Vajskoŭca-biełarusa mohuć vysłać z Ukrainy, bo jon nie moža lehalizavacca. Usio praz zakon, jaki mieŭsia palehčyć lehalizacyju

Biełaruskaha dobraachvotnika Emilija Łabiejku mohuć u listapadzie vysłać z Ukrainy, bo ŭ jaho zhareŭ biełaruski pašpart. Vinavaty novy zakon, jaki mieŭsia spraścić lehalizacyju zamiežnych vajskoŭcaŭ va Ukrainie, ale dla Łabiejki jon situacyju pahoršyŭ, piša Radyjo Svaboda.

Biełarus Emilij Łabiejka vajuje na baku Ukrainy z pačatku poŭnamaštabnaha ŭvarvańnia Rasii. Adnak paśla čatyroch hadoŭ słužby — sioleta ŭ listapadzie — jaho mohuć prymusić vyjechać z krainy. Usio tamu, što dobraachvotnik ź Biełarusi nie moža lehalizavacca va Ukrainie.

Pryčynaj staŭ novy zakon, jaki mieŭsia palehčyć lehalizacyju zamiežnych vajskoŭcaŭ va Ukrainie, kab jany nie akazvalisia ŭ pravavoj jamie i nie hublali lehalnaha statusu navat praz paŭhoda paśla zakančeńnia kantrakta.

Zakon № 4730‑IX pačaŭ dziejničać 10 maja 2026 hoda. Pavodle jaho, usie vajskoŭcy, jakija pačali słužyć va Ukrainie raniej za hetuju datu i jašče nie atrymali dazvołu na žycharstva, abaviazanyja padać dakumienty ŭ mihracyjnuju słužbu da 10 listapada. U vyniku jany mohuć atrymać dazvoł na žycharstva.

Adnak dla Emilija Łabiejki hety zakon adyhraŭ advarotnuju rolu. Jon nie moža padać nieabchodny pakiet dakumientaŭ — u jaho niama pašparta. Biełaruski pašpart Łabiejki zhareŭ pry abstrele Kramatorska ŭ mai 2023 hoda, raskazvaŭ jon raniej Svabodzie.

Zrabić novy pašpart jon nie moža, bo ŭ tym ža hodzie Łukašenka zabaraniŭ afarmlać novyja pašparty praz ambasady za miažoj. Jechać u Biełaruś pa novyja dakumienty Emiliju niebiaśpiečna — u Biełarusi jamu pahražaje turma za toje, što jon vajuje za inšuju dziaržavu. Jon znachodzicca ŭ vyšuku ŭ Rasii. A na časova akupavanaj terytoryi Danieckaj vobłaści, u tak zvanaj «DNR», jamu vynieśli prysud.

Raniej dla lehalnaha znachodžańnia Emilija va Ukrainie było dastatkova taho, što jon maje vajskovy bilet. Jahonaje kiraŭnictva bačyła jahony dziejny pašpart, kali prymała jaho na słužbu. 10 listapada lehalny status biełarusa moža skončycca. Choć ciapierašni kantrakt pavinien dziejničać da leta 2028 hoda.

Bolš za hod Łabiejka słužyć u 21‑m pałku bieśpiłotnych sistem Kraken, jaki ŭvachodzić u treci armiejski korpus Suchaputnych vojskaŭ Uzbrojenych sił Ukrainy (nie błytać sa śpiecpadraździaleńniem Kraken u składzie Hałoŭnaha ŭpraŭleńnia raźviedki Ukrainy). Łabiejka kaža, što ŭładkoŭvaŭsia tudy ŭžo na padstavie ksierakopii pašparta. Da 2025 hoda Emilij słužyŭ u składzie Mižnarodnaha lehijona pry Hałoŭnym upraŭleńni raźviedki Ukrainy. Jon dadaje, što niefarmalna tady ličyŭsia ŭ pałku Kalinoŭskaha.

«Ja ŭsio ž taki słužyŭ u lehijonie. Ale z tymi biełarusami, ź jakimi ja słužyŭ, my nazyvali siabie «połk Kalinoŭskaha»», — adznačaje jon.

Jak raskazaŭ Emilij Łabiejka Svabodzie, faktyčna na vyrašeńnie pytańnia jahonaj lehalizacyi jon mieŭ paŭhoda — pačynajučy z 10 maja. Zastałosia try tydni. Pavodle jahonych słoŭ, ciapierašniaje kiraŭnictva zaniałosia hetaj prablemaj tydzień tamu i pačało źbirać jahonyja dakumienty, kab padać ich u Dziaržaŭnuju mihracyjnuju słužbu (DMS).

