Hałoŭnaja pryčyna ŭ roście cen na naftu paśla pačatku vajny ZŠA i Izraila ź Iranam.
U pieršym paŭhodździ 2026 hoda dola aŭtamabilaŭ ź bienzinavym ruchavikom (biez hibrydaŭ) upieršyniu apuściłasia nižej za 50% suśvietnych prodažaŭ novych mašyn i skłała 49%. Za hod prodažy takich aŭto skaracilisia na 10% — da 20,25 młn. Jašče ŭ 2021 hodzie ich dola była 73%, piša Nikkei.
Hałoŭnaja pryčyna ŭ roście cen na naftu paśla pačatku vajny ZŠA i Izraila ź Iranam: bienzin padaražeŭ, źjavilisia aściarohi nakont pastavak paliva. U Kitai prodažy bienzinavych aŭto ŭpali na 26%, u Jeŭropie na 13%.
Bolš za ŭsio ad hetaha vyjhrali elektramabili, bo ich tańniej utrymlivać. Ich prodažy vyraśli na 12%, da 6,87 młn, a dola dasiahnuła 17%.
Pa rehijonach karcina roznaja. U Kitai, dzie pradajecca pałova ŭsich elektramabilaŭ, prodažy źnizilisia na 3% paśla skaračeńnia padatkovych ilhot. U Paŭnočnaj Amierycy jany ŭpali na 15% paśla admieny subsidyj administracyjaj Trampa. Zatoje ŭ Jeŭropie rost skłaŭ 32%, i tam elektramabili ŭpieršyniu za paŭhodździe abahnali bienzinavyja.
U Paŭdniova-Uschodniaj Azii prodažy vyraśli na 81%, u Akijanii bolš čym udvaja.
Kitajskija vytvorcy, takija jak BYD i Geely, zajmajuć kala 60% suśvietnaha rynku elektramabilaŭ i płahin-hibrydaŭ. Na rynkach pa-za ZŠA, Jeŭropaj i Kitajem bolš za pałovu takich mašyn impartujecca z Kitaja.
Pavodle prahnozu Mobility Global, da 2030 hoda elektramabili buduć składać bolš za 30% vytvorčaści i stanuć daminantnym typam siłavoj ustanoŭki. Analityki adznačajuć, što tempy pierachodu mocna zaležać ad dziaržaŭnaj palityki. Adnak pakupniki elektramabilaŭ redka viartajucca da bienzinavych mašyn, a pa miery źnižeńnia cen popyt budzie raści i biez subsidyj.
Ciapier čytajuć
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła20
Kamientary
To jesť proizvoditieli vynuždajut pokupatielej pieriepłačivať za hibridnuju ustanovku, pri etom DVS v avtomobile ostajotsia.