Sabaka mocna pahryz bujnuju kupiuru, ale jaje ŭsio adno pryniali. U jakich vypadkach nie varta adčajvacca?
Sabaka mocna pahryz banknotu naminałam 100 biełaruskich rubloŭ, adarvaŭšy ad jaje častku, ale ŭładalnik zmoh abmianiać paškodžanyja hrošy ŭ «Biełarusbanku» i atrymaŭ novuju kupiuru. Videa z hetaj historyjaj raspaŭsiudziłasia ŭ tyktoku. Akazvajecca, mocna paškodžanyja biełaruskija hrošy ŭ peŭnych vypadkach sapraŭdy možna abmianiać u banku, tłumačyć Myfin.by.
Źniešni vyhlad banknoty sam pa sabie nie vyznačaje, ci možna jaje abmianiać. Bankaŭskija rabotniki praviarajuć, jakaja častka kupiury zachavałasia, ci možna ŭstanavić, što ŭsie frahmienty naležać adnoj banknocie, i ci niama sumnieńniaŭ u jaje sapraŭdnaści.
Pavodle dziejnych pravił, paškodžanuju biełaruskuju banknotu možna abmianiać, kali zachavałasia nie mienš za 55% jaje pieršapačatkovaj płoščy. Tamu navat kupiura, jakaja vyhladaje vielmi mocna paškodžanaj, moža zastavacca prydatnaj dla abmienu.
Praviły praduhledžvajuć niekalki vidaŭ paškodžańniaŭ, pry jakich banknota moža być pryniataja. Naprykład, kali jana straciła častku płoščy, ale zachavała nie mienš za 55%, razarvałasia na častki, jakija možna identyfikavać jak častki adnoj kupiury, maje nadryvy, dzirki abo paškodžanyja krai. Taksama možna abmianiać banknoty, paškodžanyja vadoj, ahniom ci inšym uździejańniem, kali pa ich asnoŭnych prykmietach možna vyznačyć sapraŭdnaść. Kančatkovaje rašeńnie prymaje bank paśla pravierki kankretnaj banknoty.
Pry hetym paškodžanuju kupiuru nielha pieratvaryć u dźvie. Kali, naprykład, banknotu naminałam 20 rubloŭ razarvać napałovu i prynieści abiedźvie častki ŭ bank, supracoŭniki pravierać, ci sapraŭdy jany naležać adnoj banknocie. Kali ŭsie ŭmovy dla abmienu vykananyja, uładalnik atrymaje adnu novuju kupiuru naminałam 20 rubloŭ, a nie dźvie. Sam fakt fizičnaha paškodžańnia nie pavialičvaje vartaść hrošaj.
Dla zamiežnaj valuty dziejničajuć inšyja praviły. Nielha aŭtamatyčna ličyć, što paškodžany dalar ci jeŭra bank abaviazany abmianiać na novuju banknotu hetak ža sama, jak biełaruskija rubli. Pryjom i abmien paškodžanaj zamiežnaj valuty zaležyć ad pravił kankretnaha banka i patrabavańniaŭ banka-emitenta. U niekatorych vypadkach bank moža pryniać takuju kupiuru dla dadatkovaj ekśpiertyzy abo inkasa, pryčym hetaja pasłuha moža być płatnaj.
Tamu mocna paškodžanyja hrošy nie varta adrazu vykidać. Kali kupiuru pahryzła žyviolina, jaje vypadkova razarvali, jana prajšła praz pralnuju mašynu ci była paškodžanaja inšym čynam, lepš zachavać usie častki i pakazać ich u banku. Mahčyma, banknotu jašče možna budzie abmianiać.
Biełarus pryvioz ź Vialikabrytanii dachaty padroblenyja funty
Rabotnicu banka z Homiela, jakaja padmianiała biełaruskija hrošy na suvienirnyja jeŭra, adpravili ŭ kałoniju
Biełaruskaja siamja 10 hadoŭ nie mahła znajści schavanuju zanačku. Hrošy ŭvieś hety čas lažali ŭ piečy
U ivacevickim banku admovilisia abmianiać dalary, atrymanyja paśla prodažu chaty
Ciapier čytajuć
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie8
Kamientary