«Što budzie dalej, kali ja nie zmahu padać zajavu? Ciapier, nakolki ja sam razumieju, nijakaj pracedury, pavodle jakoj ja zmahu padać dakumienty, prosta nie isnuje. Niezrazumieła, što jany buduć rabić dalej», — kamientuje Łabiejka.

Dobraachvotnik spadziajecca, što jaho nie buduć zatrymlivać i prymusova departavać, tym bolš u Biełaruś, dzie jaho čakaje turma. Ale dapuskaje varyjant, što jon budzie abaviazany sam sabrać rečy paśla 10 listapada i na praciahu niekalkich dzion vyjechać z krainy.

«Dumaju, u Biełaruś mianie nichto nie budzie adpraŭlać… Tym bolš ja vielmi daśviedčany bajec. Adpraŭlać mianie tudy, dzie buduć tolki ciešycca z taho, što Ukraina zrabiła… Tamu ja dumaju, što ŭsio ž taki mnie daduć peŭny termin, i ja pavinien budu prosta vyjechać adsiul», — kamientuje Łabiejka.

Jon miarkuje, što kali zamiežniki daviedajucca, što dziejnaha zamiežnaha dobraachvotnika mohuć prymusić vyjechać z krainy praz adsutnaść dakumientaŭ, jany pierastanuć ustupać u šerahi Uzbrojenych sił Ukrainy.

«Ja skieptyčna staŭlusia da taho, što jany tak zrobiać (prymusić Łabiejku vyjechać z Ukrainy. — RS), ale nie vyklučaju hetaha. Heta budzie ciažki ŭdar u cełym pa imidžy krainy. Ja publičny čałaviek, pra svaje prablemy zaŭsiody raskazvaju», — kamientuje Emilij.

U žniŭni Łabiejka źviartaŭsia ŭ Časovuju śledčuju kamisiju Viarchoŭnaj Rady Ukrainy, jakaja zajmajecca pravami čałavieka, kab jana dapamahła vyrašyć jahonuju prablemu z dakumientami. Jon kaža, što paśla hetaha zvarotu jamu pačali prychodzić adkazy ad roznych słužbaŭ, u tym liku ad Słužby biaśpieki Ukrainy, Antykarupcyjnaha biuro, prakuratury i palicyi (kopii niekatorych adkazaŭ jość u redakcyi Svabody).

Pa sutnaści, u ich havorycca, što nielha zrabić vyklučeńnie dla situacyi Łabiejki i aformić jamu dakumienty biez pašparta abo što orhan nie znajšoŭ parušeńniaŭ pry raniejšym razhladzie situacyi biełaruskaha dobraachvotnika.

«Ja ciapier znachodžusia ŭ niejkaj pravavoj dzircy, kali ničoha nie mahu zrabić», — adznačaje dobraachvotnik.

Emilij kaža, što kali ŭrešcie budzie vymušany vyjechać z Ukrainy, to pajedzie ŭ Polšču, bo tam, na jaho dumku, najlepš vyrašajuć takija prablemy z dakumientami, jak u jahonym vypadku. Emilij dapuskaje, što tady zmoža viarnucca da prahramavańnia. U Biełarusi jon raniej nie skončyŭ navučańnie pa adpaviednym kirunku.

Emiliju Łabiejku 26 hadoŭ. Jon pajechaŭ vajavać va Ukrainu va ŭzroście 21 hoda. Pachodzić z Babrujska, uziaŭ sabie pazyŭny «Bobr». Udzielničaŭ u pratestach 2020 hoda ŭ Babrujsku i Minsku. Kinuŭ zavočnuju vučobu ŭ Biełaruskim dziaržaŭnym univiersitecie infarmatyki i radyjoelektroniki. U lipieni 2021 hoda vyjechaŭ ź Biełarusi ŭ Polšču, pracavaŭ u McDonald's. Adznačaje, što baćki nie padtrymali jahony vybar — ni źjechać ź Biełarusi, ni pajści vajavać. Ciapier chłopiec ź imi nie kantaktuje. U Biełarusi ŭ jaho taksama zastalisia byłaja žonka i dvoje dziaciej. Ź imi jon taksama nie padtrymlivaje suviazi.

• 0
• 1
• 0
• 1
• 0
• 3
• 0
• 0