Muzyka, malavańnie i tancy ŭ škołach i himnazijach — usio? Što viadoma pra skaračeńni nastaŭnikaŭ-estetystaŭ
Fakultatyvy estetyčnych kirunkaŭ pastupova prybirajuć z prahramy navučańnia škoł.
Na Hrodzienščynie masava skaračajuć nastaŭnikaŭ estetyčnych napramkaŭ u škołach i himnazijach.
«Całkam prybirajuć fakultatyvy muzyčnaj skiravanaści i chareahrafii, pakidajuć tolki kružki. Kudy iści pracavać?» — zadajecca pytańniem u tredsach adna z nastaŭnic.
Jak stała viadoma «Našaj Nivie», fakultatyvy estetyčnych nakirunkaŭ sapraŭdy pastupova prybirajuć z prahramy navučańnia. Praciahnuć navučańnie muzycy, chareahrafii ci vyjaŭlenčamu mastactvu prapanujecca ŭ profilnych mastackich škołach.
Ličycca, što skaračeńni pačalisia ŭ vyniku anansavańnia aptymizacyi kolkaści biudžetnych rabotnikaŭ u pastanovie Savieta ministraŭ №57, padpisanaj premjer-ministram Alaksandram Turčynym u kastryčniku 2025 hoda. Niekatoryja škoły aptymizacyja ŭžo zakranuła, ale častka jašče pracuje pa staroj schiemie.
Tak, u 192‑j staličnaj himnazii paviedamlajuć, što ŭ hetym hodzie ŭsie fakultatyvy aktualnyja.
Toje samaje i ŭ himnazii №5 imia Uładzimira Karatkieviča ŭ Hrodnie.
«Na siońnia ŭ nas pracujuć usie fakultatyvy. Usio jość. Ale što budzie ŭ nastupnym hodzie — nieviadoma. Infarmacyja mianiajecca, jak viecier», — kaža pradstaŭnica himnazii.
Razam z hetym niekatoryja baćki ŭžo sutyknulisia z tym, što ŭ novym navučalnym hodzie ich dzieciam pryjšłosia pierarvać navučańnie pa mastackich pradmietach.
«Syn chodzić na hitaru, u jaho tolki stała niešta atrymlivacca i źjaviłasia cikaŭnaść. I tut takoje… U muzyčnuju škołu my dakładna nie pojdziem — nahruzka dla dziciaci vielmi vialikaja, najpierš datyčna pieramiaščeńnia pa horadzie. Viedaju, bo starejšaja dačka skončyła muzyčnuju škołu i druhi raz my na takoje nie padpišamsia: paśla adnoj škoły inšaja amal štodzień, i ŭviečary ŭžo niama nijakich siłaŭ na ŭroki», — padzialiłasia žycharka Hrodna.
Pa słovach žančyny, u ich kłasie ŭsie baćki niezadavolenyja: dzieci mahli na miescy zajmacca i muzykaj, i malavańniem, i tancami — heta było vyhadna ŭsim bakam.
«Chacieła zapisać dzicia na muzyku, a muzyki nie budzie. U muzyčnuju škołu vadzić nie budu, niama času na heta. Było zručna, što ŭsio ŭ škole i adrazu paśla ŭrokaŭ. Faktyčna nas pazbavili mahčymaści navučańnia», — dadaje jašče adna maci z Hrodna.
«3 vieraśnia ŭ našaj škole abjavili, što zakryvajuć estetyčny kirunak. Starejšamu synu hod zastałosia advučycca, małodšamu — try. Prapanavali iści ŭ muzykałku. Ale ciahnucca ŭ inšy kaniec horada — nie, dziakuj», — skardzicca biełaruska z Ašmian.
Viadoma, što ŭ niekatorych rehijonach Biełarusi skaračeńni nastaŭnikaŭ-estetystaŭ pačalisia jašče ŭ minułym navučalnym hodzie.
«Nam kazali, što heta pieramieny najpierš strukturnyja. Kab prybrać sa škoły častku biudžetnych adzinak i pieravieści mastactva pad «śpiecyjalizavany» dach. Ale pa fakcie ŭ muzyčnych škołach i biez nas jość svaje piedahohi, tudy «z vulicy» nie pracisnucca. Akramia taho, kolkaść achvotnych zajmacca tvorčaściu ŭ inšym miescy, pa-za škołaj, adrazu źmianšajecca», — apisała nastupstvy adna z vykładčyc pa vakale z Mahiloŭščyny.
Ciapier čytajuć
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju95
Kamientary