Vital Artyst pryznaŭsia, što raźvioŭsia druhi raz

Śpiavak napisaŭ: «Raźvioŭsia druhim razam. Dziakuj za hety vialiki šlach pad Zorkami. Za ŭsio, što było. Dalej — ja, maja muzyka i šlach. Treba, kab 7 listapada ŭ Piciery i 8 listapada ŭ Maskvie sabralisia ŭsie svaje. Kosmasu pryvitańnie».

U kamientary Vitala Artysta pryjšoŭ padtrymać jaho baćka: «Synok, ty ŭvieś u mianie! Heta žyćcio, ničoha nie źmieniš».

Pieršaj abrańnicaj śpievaka była Taćciana Kušnier. Para paznajomiłasia ŭ 2002 hodzie. Taćciana tady była pierakładčycaj i nastaŭnicaj anhlijskaj movy — dapamahała Vitalu ź pierakładam piesień i vučyła jaho zamiežnaj movie. Ale pastupova ŭroki pierajšli ŭ kachańnie.

U tym šlubie naradziłasia dźvie dački — jany pieryjadyčna źjaŭlajucca ŭ instahramie taty.

U 2019 hodzie Vital narešcie pryznaŭsia presie, što raźvioŭsia. Tady ž jon vyrašyŭ raspuścić hurt. Svajo rašeńnie tłumačyŭ tak: «Heta imknieńnie mianie jak mastaka vyjści sa zvykłaj zony kamfortu i znoŭ adčuć siabie pačatkoŭcam. Na pieršy pohlad, łohiki ŭ maich dziejańniach nie tak mnoha. Navošta zakryvać hurt, kali jon daje cudoŭnyja kancerty, robić vydatnyja relizy, padabajecca ludziam i zapatrabavany? Ale hledziačy na ​​niekalki krokaŭ napierad, baču ŭ hetym azdaraŭlenčy praces, jaki pryviadzie da cikavych novych padziej».

Pra asabistaje žyćcio Artyst raspaviadaŭ sajtu ilinterviews. Kazaŭ, što raźvieścisia vyrašyŭ dziela novaj kachanaj: «Sprava ŭ tym, što ja raźvioŭsia, tamu što maja novaja budučaja žonka — amierykanka. Viasielle projdzie ŭ lutym na tajskim vostravie Samui, źjeducca maje siabry, jaje svajaki. Dziaŭčynu zavuć Anžeła. U jaje čatyrochpakajovyja apartamienty na Manchetenie. Niedaloka pa susiedstvie žyvie Madona».

Pry hetym, redakcyja rabiła prypisku, što nie ŭpeŭniena ŭ ščyraści śpievaka, ale na ŭsialaki vypadak pavinšavała.

Pavialičyć

Vital Artyst taksama raspaviadaŭ, što atrymaŭ hrynkartu. Kazaŭ, što emihravać z kancami ŭ ZŠA nie źbirajecca. Ale płanavaŭ zhaniać na fiestyval Burning Man dy pasprabavać papracavać taksistam u Ńju-Jorku.

A nasamreč druhoj žonkaj artysta stała Ksienija Kuruś, stvaralnica retryt-centru Rapa Nui.

Pavialičyć

U vyniku śpiavak nie emihravaŭ. Ciapier jon žyvie ŭ Biełarusi, daje kancerty ŭ Rasii. Letaś praz tyktok źviartaŭsia da biełaruskich uładaŭ z prośbaj uzhadnić kancert «Bieź bileta»: «U Hrodnie pracavała Palina Haharyna, u Minsku — Niletto. Vydatna, kali na placoŭkach pracujuć prafiesijnyja chedłajniery z Rasii. My ž, jak biełaruski kalektyŭ, z vašaha dazvołu, chočam prapanavać horadu ŭzhadnić kancert «Bieź bileta» ŭ Minsku. Sa svajho boku harantujem ščaślivuju, natchnionuju publiku, mahutny letni nastroj i jakasnaje šou Made in Belarus», — kazaŭ Vital Artyst.

Jon taksama padkreślivaŭ, što hurt nie pakidaŭ Biełaruś: «I svaje sinieńkija rodnieńkija pašparty ni na što inšaje mianiać nie płanujem». Ale ž navat paśla takoha revieransu stanoŭčaha adkazu nie atrymaŭ.

Letaś Artyst trapiŭ u skandał praz svoj chajkinh u akupavanym Krymu: «Pahladzicie, jakaja pryrodnaja pryhažość u hetaha paŭvostrava. Ja lublu padarožničać pa astravach Mikranezii. Skažycie, čamu pamiž Krymam i Madejraj ja pavinien vybrać Madejru? Jechać mnie tudy praź Jeŭropu, jakaja filtruje mianie pa nacyjanalnaj prykmiecie, što ja biełarus, nie choča davać mnie vizy, na miažy ź jakoj ja pavinien siadzieć pa 20 hadzin u aŭtobusie, ź jakoha mnie nielha vyjści pisać i kakać — heta maje prablemy. Kali ja narežu niapravilnaj kaŭbasy ci niejak niapravilna adkryju butelku z vadoj, mianie ŭvohule mohuć adpravić nazad». 

Artyst kazaŭ, što šmat času ŭ maładości pravioŭ u Krymu, tamu ličyć jaho častkaj «našaha susiedskaha kodu». 

Chvaliŭsia, što dziakujučy hetaj vandroŭcy razarvaŭ usie «tonkija sacyjalnyja suviazi». U vyniku trapiŭ u bazu «Miratvorca».

• 1
• 0
• 5
• 7
• 0
• 0
• 0
• 0