Brytaniec amal hod pravioŭ u akijanie biez vychadu na sušu, pierapłyŭšy na łodcy Cichi i Indyjski akijany
Były karaleŭski marski piechaciniec Dejv «Dynhier» Beł z anhlijskaha hrafstva Dorset zaviaršyŭ adzinočnaje viesłavańnie praź Cichi i Indyjski akijany. Jon pravioŭ u mory 327 dzion i ŭvieś hety čas nie stupaŭ na sušu, piša Bi-bi-si.
Beł adpraviŭsia ŭ padarožža z zachodniaha ŭźbiarežža Pieru 9 listapada minułaha hoda. Na jaho łodcy z vuhlarodnaha vałakna było zahružana zapasaŭ ježy i abstalavańnia na 350 dzion. Finišavaŭ jon u Kilifi na poŭnač ad Mambasy ŭ Kienii, dzie syšoŭ na bierah 28 vieraśnia 2026 hoda ŭ 12:15 pa biełaruskim časie. Za čas padarožža jon prajšoŭ na viosłach bolš za 15 tysiač marskich mil, abo kala 28 tysiač kiłamietraŭ.
Svaju ekśpiedycyju Beł vykarystaŭ taksama dla zboru srodkaŭ na Rock2Recovery — dabračynnuju arhanizacyju, jakaja dapamahaje vieteranam i supracoŭnikam ekstrannych słužbaŭ, što pakutujuć ad posttraŭmatyčnaha stresavaha razładu. Na hety momant jamu ŭdałosia sabrać bolš za 110 tysiač funtaŭ sterlinhaŭ.
Kali Beł vyjšaŭ na bierah, jon nachiliŭsia i dakranuŭsia da piasku, a zatym pry padtrymcy svajoj partniorki Džordžy niaŭpeŭniena pajšoŭ pa plažy. Tam jamu pieradali piva. Sam padarožnik pryznaŭsia, što apošni tydzień byŭ dla jaho niezvyčajnym, a momant, kali jon upieršyniu za amal 11 miesiacaŭ dakranuŭsia da ziamli, staŭ vielmi mocnym pieražyvańniem.
Beł prybyŭ raniej, čym raźličvaŭ, i tamu na łodcy ŭ jaho jašče zastavałasia ježy prykładna na 20 dzion. Za čas padarožža jon nieadnojčy sustrakaŭ dzikuju pryrodu. Pavodle jaho słoŭ, niekalki tydniaŭ za łodkaj płyli dźvie biełapioryja akuły — pa adnoj z kožnaha boku.
Pierad vysadkaj Beł kazaŭ, što viartańnie na sušu moža vyklikać u jaho sapraŭdnuju sensarnuju pierahruzku. Jon płanavaŭ spačatku viarnucca ŭ hatel, pamycca, vyspacca i adpačyć, sustrecca ź ludźmi, jakija jaho čakali, a zatym znoŭ pryjści da łodki. Padarožnik razumieŭ, što paśla amal hoda ŭ mory jamu spatrebicca čas, kab znoŭ pryzvyčaicca chadzić pa ziamli.
U 2021 hodzie Beł užo pierasiok Atłantyčny akijan — ad Ńju-Jorka da Ńjulina ŭ anhlijskim hrafstvie Kornuał. Tady jon kazaŭ, što bolš nikoli nie budzie rabić ničoha padobnaha. Adnak raźvićcio technałohij, u tym liku źjaŭleńnie lahčejšych łodak, bolš efiektyŭnych soniečnych panelaŭ i aŭtapiłotaŭ, znoŭ abudziła ŭ im cikaŭnaść da taho, što jašče mahčyma ździejśnić.
Padčas płavańnia Beł słuchaŭ padkasty i aŭdyjaknihi, a taksama abmieńvaŭsia hałasavymi paviedamleńniami, kab nie zasiarodžvacca pastajanna na časie. Svajo rašeńnie adpravicca ŭ hetuju ekśpiedycyju jon tłumačyŭ mocnaj cikaŭnaściu. Pavodle jaho słoŭ, jamu pryjšła dumka, što takoje padarožža moža być realnym, i jon užo nie moh ad jaje admovicca.
Maršrut prachodziŭ na zachad praź Cichi akijan, Karałavaje mora, rajon Vialikaha Barjernaha ryfa, Toresavy praliŭ i ŭzdoŭž paŭnočnaha ŭźbiarežža Aŭstralii, paśla čaho Bieł pierasiok Indyjski akijan.
Adnym z samych ciažkich momantaŭ stała nieabchodnaść na vosiem tydniaŭ amal całkam spynić viesłavańnie ŭ paŭdniovaj častcy Cichaha akijana. Beł ruchaŭsia zanadta chutka i ryzykavaŭ trapić u Karałavym mory ŭ siezon cykłonaŭ, tamu jamu daviałosia naŭmysna zapavolicca. Pavodle jaho słoŭ, psichałahična było vielmi ciažka siadzieć pasiarod akijana, viedajučy, što napieradzie jašče siem, vosiem ci dzieviać miesiacaŭ padarožža, ale pry hetym nie mieć mahčymaści viesłavać.
Z dasiahnieńniem Bieła pavinšavali roznyja viadomyja ludzi, u tym liku televizijny padarožnik Džejsan Foks i były futbalist Hrem Sunes. Jany adznačali maštab ździejśnienaha im padarožža i jaho dabračynnuju metu.
«Na jakuju chaleru piacizorkavy hatel, kali ja mahu pastavić namiot na ŭźbiarežžy akijana?» Biełarus pieššu padarožničaje pa śviecie
Dzianis Dudzinski naviedaŭ 100 krain — raskazvaje, jakija ŭrazili jaho najbolš. Ale samuju žadanuju krainu jon trymaje na potym
Minimalnaja norma — 100 kiłamietraŭ u dzień: žychar Pinska abjechaŭ na rovary ŭsie rajony Biełarusi
Ciapier čytajuć
Bulba z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki1
Kamientary