Kiraŭnik Pientahona dapuściŭ pierakidku častki vojskaŭ ZŠA ź Jeŭropy ŭ Zachodniaje paŭšarje
Pientahon aktyŭna zmahajecca suprać narkakartelaŭ u Łacinskaj Amierycy.
Ministr abarony Pit Chiehset dapuściŭ, što niekatoryja amierykanskija vajennasłužačyja mohuć być pierakinutyja ź Jeŭropy ŭ Zachodniaje paŭšarje pa miery taho, jak administracyja Trampa aktyvizuje svaju žorstkuju kampaniju suprać narkakartelaŭ u Paŭdniovaj Amierycy, paviedamlaje The Hill.
«My dakładna pašyrajem svaju prysutnaść i svoj śled u Centralnaj i Paŭdniovaj Amierycy z partniorami, i z-za śmiełaha kroku, jaki prezident zrabiŭ u Vieniesuele», — skazaŭ Chiehset žurnalistam, majučy na ŭvazie zachop amierykanskimi vajskoŭcami byłoha vieniesuelskaha lidara Nikałasa Madura.
Ministr abarony zhadaŭ partniorskija adnosiny, jakija ZŠA majuć z Ekvadoram, Handurasam, Hvatemałaj, Panamaj. Jon taksama skazaŭ, što jaho zadača — realizoŭvać stratehiju nacyjanalnaj biaśpieki i abaronnuju stratehiju ZŠA, a ŭ ich jasna skazana, što Jeŭropa pavinna brać na siabie bolš vydatkaŭ i adkaznaści za ŭłasnuju abaronu.
«I kali my robim heta, šmatlikija… niekatoryja z hetych sił i srodkaŭ pierajeduć u inšaje miesca — albo nazad dadomu na novuju vialikuju, pryhožuju bazu, pra budaŭnictva jakoj my abviaścili paru dzion tamu, albo ŭ inšuju pazicyju ŭ Zachodnim paŭšarji, pakolki my zmahajemsia z kankretnymi terarystyčnymi arhanizacyjami», — zajaviŭ kiraŭnik Pientahona.
Pientahon pravodzić svoj šaścimiesiačny ahlad vajennaj pazicyi ZŠA ŭ Jeŭropie z metaj pierakłaści abaviazki zvyčajnaj abarony na sajuźnikaŭ z NATA na kantyniencie. Ahlad pavinien zaviaršycca ŭ śniežni.
Ciapier ZŠA nie majuć bujnoj vajskovaj bazy ŭ Paŭdniovaj Amierycy. Ale z vosieni minułaha hoda Pientahon aktyvizuje namahańni vajskoŭcaŭ suprać narkakartelaŭ u Łacinskaj Amierycy.
Amierykanskija siły praciahvajuć padryvać mierkavanyja narkasudny ŭ Karybskim mory i va ŭschodniaj častcy Cichaha akijana. Z 2 vieraśnia minułaha hoda amierykanskija vajskoŭcy praviali minimum 70 udaraŭ i zabili 234 «narkaterarystaŭ» pa abodva baki Paŭdniovaj Amieryki.
Apošnimi tydniami amierykanskija vajskoŭcy zasiarodzilisia na inšaj celi — «płyvučych zapravačnych stancyjach»: jany pierachoplivajuć bujnyja rybałoŭnyja sudy la ŭźbiarežža Ekvadora i vyvodziać ekipaž na bort pierad padryvam sudna.
Administracyja nazvała abodva padychody častkaj namahańniaŭ dla strymlivańni patoku zabaronienych narkotykaŭ u rehijonie i razhromie narkakartelaŭ, jakija jany razhladajuć jak pahrozu ZŠA.
Apošnimi miesiacami ZŠA pašyryli svajo abarončaje partniorstva z krainami Łacinskaj Amieryki, i na minułym tydni kala 50 amierykanskich vajennasłužačych i supracoŭnikaŭ pravaachoŭnych orhanaŭ pryniali ŭdzieł u rejdach na ziamli ŭ Ekvadory suprać mierkavanych handlaroŭ narkotykami.
Raniej ZŠA davali Ekvadoru i inšym krainam-sajuźnikam abstalavańnie, navučańnie i raźviedvalnuju padtrymku dla baraćby sa złačynnymi hrupami.
Kamientary