvajuć Ispaniju adnym z samych chutkich varyjantaŭ dla atrymańnia vizy.

Dla tych, chto nie choča zamaročvacca ź vieryfikacyjaj i čakańniem pry padačy na Ispaniju, jość VIP-pakiety, jakija kaštujuć pa 1500—1700 rubloŭ za vizu z čałavieka pad kluč.

Pry hetym, jak pryznajucca ahienty, najbolš imavierna, što heta budzie trochmiesiačnaja multyviza. Na bolš praciahłyja terminy mohuć raźličvać tyja, chto ŭžo mieŭ ispanskuju vizu raniej i moža dakazać, što sapraŭdy dabiraŭsia da Ispanii.

• 0
• 0
• 0
• 0
• 0
• 0
• 0
• 0