Aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj
KDB uziaŭ pad vartu nie mienš za dziesiać čałaviek.
Aryšt adstaŭnoha padpałkoŭnika Dźmitryja Zary, jakoha siłaviki paličyli analitykam Valeryja Sachaščyka, pryvioŭ da taho, što KDB jak katkom prajšoŭsia pa aficerskim składzie avijabazy ŭ Mačuliščach.
Čytajcie: U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma
Viadoma pra aryšt nie mienš jak dziasiatka čałaviek, jakich padazrajuć u kamunikacyi z Zaroj — što interpretujecca jak supracoŭnictva z Abjadnanym pierachodnym kabinietam i jaho byłym «ministram abarony», kamandziram desantnikaŭ Valeram Sachaščykam.
Zatrymanyja — byłyja sasłužyŭcy Zary, znajomyja ź im asabista. U asnoŭnym heta piłoty z doŭhaj vysłuhaj, siarod ich pałkoŭniki. Hetymi ludźmi ciapier zabitaje SIZA KDB.
Aryštavanyja admaŭlajuć namieranuju pieradaču infarmacyi, abvinavačvańni stali dla ich šokam.
Mierkavana, śpiecsłužby ad samaha pačatku prysutnaści Zary ŭ kamandzie Sachaščyka viedali pra heta ź niejkaj krynicy ŭ jaho atačeńni. Vajskoŭcaŭ papiaredžvali, što adstaŭny padpałkoŭnik «zdradnik» i havaryć ź im treba aściarožna, a lepš uvohule nie havaryć. Ale ŭsio ž niekatoryja z Zaroj pa starym znajomstvie razmaŭlali na ahulnyja temy — pa starym siabroŭstvie.
«Naša Niva» pakul nie maje dakładnaj infarmacyi, jakoje abvinavačvańnie vystaŭlenaje aficeram, ale pa łohicy ciapierašnich pracesaŭ, heta moža być jak i «sadziejničańnie ekstremisckaj dziejnaści», tak i «zdrada dziaržavie».
Siłaviki ličać, što Dźmitryj Zara zajmaŭsia zboram infarmacyi i analityčnaj rabotaj u kamandzie Valeryja Sachaščyka, jaki ŭ 2022‑2024 byŭ členam Abjadnanaha pierachodnaha kabinieta Śviatłany Cichanoŭskaj pa pytańniach abarony i nacyjanalnaj biaśpiecy.
Jak Dźmitryj Zara apynuŭsia ŭ Biełarusi, niezrazumieła. Apošnija hady jon publikavaŭ u svaim instahramie mnostva niaskładnych paviedamleńniaŭ štodzień, karystaŭsia šyframi i niaisnymi słovami, cytavaŭ Bibliju, kiravaŭsia «enierhijami vyšejšaha paradku» i hetak dalej. Pryznačyŭ siabie hienierałam i vydavaŭ dekrety na «ŭžyvańnie boskich siłaŭ», jakija davodziŭ da členaŭ svajoj siamji, jakija zastalisia ŭ Biełarusi.
3 lutaha 2026 hoda Dźmitryj Zara apublikavaŭ błytany dopis pra samaachviarnaść Isusa Chrysta. Heta stała jaho apošnim paviedamleńniem u instahramie. Chutčej za ŭsio, adrazu ŭśled za hetym Zara viarnuŭsia ŭ Biełaruś.
«Naša Niva» źviazałasia z Valeryjem Sachaščykam, jon nie staŭ kamientavać situacyju.
* * *
Były kamandzir bieraściejskich desantnikaŭ Valeryj Sachaščyk staŭ «ministram abarony» ŭ Abjadnanym pierachodnym kabiniecie ŭ 2022 hodzie. Pierad tym jon vystupiŭ z rezkim asudžeńniem napadu Rasii na Ukrainu. Sachaščyk sprabavaŭ stvaryć biełaruskaje padraździaleńnie va Ukrainie, ale nie staŭ abjadnaŭčaj fihuraj dla biełaruskich dobraachvotnikaŭ-kalinoŭcaŭ ci siłavikoŭ-emihrantaŭ.
* * *
Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10 050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ.
«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy.
«Naša Niva» — bastyjon biełaruščyny
PADTRYMAĆCiapier čytajuć
«Bulba» z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki4
Kamientary