Salisty Biełaruskaj opiery prajšli ŭ rasijskaje šou śpievaŭ — ale žury znajšło prorvu pamiž ich hałasami
Taras Prysiažniuk z Daniecka ŭžo šeść hadoŭ śpiavaje ŭ opierach Vialikaha teatra Biełarusi. Razam z žonkaj Martaj Danusievič, taksama salistkaj Vialikaha, jon prabiŭsia ŭ rasijskaje muzyčnaje šou «Nu-ka, vsie vmiestie!» — na adbory śpiavali pa-biełarusku.
35‑hadovy Taras Prysiažniuk naradziŭsia ŭ Daniecku, ale ŭžo šmat hadoŭ buduje karjeru daloka ad rodnaha horada. U 2016‑m ukrainiec prabiŭsia ŭ artysty Moładzievaj opiernaj prahramy Vialikaha teatra Rasii, a ŭ 2019‑m paŭdzielničaŭ u «Novaj chvali». U lutym 2020‑ha Prysiažniuk vystupiŭ na scenie miłanskaha teatra «Ła Skała», a ŭ tym ža hodzie staŭ salistam Vialikaha teatra ŭ Minsku, dzie i śpiavaje dahetul.
Jaho žonka — Marta Danusievič, taksama salistka Vialikaha teatra ŭ Minsku. Paznajomilisia jany, adnak, u Maskvie, dzie razam vučylisia opiery. Ciapier jany i pracujuć razam, i vychoŭvajuć syna Mikałaja.
Razam jany pajechali i na šou «Nu-ka, vsie vmiestie»!, jakoje zdymaje kanał «Rośsija-1». Taras i Marta vyrašyli prabivacca na prajekt praz kastynh u Samary — vypusk šou pra toj adbor źjaviŭsia 7 žniŭnia. Tam biełaruskaja para vystupiła ź pieśniaj «Ja lublu hladzieć u vočy tvaje» sa stužki 1960 hoda «Viasiennija navalnicy», źniataj na «Biełaruśfilmie». Dadatkova jany praśpiavali duet Alfreda i Vijalety z «Travijaty» — i atrymali kvitok u asnoŭnuju častku šou.
11 vieraśnia vyjšaŭ pieršy vypusk šou z asnoŭnaj prahramy. U im Taras i Marta pazmahalisia za vychad u paŭfinały sa śpievakami z roznych rehijonaŭ Rasii i z vystupoŭcam z Tadžykistana.
Biełaruskaja para praśpiavała pieśniu You Are My Miracle. Kab prajści ŭ nastupny etap, im treba było zaniać pieršaje ci druhoje miesca z vaśmi — stolki vystupoŭcaŭ było ŭ pieršym vypusku, a dla hetaha nieabchodna nabrać jak maha bolš hałasoŭ ad sta ekśpiertaŭ šou.
Taras i Marta ŭ vyniku atrymali 92 hałasy — dobry vynik, ale tolki čaćviortaje miesca ŭ zaliku, i dla paŭfinału hetaha nie chapiła. Na dumku niekatorych sudździaŭ, duet u muža i žonka nie zładziŭsia, i pamiž hałasami ŭ ich prorva.
«Naša Niva» — bastyjon biełaruščyny
PADTRYMAĆ
Kamientary