Što ciapier adbyvajecca ŭ Irkuckaj vobłaści, dzie łabarantka navukovaha instytuta pamierła ad čumy?

2 kastryčnika pamierła 28‑hadovaja Darja Šypiłava, łabarantka Irkuckaha supraćčumnaha instytuta. Viadoma, što za tydzień da hetaha dziaŭčyna raźbiła prabirku z uzbudžalnikam lohačnaj čumy i nieŭzabavie adčuła siabie błaha, jaje špitalizavali. Što ciapier adbyvajecca ŭ Irkuckaj vobłaści?

Niekalki balnic Irkucka zakryli na karancin na try tydni, a na Irkuckim aluminijevym zavodzie ŭviali masačny režym na fonie paviedamleńniaŭ pra čumu ŭ rehijonie, piša «Astra».

U Rasspažyŭnahladzie zajavili, što ŭ pamierłaj supracoŭnicy supraćčumnaha instytuta vyjaŭlena «pnieŭmanija nieŭstanoŭlenaj etyjałohii».

Vydańnie «Ludi Bajkała» paviedamiła, što niekalki balnic Irkucka zakryli na trochtydniovy karancin, siarod ich, haradskija kliničnyja balnicy №1, 3, 10, a taksama haradskuju Ivana-Matroninskuju dziciačuju kliničnuju balnicu.

Jak piša vydańnie sa spasyłkaj na krynicu ŭ śfiery achovy zdaroŭja, irkuckija daktary «ŭžo adkryta havorać pra čumu». Pry hetym u dakumientach, jakija pastupajuć u miedycynskija ŭstanovy, čuma nie fihuruje.

«Vybarčy karancin pry lohačnaj čumie nie ŭžyvajecca — abmiežavańni ŭvodziacca adrazu dla ŭsich miedustanoŭ», — pryvodzić vydańnie słovy krynicy.

Nieviadoma, ci zakrytyja ŭsie irkuckija balnicy, ale ŭ stacyjanarach zakrytych ustanoŭ dziejničajuć žorstkija abmiežavańni: pacyjentaŭ nie vypuskajuć da rodnych, ale dazvalajuć pieradavać rečy abo pradukty.

Karancin uviali jak minimum u adnym haradskim radzilnym domie. Jak paviedamiła vydańniu siamja adnoj z paradzich, daktary paviedamili, što pryčyna — čuma.

3 kastryčnika dyrektar Irkuckaha aluminijevaha zavoda (IrkAZ) kampanii RUSAŁ Arciom Faminych paviedamiŭ, što na pradpryjemstvie ŭ jakaści prafiłaktyčnaj miery ŭviali masačny režym u suviazi z raspaŭsiudžvańniem «čutak i supiarečlivaj infarmacyi». Zavod znachodzicca ŭ Šelechavie, dzie raniej u balnicy skanała supracoŭnica supraćčumnaha instytuta.

Pry hetym TASS sa spasyłkaj na Rasspažyŭnahlad paviedamlaje, što sanitarna-epidemijałahičnaja abstanoŭka ŭ Irkuckaj vobłaści, haradach Irkuck i Šelechaŭ stabilnaja. U viedamstvie zajavili, što ŭ Irkuckim supraćčumnym instytucie nie było avaryj pry pracy z patahiennymi mikraarhanizmami, a ŭ supracoŭnicy instytuta vyjaŭlena nie čuma, a «pnieŭmanija nieŭstanoŭlenaj etyjałohii». Tam dadali, što siarod supracoŭnikaŭ instytuta zvarotaŭ z nahody infiekcyjnych zachvorvańniaŭ nie zarehistravana.

Raniej paviedamlałasia, što ŭ Irkuckaj vobłaści na karancin zakryli Šelechaŭskuju rajonnuju balnicu, dzie pamierła łabarantka Darja Šypiłava.

U rehijon prybyła kiraŭnica Rasspažyŭnahladu Hanna Papova. Hubiernatar Irkuckaj vobłaści Kobzieŭ paviedamlaŭ pra padazreńnie na vypadak zachvorvańnia žychara rehijona «asabliva niebiaśpiečnaj infiekcyjaj», nie ŭdakładniŭšy, jakoj mienavita.

Ułady Bajkalska paźniej vydalili paviedamleńnie z prośbaj nie naviedvać horad Šelechaŭ, dzie ŭ balnicy pamierła supracoŭnica supraćčumnaha instytuta.

• 0
• 0
• 0
• 0
• 0
• 0
• 0
• 0