«U konsulstvie paviedamili, što znojdzieny patanuły mužčyna». Ź siaredziny vieraśnia ŭ Italii šukajuć 33‑hadovaha biełarusa

Apošni raz syn vychodziŭ z maci na suviaź 10 vieraśnia. Tady jon paviedamiŭ siabru, što znachodzicca ŭ Livorna — bujnym partovym horadzie ŭ Taskanie. U miesiendžarach mužčyna byŭ anłajn 13 vieraśnia — z taho času pra jaho niama nijakaj infarmacyi, piša Onliner.by.

24 vieraśnia Taćciana raskazała pra toje, što adbyłosia, u sacyjalnych sietkach. Post nabraŭ amal 900 tysiač prahladaŭ. Žurnalisty daviedalisia, što ŭdałosia vyśvietlić za hety čas.

Jak raskazała sama Taćciana, jana paśpieła źviarnucca ŭ biełaruskuju milicyju, palicyju Litvy (mužčyna žyŭ u Vilni), a taksama ŭ pasolstva Biełarusi ŭ Italii. Źviazacca niepasredna z palicyjaj Italii joj pieraškadžaje moŭny barjer.

Čamu pošuki pačalisia nie adrazu? Pavodle słoŭ žančyny, jana nie chacieła lišni raz turbavać syna padčas pajezdki.

— Jon zaŭsiody padarožničaŭ adzin. Taki čałaviek, samadastatkovy. Jon vielmi hramatny, adukavany, razumny, šmat čytaŭ. Jamu nie patrebnaja była niejkaja kampanija. Jon nie piŭ, nie kuryŭ, pa barach nie chadziŭ. Sa zdaroŭjem usio dobra, nikoli nie chvareŭ, spartyŭny.

— My ź im na tydni pa šmat razoŭ stelefanoŭvalisia i pierapisvalisia. Ale ŭ adpačynku, ščyra kažučy, ja jamu nie telefanavała. Jon skazaŭ, što lacić u Italiju. I ja pažadała dobraha adpačynku. Viedała, što dva tydni možna jaho nie turbavać. U mianie navat ničoha nie joknuła, što niešta nie tak. Jon sam kampjutarščyk, źviazany z technałohijami. I kali b ničoha nie zdaryłasia, dumaju, jon by znajšoŭ sposab sa mnoj źviazacca, — raskazvaje Taćciana.

U kamientarach da pasta vykazvali roznyja zdahadki: mužčynu mahli abrabavać, u jaho mahli ŭźniknuć prablemy sa zdaroŭjem, albo jon sam źjechaŭ u inšy horad. Ukazvali navat na kankretnyja vypadki — adzin mužčyna prasiŭ dapamohi kala kramy, druhi trapiŭ z traŭmami ŭ balnicu. Adnak u ich svajho syna maci nie paznała.

Mnohija prapanoŭvali dapamahčy na miescy ŭ Italii, ale Taćciana aścierahajecca źviartacca da nieznajomych ludziej.

Jak śćviardžaje žančyna, u konsulstvie joj paviedamili, što ŭ navakolli byŭ znojdzieny patanuły mužčyna. Kab vyznačyć jaho asobu, patrebny test DNK.

— Na hetym etapie ja čakaju vynikaŭ. Test robicca nie chutka, jak vy razumiejecie. Zvyčajna jaho vyniki rychtujuć miesiac, ale my prasili, kab heta było zroblena ŭ maksimalna karotkija terminy. U mianie test brała naša biełaruskaja milicyja. Skazali, što tolki 10 dzion idzie raspracoŭka. Potym vyniki pieradaduć u Śledčy kamitet.

Pajechać u Italiju Taćciana nie moža — u jaje niama vizy, da taho ž žančyna nikoli nie była za miažoj. Pavodle jaje słoŭ, kab daviedacca padrabiaznaści ŭ italjanskaj palicyi, treba apastylavać dakumienty, jakija paćviardžajuć svajactva, — heta taksama zajmaje čas.

• 0
• 0
• 0
• 1
• 0
• 2
• 0
• 0