Vyhnaŭ žonku zimoj na vulicu, zabraŭ małuju dačku: detali razvodu kasmanaŭta Aleha Navickaha, jaki, zdajecca, ciapier ažaniŭsia z Vasileŭskaj
Z žonkaj Julijaj rasijski kasmanaŭt biełaruskaha pachodžańnia Aleh Navicki byŭ u šlubie amal 30 hadoŭ — u siamji naradzilisia dźvie dački. Ale razyšłasia para niepaluboŭna. Julija navat zapisvała videazvaroty da Łukašenki i Pucina z prośbaj abaranić jaje ad Hieroja Rasii.
Julija Navickaja — žurnalistka, jana pryśviaciła kachanamu niekalki knih. U intervju žančyna zaŭsiody ź piaščotaj havaryła pra Aleha.
Sama Julija z Rasii, jana naradziłasia ŭ Barysahlebsku. Mienavita tam para i paznajomiłasia. Aleha, uradženca biełaruskaha Červienia, nakiravali ŭ Barysahlebski navučalny centr, dzie maładych lotčykaŭ pieravučvali dla palotaŭ na novych typach samalotaŭ. Pobač z hetym centram znachodziŭsia Dom aficeraŭ, u jakim była biblijateka.
Pakolki Julija vučyłasia na fiłałahičnym fakultecie, joj treba było šmat čytać, tamu studentka časta chadziła ŭ biblijateku. U śniežni 1994 hoda budučy kasmanaŭt pabačyŭ pryhožuju dziaŭčynu ź vielizarnym stosam knižak i vyrašyŭ ź joj paznajomicca.
Usiaho praź miesiac chłopiec zaprasiŭ Juliju ŭ Biełaruś, kab paznajomić z baćkami — tam ža zrabiŭ prapanovu ruki i serca. U svajoj knizie Julija piša, što vahałasia niadoŭha, bo Aleh joj vielmi padabaŭsia. A skaryŭ tym, što rabiŭ uražańnie nadziejnaha dy prystojnaha mužčyny.
U śniežni 1996 hoda ŭ siamji naradziłasia pieršaja dačka — Jana. Julija zhadvaje, što jakraz u toj čas Aleha nakiravali ŭ čarhovuju praciahłuju kamandziroŭku — amal na hod.
Dapamahali ź niemaŭlom siastra Lilija z mužam Alaksiejem. U sacyjalnych sietkach Julija piša: «A kali muž viarnuŭsia z kamandziroŭki i ja skazała Janie: «Biažy da taty», — jana pabiehła… da Loški. «Treba zaviazvać z kamandziroŭkami», — skazaŭ tady zasmučany Aleh».
U 90‑ia žyćcio siamji było davoli ścipłym.
«Kali ŭ kancy 90‑ch my słužyli ŭ Budzionaŭsku, vyrašyli nie adznačać dzień naradžeńnia Aleha — u nas prosta nie było hrošaj. A ŭviečary byŭ zvanok, my adčynili dźviery i ŭbačyli piać siemjaŭ, ź jakimi siabravali. Chtości prynios blašanku šprotaŭ, chtości ahurki i pamidory i navat — sapraŭdnuju raskošu! — kavałak kaŭbasy. Ściamnieła, chłopcy vyklučyli śviatło i prapanavali mužu zadźmuć śviečki na torcie. Tort! Adkul?! I tut my ŭbačyli… bochan čornaha chleba, a ŭ jaho ŭvatknuta stolki zapalenych zapałak, kolki Alehu spoŭniłasia hadoŭ», — zhadvała niejak Julija.
Šmat hadoŭ siamja kasmanaŭta Navickaha zdavałasia dla ŭsich etałonnaj. U 2016 hodzie naradziłasia druhaja dačka, jakuju nazvali Marharytaj.
Miarkujučy pa sacyjalnych sietkach Julii, razłom u siamji adbyŭsia ŭ 2022 hodzie. Jašče napačatku hoda jana publikavała ahulnyja fota z mužam i pryznavałasia tamu ŭ kachańni.
A ŭžo ŭ śniežni 2022 hoda žančyna vykłała ŭ instahram videa z prośbaj abaranić jaje ad hieroja (Navicki maje zvańnie Hieroja Rasii) — tady jana pryznałasia, što znachodzicca ŭ pracesie razvodu z kasmanaŭtam.
Julija źviartałasia pa dapamohu da Łukašenki i Pucina, jakija jakraz pavinny byli pryjechać u Zorny haradok, bo kiraŭnictva «Raskosmasu» vyrašyła nie ŭmiešvacca ŭ situacyju.
