Što było b, kali b adno voka ŭ čałavieka było śpieradu, a druhoje na patylicy?

Zdavałasia b, voka na patylicy było b karysnym nabytkam: možna było b bačyć toje, što adbyvajecca za śpinaj, navat nie pavaročvajučy hałavy. Ale čałaviečy zrok uładkavany tak, što za takuju pieravahu daviałosia b zapłacić inšaj važnaj zdolnaściu.

Čałaviečyja vočy raźmieščanyja pobač, ale kožnaje bačyć navakolny śviet pad krychu inšym vuhłom. Značnaja častka ich paloŭ zroku pierakryvajecca.

Kali čałaviek hladzić prosta pierad saboj, pole jaho zroku achoplivaje kala 180 hradusaŭ, heta značyć, prykładna pałovu kruha. Kala 70% hetaha pola adnačasova bačać abodva voki.

Mozh atrymlivaje ad vačej dźvie krychu roznyja karcinki i abjadnoŭvaje ŭ adzin trochmierny vobraz. Dziakujučy hetamu ŭźnikaje stereaskapičny zrok, jaki dapamahaje aceńvać hłybiniu i razumieć, jaki pradmiet znachodzicca bližej, a jaki dalej.

Hetaja zdolnaść patrebnaja nie tolki dla taho, kab aryjentavacca ŭ prastory. Jana važnaja dla kaardynacyi vačej i ruk i mnostva zvyčajnych dziejańniaŭ: ad piśma i hatavańnia da kiravańnia aŭtamabilem i zaniatkaŭ sportam.

Čamu ŭ zajca i lisy vočy raźmieščanyja pa-roznamu

Raźmiaščeńnie vačej u roznych žyvioł šmat u čym zaležyć ad taho, jakuju zadaču pavinien vyrašać ich zrok.

U mnohich drapiežnikaŭ, jak i ŭ ludziej, vočy raźmieščanyja śpieradu. Pali zroku mocna pierakryvajucca, tamu žyvioła moža dakładniej aceńvać adlehłaść da zdabyčy. Heta asabliva važna padčas palavańnia.

Drapiežniki, jak praviła, majuć bolš vyrazny zrok i lepšuju kantrasnuju adčuvalnaść, tamu lepš adroźnivajuć abjekt ad fonu. Usio heta dapamahaje im palavać.

U žyvioł, jakija sami mohuć stać zdabyčaj, usio inakš. Naprykład, u zajca vočy raźmieščanyja bližej da bakoŭ hałavy. Heta dazvalaje achapić pozirkam značna bolšuju prastoru i chutčej zaŭvažyć niebiaśpieku, jakaja nabližajecca z roznych bakoŭ. Pry hetym pali zroku dvuch vačej pierakryvajucca mienš.

Takim čynam, raźmiaščeńnie vačej vyznačaje svojeasablivy kampramis pamiž šyrynioj ahladu i zdolnaściu dakładna aceńvać hłybiniu.

Cikavy varyjant hetaha kampramisu možna nazirać u soŭ. Ich vočy nakiravanyja napierad, što zabiaśpiečvaje dobry stereaskapičny zrok. Ale sami vočy amal nie ruchajucca ŭ vačnicach. Heta kampiensujecca nadzvyčaj ruchomaj šyjaj: sava moža mocna pavaročvać hałavu i takim čynam ahladać prastoru vakoł siabie.

Što źmianiła b voka na patylicy?

Kali b adno čałaviečaje voka znachodziłasia śpieradu, a druhoje zzadu, pole zroku stała b značna šyrejšym. Čałaviek moh by bačyć amal usio navokał, u tym liku toje, što adbyvajecca za śpinaj, nie pavaročvajučy hałavy.

Ale za heta daviałosia b zapłacić usprymańniem hłybini. Pali zroku dvuch vačej amal nie pierakryvalisia b, tamu mozh nie moh by abjadnoŭvać atrymanyja ad ich vyjavy ŭ adziny trochmierny vobraz, jak robić heta ciapier. U vyniku my stracili b zvykły stereaskapičny zrok i zdolnaść tak dakładna aceńvać hłybiniu.

Kali b adno voka raptam apynułasia na patylicy, mozh sutyknuŭsia b ź jašče adnoj prablemaj. Jamu daviałosia b apracoŭvać vyjavy ad vačej, raźmieščanych zusim nie tak, jak jon zvyk.

• 0
• 0
• 1
• 1
• 0
• 0
• 0
• 0