Новым уласнікам гульнявой студыі «Леста», якая выдае ў Расіі праекты «Свет танкаў» і «Свет караблёў», стала кампанія АТ «Прамысловыя збудаванні».
Гаворка ідзе пра кансорцыум прыватных інвестараў, якія маюць намер развіваць гульнявую індустрыю ў Расіі. Пра гэта піша РБК са спасылкай на прэс-службу «Лесты».
Месяц таму Forbes паведамляў, што кампанію можа набыць былы пілот «Формулы-1» і бізнэсмен Мікіта Мазепін. У «Лесты» захаваўся офіс у Беларусі. У выніку яшчэ адным злучальным звяном паміж гульнявой студыяй і Мінскам магла стаць сям’я Мазепіных: бацька Мікіты — мільярдэр, асноўны акцыянер «Уралхіма» і былы саўладальнік «Уралкалія» Дзмітрый Мазепін, які нарадзіўся ў Беларусі, піша Office Life.
Аднак у выніку пакупніком стала АТ «Прамысловыя збудаванні», зарэгістраванае ў Маскве два гады таму. Інфармацыя пра заснавальнікаў кампаніі схаваная, але з 15 кастрычніка яе генеральным дырэктарам стаў фінансіст Захар Кіслы. Згодна з дакументамі, у кампаніі адзін супрацоўнік, а чыстыя страты за 2025 год склалі суму статутнага капіталу — 15 тыс. расійскіх рублёў.
Прадстаўнікі новага ўласніка ўжо заявілі, што вераць у стратэгію і кіраўнічую каманду кампаніі «Леста Ігры», падтрымліваюць як цяперашнія падыходы да развіцця існуючых гульняў, так і планы па запуску новых праектаў. Такім чынам, кіраўнічая каманда студыі «Леста Ігры» і стратэгія яе развіцця застануцца нязменнымі.
Пры гэтым новы ўласнік плануе інвеставаць не толькі ў распрацоўкі кампаніі «Леста Ігры», але і ў знешнія праекты:
«У бліжэйшыя тры гады мы разлічваем укласці ў развіццё гульнявой індустрыі да 10 млрд расійскіх рублёў (120 млн даляраў), у тым ліку праз стварэнне венчурнага фонду».
Нагадаем, што намеснік міністра фінансаў Расіі Аляксей Маісееў анансаваў продаж «Лесты» зацікаўленаму інвестару, які абыдзецца ў «вельмі вялікую суму».
Да 2022 года студыя была даччыным падраздзяленнем беларускай кампаніі Wargaming. Пасля сыходу апошняй з расійскага рынку студыя аддзялілася.
У пачатку чэрвеня 2025 года дзейнасць заснавальнікаў групы кампаній «Леста» ў Расіі прызналі экстрэмісцкай. Тады, паводле рашэння Таганскага раённага суда Масквы, актывы распрацоўшчыкаў «Свету танкаў», «Свету караблёў» і Tanks Blitz павінны былі перайсці дзяржаве. У выніку з лета 2025 года яны знаходзіліся ва ўласнасці Расмаёмасці.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2626
Каментары