Karcinu amierykanskaj mastački nabyli na rasprodažy za 30 dalaraŭ, a paśla pradali za 1,35 miljona

Nievialiki naciurmort pamieram kala 20 na 28 santymietraŭ znajšli ŭ domie ŭ štacie Mičyhan. Pavodle infarmacyi aŭkcyjonnaha doma Freeman's, karcina stajała ŭ «ciomnym kucie» kalidora, jaki viadzie da haraža, i ŭ dzień rasprodažu jaje nie zaŭvažyli inšyja kupcy.

Na ciomnym fonie ledź možna było razhledzieć podpis «Abercrombie, 51». Kupiec, jaki pažadaŭ zastacca ananimnym, vyrašyŭ ryzyknuć i zapłaciŭ za karcinu 30 dalaraŭ. Jon byŭ daŭnim amataram pošuku viniłavych kružełkach i mebli siaredziny XX stahodździa.

Paźniej jon navat źmianiŭ płany siamiejnaha adpačynku, kab naviedać Mastacki muziej Miłuoki, dzie prachodziła vystava Abierkrombi. U katałohu vystavy pakupnik znajšoŭ hazietnuju vyrazku z 1952 hoda. Na apublikavanym tam fota była taja samaja karcina, a pobač pakazvalisia sapraŭdnyja marskija rakavinki, namalavanyja na joj.

Paśla hetaha znachodku pieradali ŭ Freeman's, jaki byŭ adnym sa sponsaraŭ vystavy. Ekśpiertka pa tvorčaści Abierkrombi Śjuzan Vajninhier, prafiesarka historyi mastactva va Univiersitecie Ruźvielta, paćvierdziła sapraŭdnaść karciny. Jana taksama vyśvietliła, što tvor zachavaŭsia ŭ aryhinalnaj ramie.

Karcina była napisanaja ŭ 1951 hodzie i na joj vyjaŭlenyja dziesiać marskich rakavin. Rakaviny byli adnym z raspaŭsiudžanych matyvaŭ u tvorčaści Abierkrombi, jakuju nazyvali «karalevaj bahiemnaha mastactva» Amieryki. Na praciahu nastupnych dvuch hadoŭ karcinu pakazvali na šaści piersanalnych vystavach mastački. U toj čas jaje aceńvali ŭ 50—150 dalaraŭ.

Adnak sama Abierkrombi karcinu nie pradała. Jana padaryła jaje doktaru ŭ horadzie Kałamazu ŭ Mičyhanie ŭ abmien na miedycynskija pasłuhi. Paśla śmierci doktara tvor pierajšoŭ u spadčynu, a praz šmat hadoŭ apynuŭsia na rasprodažy majomaści.

Pierš čym karcinu vystavili na aŭkcyjon, jaje adrestaŭravaŭ Džulijan Baŭmhartnier. Jon adznačyŭ, što tvor znachodziŭsia praktyčna ŭ idealnym stanie, kali nie ličyć brudu i pamutniełaha łaku na pavierchni. Paśla čystki, retušavańnia i naniasieńnia novaha łaku karcina, pavodle jaho słoŭ, stała vyhladać jarkaj i žyvoj.

Aŭkcyjonny dom pieršapačatkova aceńvaŭ tvor u 150—250 tysiač dalaraŭ, ale padčas tarhoŭ staŭki značna pieravysili hetuju sumu. U vyniku karcinu pradali bolš čym za 1,35 miljona dalaraŭ.

Papiaredni rekord koštu tvora Abierkrombi byŭ pastaŭleny ŭ 2025 hodzie, kali na Sotheby's jaje karcina «Pasłańnie pra miłasernaść» (Message for Mercy) była pradadzienaja za 1,02 miljona dalaraŭ. Takim čynam, novaja znachodka pierasiahnuła papiaredni rekord.

Hiertruda Abierkrombi była mastačkaj-samavučkaj i pamierła ŭ 1977 hodzie. Jana stała viadomaja svaimi zahadkavymi, siurrealistyčnymi kampazicyjami, padobnymi da scen z kazačnaha abo nierealnaha śvietu. Akramia mastactva, Abierkrombi prasłaviłasia svaimi znakamitymi sałonami ŭ domie ŭ čykahskim rajonie Hajd-Park. Tam źbiralisia pradstaŭniki kulturnaha asiarodździa, a siarod muzykaŭ, jakija vystupali na jaje viečarach, byli viadomyja džazavyja vykanaŭcy Dyzi Hileśpi i Čarli Parkier.

• 5
• 0
• 0
• 1
• 2
• 1
• 0
• 0