Raman vyjšaŭ va ŭrocłaŭskim vydaviectvie i maje nazvu «Hłybinia».
Va ŭrocłaŭskim vydaviectvie KEW vyjšła novaja kniha Viktara Marcinoviča «Hłybinia», paviedamlaje bellit.lnfo.
U postapakaliptyčnym ramanie aŭtar daśleduje prablemu padzielenaści biełarusaŭ, roźnicu kaštoŭnaściaŭ, analizuje etyku adnosinaŭ pamiž ludźmi ŭnutry Biełarusi i za jaje miežami, a taksama sprabuje vyjavić histaryčnyja zakanamiernaści, jakija b źbierahli ad niepapraŭnych pamyłak.
«Što budzie z nami, kali my raptam apyniemsia pa roznyja baki — krainy, historyi, ułasnaha žyćcia? Adna kraina raskołvajecca na «da» i «paśla». Na tych, chto zastaŭsia, i tych, chto źnik, zabraŭšy z saboj movu, pamiać, cyvilizacyju. Ceły śviet raspadajecca na častki, i kožnaja ź ich pačynaje žyć pavodle ŭłasnych zakonaŭ. Ale hieroi historyi zastajucca źnitavanyja ahulnym minułym, vybaram, jaki nielha admianić, i pytańniami, na jakija niama prostych adkazaŭ. Ci možna znoŭ stać adnym cełym? I ci chto-kolviek hetaha choča?»
Viktar Marcinovič stvaryŭ napružany i emacyjny tvor pra razłom, jaki prachodzić praź losy ludziej. Tut jość usio: dośvied sychodu i jaho cana, składanaja etyka adnosin pamiž «svaimi» i «čužymi», unutranyja kanflikty, što nie dajuć spakoju. Heta vostrasiužetny raman z historyjaj kachańnia i finałam, jaki nasamreč — tolki pačatak.
Nabyć knihu možna anłajn na roznych placoŭkach.
Viktar Marcinovič vosiem hadoŭ nie vydavaŭ ramanaŭ pa-biełarusku. Debiutavaŭ u 2009 hodzie na rasiejskaj movie ramanam «Paranoja», potym byli «Ściudziony vyraj», «Mova», «Sfahnum», «Noč» i inš. Viktar Marcinovič nie tolki aŭtar mastackaj prozy, ale jašče i dramaturh, i mastactvaznaŭca. U pačatku 2026 hodu ŭ Oksfardskim vydaviectvie Routgledge pa-anhlijsku vyjšła jahonaja kniha «Art of Mercy»: non-fikšn pra mastactva praz pryzmu pryvatnaha, hłyboka asabistaha dośviedu.
Kamientary