Žančyna kazała, što nočču Aleh zabraŭ ich małodšuju dačku, a jak jaje viarnuć, maci nie razumieła.
U inšym videa Julija raskazvała, jak jaje vyhnali z domu:
— Siońnia nočču moj muž kasmanaŭt Aleh Navicki, Hieroj Rasii, vyhnaŭ a 2‑j hadzinie nočy mianie z kvatery, pamianiaŭ zamki, zabraŭ maju šaścihadovuju dačku i moj telefon. I pakolki mnie niama dzie načavać, mahčyma, što miescam majoj načoŭki siońnia budzie KPP centra padrychtoŭki kasmanaŭtaŭ.
Jašče ŭ adnym videa jana pakazvaje, što nie moža adčynić svaimi klučami dźviery doma. I što na vulicu muž vyhnaŭ jaje, nie daŭšy navat apranucca narmalna.
Tady ž u sacyjalnych sietkach Julija apublikavała dopis, u jakim raskazała, što viasnoj muž užo zabiraŭ u jaje dačku amal na miesiac — u hety čas jon nie dazvalaŭ žoncy bačyć Marharytu i navat razmaŭlać ź joj pa telefonie.
U 2023 hodzie Julija pryśviaciła sieryju ščymlivych dopisaŭ dačce, jakuju publikavała pad chešteham #žizńbiezrituli.
Navat na 1 vieraśnia maleńkuju Marharytu ŭ pieršy kłas paviali tolki tata i starejšaja siastra. Julija vinšavała dačku praź instahram.
Sioleta jašče ŭ siaredzinie lipienia na sajcie Navukova-daśledčaha vyprabavalnaha centra padrychtoŭki kasmanaŭtaŭ imia Juryja Haharyna ŭ aficyjnaj bijahrafii Navickaha było paznačana, što jon raźviedzieny.
U vieraśni ŭnieśli praŭki — ciapier napisana, što Aleh Navicki žanaty.
Tym časam rasijski sajt Digital Report u lipieni paviedamlaŭ, spasyłajučysia na svaje krynicy ŭ Zornym haradku, što Aleh Navicki pabraŭsia šlubam ź biełaruskaj kaśmičnaj turystkaj Marynaj Vasileŭskaj. Jany stali nasić piarścionki, padobnyja da zaručalnych, na biezymiennym palcy pravaj ruki.
Roźnica va ŭzroście pamiž Marynaj i Aleham składaje 19 hadoŭ.
Kali mahli paznajomicca Navicki i Vasileŭskaja? U śniežni 2022‑ha jana razam ź inšymi pretendentkami na palot u kosmas pryjechała ŭ Rasiju ŭ Zorny haradok na miedycynskija abśledavańni.
Vybar Maryny Vasileŭskaj dla palotu ŭ kosmas ad samaha pačatku vyhladaŭ dziŭnym. U ŚMI pisali pra strohija ŭmovy adboru: naprykład, kandydatki musiać mieć vyšejšuju adukacyju pa kirunkach «fizika», «chimija», «bijałohija», «matematyka» abo «rakietna-kaśmičnaja technika». U Vasileŭskaj takoj niama, jana pastupiła ŭ 2012‑m na fakultet ekanomiki ŭ pryvatny Minski inavacyjny ŭniviersitet.
Pry hetym siarod šaści finalistak adboru na palot u kosmas byli sudmiedekśpiertka, dźvie doktarki i supracoŭnica Nacyjanalnaj akademii navuk. Dublorka Vasileŭskaj Anastasija Lankova pracavała chirurham i maryła pravieści apieracyju ŭ kosmasie.
Byli ŭ bijahrafii Vasileŭskaj i inšyja niazručnyja momanty, jakija prapahanda chavała — naprykład, sudzimaść baćki i pieršy niaŭdały šlub.
Staronku ŭ instahramie značna padčyścili, bo raniej Maryna była padpisanaja na błohi pra pierajezd u ZŠA.
Dypłom dziaržaŭnaj VNU Vasileŭskaja pajšła atrymlivać paśla palotu na MKS — pastupiła ŭ Akademiju kiravańnia, u mahistraturu.
Pracuje jana ŭ Biełaruskim fondzie miru. Ciapier Maryna, jakoj vydali zvańnie Hieroja Biełarusi, rehularna ŭdzielničaje ŭ prapahandysckich mierapryjemstvach, časam razam z Aleham Navickim.
Ciapier čytajuć
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia4
Kamientary