Novym ułaśnikam hulniavoj studyi «Lesta», jakaja vydaje ŭ Rasii prajekty «Śviet tankaŭ» i «Śviet karabloŭ», stała kampanija AT «Pramysłovyja zbudavańni».
Havorka idzie pra kansorcyum pryvatnych inviestaraŭ, jakija majuć namier raźvivać hulniavuju industryju ŭ Rasii. Pra heta piša RBK sa spasyłkaj na pres-słužbu «Lesty».
Miesiac tamu Forbes paviedamlaŭ, što kampaniju moža nabyć były piłot «Formuły-1» i biznesmien Mikita Maziepin. U «Lesty» zachavaŭsia ofis u Biełarusi. U vyniku jašče adnym złučalnym źvianom pamiž hulniavoj studyjaj i Minskam mahła stać siamja Maziepinych: baćka Mikity — miljarder, asnoŭny akcyjanier «Urałchima» i były saŭładalnik «Urałkalija» Dźmitryj Maziepin, jaki naradziŭsia ŭ Biełarusi, piša Office Life.
Adnak u vyniku pakupnikom stała AT «Pramysłovyja zbudavańni», zarehistravanaje ŭ Maskvie dva hady tamu. Infarmacyja pra zasnavalnikaŭ kampanii schavanaja, ale z 15 kastryčnika jaje hienieralnym dyrektaram staŭ finansist Zachar Kisły. Zhodna z dakumientami, u kampanii adzin supracoŭnik, a čystyja straty za 2025 hod skłali sumu statutnaha kapitału — 15 tys. rasijskich rubloŭ.
Pradstaŭniki novaha ŭłaśnika ŭžo zajavili, što vierać u stratehiju i kiraŭničuju kamandu kampanii «Lesta Ihry», padtrymlivajuć jak ciapierašnija padychody da raźvićcia isnujučych hulniaŭ, tak i płany pa zapusku novych prajektaŭ. Takim čynam, kiraŭničaja kamanda studyi «Lesta Ihry» i stratehija jaje raźvićcia zastanucca niaźmiennymi.
Pry hetym novy ŭłaśnik płanuje inviestavać nie tolki ŭ raspracoŭki kampanii «Lesta Ihry», ale i ŭ źniešnija prajekty:
«U bližejšyja try hady my raźličvajem ukłaści ŭ raźvićcio hulniavoj industryi da 10 młrd rasijskich rubloŭ (120 młn dalaraŭ), u tym liku praz stvareńnie vienčurnaha fondu».
Nahadajem, što namieśnik ministra finansaŭ Rasii Alaksiej Maisiejeŭ anansavaŭ prodaž «Lesty» zacikaŭlenamu inviestaru, jaki abydziecca ŭ «vielmi vialikuju sumu».
Da 2022 hoda studyja była daččynym padraździaleńniem biełaruskaj kampanii Wargaming. Paśla sychodu apošniaj z rasijskaha rynku studyja adździaliłasia.
U pačatku červienia 2025 hoda dziejnaść zasnavalnikaŭ hrupy kampanij «Lesta» ŭ Rasii pryznali ekstremisckaj. Tady, pavodle rašeńnia Tahanskaha rajonnaha suda Maskvy, aktyvy raspracoŭščykaŭ «Śvietu tankaŭ», «Śvietu karabloŭ» i Tanks Blitz pavinny byli pierajści dziaržavie. U vyniku ź leta 2025 hoda jany znachodzilisia va ŭłasnaści Rasmajomaści.
Kamientary