Bałharyja vymieniała ŭ Hrecyi pareštki svajho siaredniaviečnaha cara
Pareštki, jakija źviazvajuć sa słavutym bałharskim carom Samuiłam, znajšli padčas archieałahičnych raskopak u bazylicy Śviatoha Achila na vostravie Prespa. U 1965 hodzie prafiesar Nikałaas Mucopułas vyjaviŭ tam čatyry sarkafahi i antrapałahičnyja materyjały. Apošnija hady znachodki zachoŭvalisia ŭ Muziei vizantyjskaj kultury ŭ Sałonikach. Ciapier jany pieradajucca Bałharyi ŭ ramkach pahadnieńnia ab kulturnym abmienie pamiž dźviuma krainami, piša Euronews.
Uzamien Hrecyja atrymaje 48 relikvij z manastyroŭ Panahija Ikasifinisisa i Jana Pradvieśnika ŭ Sieronie, a taksama ź Sieronskaj i Nihryckaj mitrapolii. Da kančatkovaha viartańnia ŭ miescy, adkul hetyja relikvii byli vyviezienyja, jany buduć ekspanavacca ŭ Muziei vizantyjskaj kultury da 5 listapada 2026 hoda.
Cyrymonija ŭzajemnaj pieradačy adbyłasia ŭ Sałonikach u prysutnaści premjer-ministra Hrecyi Kiryjakasa Micatakisa i premjer-ministra Bałharyi Rumiena Radzieva. Padčas cyrymonii byli padpisanyja adpaviednyja pratakoły ab pieradačy i pryjomie relikvij.
Pracedura stała vynikam miemaranduma ab uzajemarazumieńni, padrychtavanaha paśla šmathadovych pieramovaŭ i rehularnych kantaktaŭ pamiž dźviuma krainami. Dakumient padpisali ministry kultury Hrecyi i Bałharyi Lina Miendoni i Jafcim Miłošaŭ.
Car Samuił (kiravaŭ u 997—1014 hadach, faktyčna z 976 hoda) — praviciel Pieršaha Bałharskaha carstva, viadomy svaim praciahłym i dramatyčnym supraćstajańniem ź Vizantyjskaj impieryjaj. Dziasiatkami hadoŭ jon paśpiachova strymlivaŭ ekspansiju Vizantyi pad kiraŭnictvam impieratara Vasila II i pieranios stalicu dziaržavy na zachad, u Ochryd (ciapier na terytoryi Paŭnočnaj Makiedonii).
U 1014 hodzie ŭ bitvie na Klejdyjonie (Biełasicy) vojska Samuiła było razhromlena. Vasil II zahadaŭ aślapić kala 15 000 pałonnych bałharaŭ, pakinuŭšy tolki pa adnavokim pavadyry na kožnuju sotniu, kab zavieści ślapych na radzimu.
Ubačyŭšy svajo aśleplenaje vojska, Samuił, jak paviedamlajuć niekatoryja krynicy, nie vytrymaŭ i pamior ad sardečnaha prystupu. Praz čatyry hady paśla jaho śmierci, u 1018 hodzie, Pieršaje Bałharskaje carstva kančatkova pała pad udarami Vizantyi.
Premjer-ministr Bałharyi zaklikaŭ Jeŭropu pajści na sastupki Pucinu
Biełarusy pryvieźli z Kapienhahiena «kryž karalevy Safii». Historyki nazyvajuć jaho bižuteryjaj za 4000 jeŭra
Karciny ź biełaruskaj siadziby Radziviłaŭ viarnuli, ale ŭ Polšču
Francyja viartaje Madahaskaru čerap miascovaha karala, jakomu adsiekli hałavu 128 hadoŭ tamu
«Biełaruś pieradusim». Što viadoma pra 23‑hadovaha aficera śpiecnaza, jakoha asudzili na 19 hadoŭ za «zdradu dziaržavie»8
Kamientary