Niepataplalny były kiraŭnik Rečycy, asudžany na praciahły termin, uznačaliŭ kałhas u Jelskim rajonie
Zusim niadaŭna Vitalu Pančanku prysudzili siem hadoŭ kałonii.
Były staršynia Rečyckaha rajvykankama Vital Siamionavič Pančanka staŭ dyrektaram KSUP «Skaradnianski» ŭ Jelskim rajonie. Heta vynikaje ź infarmacyi na sajcie miascovaha rajvykankama, piša «Fłahštok».
Charakterna, što jašče ŭ pačatku 2026 hoda jon atrymaŭ surovy prysud: sud Centralnaha rajona Homiela pryznačyŭ jamu pakarańnie ŭ vyhladzie 7 hadoŭ pazbaŭleńnia voli, štrafu ŭ pamiery 700 bazavych vieličyń i zabarony zajmać kiroŭnyja pasady terminam na 5 hadoŭ.
Ciapier były staršynia starajecca nie pryciahvać da siabie ŭvahi na publicy — jaho proźvišča i fota niama na sajcie rajonnaj haziety, u aficyjnaj delehacyi Jelskaha rajona na «Dažynkach» jaho taksama nie było.
Krynica, źviazanaja z pradpryjemstvam, raskazała «Fłahštoku», što byłoha rečyckaha staršyniu Pančanku pryznačyli dyrektaram KSUP u kancy lipienia 2026 hoda.
Siarod rabotnikaŭ pradpryjemstva raspaŭsiudžana mierkavańnie, što novy kiraŭnik karystajecca pratekcyjaj Uładzimira Dvornika — byłoha staršyni Homielskaha abłvykankama, a ciapier dyrektara «Mazyrsoli».
Intares Dvornika palahaje ŭ tym, kab pryznačyć znajomaha kiraŭnika ŭ haspadarku, jakuju ŭ nastupnym hodzie płanujecca pieradać u padparadkavańnie «Mazyrsoli». Pieradača adstałych haspadarak bolš zamožnym pradpryjemstvam — raspaŭsiudžanaja praktyka časoŭ Alaksandra Łukašenki.
Prablemy z zakonam
Surjoznyja prablemy z zakonam u Pančanki ŭźnikli jašče ŭ 2022 hodzie. Jaho zatrymlivali i ŭtrymlivali ŭ SIZA pa spravie ab falsifikacyi statystyki padziažu žyvioły ŭ Rečyckim rajonie.
Paśla hetaha jon straciŭ vysokuju pasadu staršyni rajvykankama, ale nieŭzabavie paśla vychadu ź SIZA atrymaŭ pasadu namieśnika načalnika adździeła ideałohii RUTT «Biełarusnafty». Pra takuju pasadu mnohija dziaržsłužačyja mohuć tolki maryć — adkaznaść minimalnaja, zarobak hodny.
Paźniej suprać jaho raspačali novuju kryminalnuju spravu. Pavodle źviestak «Fłahštoka», u 2025 hodzie Pančanku znoŭ uziali pad vartu i źmiaścili ŭ SIZA-3 Homiela.
Da hetaha pryviali ŭ tym liku sproby byłoha čynoŭnika aformić fiktyŭnuju invalidnaść na padstavie chraničnaha zachvorvańnia, kab źmiakčyć budučy prysud.
Dla hetaha jon zadziejničaŭ svaje suviazi. Tak, były hałoŭny doktar Rečyckaj CRB Alaksandr Puziankoŭ asabista vadziŭ Pančanku pa kabinietach i dapamahaŭ rychtavać dakumienty dla afarmleńnia fiktyŭnaj invalidnaści.
Vyśvietliłasia pikantnaja padrabiaznaść: Pančanka i Puziankoŭ — kumy.
Akramia taho, Pančanka, vykarystoŭvajučy svaje suviazi ŭ pravaachoŭnaj sistemie, sprabavaŭ akazvać cisk na śviedak pa spravie. Nie abyšłosia bieź siamiejnych suviaziaŭ Puziankovych i tut. Akazałasia, što žonka Alaksandra Puziankova znachodzicca ŭ svajactvie z byłym prakuroram Homielskaj vobłaści Viktaram Marozavym, śćviardžaje vydańnie.
U lutym 2026 hoda Pančanku prysudzili da siami hadoŭ pazbaŭleńnia voli. «Homielskaja praŭda» pa vynikach suda pryvodziła vytrymki z sudovaha rašeńnia:
«Ustanoŭlena, što staršynia rajvykankama (zaŭvaha «Fłahštoka»: Vital Pančanka) nios piersanalnuju adkaznaść za zabieśpiačeńnie efiektyŭnaj dziejnaści stratnych sielskahaspadarčych arhanizacyj, pavieličeńnie (niezabieśpiačeńnie skaračeńnia) nievytvorčaha vybyćcia, u tym liku padziažu bujnoj rahataj žyvioły ŭ sielskahaspadarčych arhanizacyjach.
U parušeńnie pryniatych im piśmovych abaviazacielstvaŭ pa vykanańni abmiežavańniaŭ, ustanoŭlenych Zakonam Respubliki Biełaruś «Ab baraćbie z karupcyjaj», jon ź listapada 2012 hoda pa kastryčnik 2022 hoda [zaŭvaha «Fłahštoka»: na praciahu ŭsiaho pieryjadu pracy kiraŭnikom rajona] davaŭ zaviedama niezakonnyja ŭkazańni kiraŭnikam i śpiecyjalistam arhanizacyj APK i pradpryjemstvaŭ rajona, a taksama svajmu namieśniku — načalniku ŭpraŭleńnia sielskaj haspadarki i charčavańnia, na skažeńnie danych dziaržaŭnaj statystyčnaj spravazdačnaści pa formie 12‑sh (žyviołahadoŭla) z metaj utojvańnia padziažu žyvioły».
Vydańnie taksama paviedamlała, što dziejańni Pančanki pryviali da kryminalnaha pieraśledu jak minimum 20 rabotnikaŭ.
Vitalu Siamionaviču Pančanku pryznačyli siem hadoŭ pazbaŭleńnia voli, štraf u pamiery 700 bazavych vieličyń i zabaronu zajmać kiroŭnyja pasady na piać hadoŭ.
A što, tak možna było?
Ci mahčyma ŭ Biełarusi, majučy vialiki termin źniavoleńnia, bujny štraf i pramuju zabaronu zajmać kiroŭnyja pasady, atrymać poŭnaje pamiłavańnie? Mahčyma. Pavodle rašeńnia Alaksandra Łukašenki čynoŭnik moža być vyzvaleny ad pakarańnia i źviazanych z prysudam abmiežavańniaŭ — i zastacca ŭ sistemie.
Umovy — zachoŭvać viernaść Łukašenku i pačać usio spačatku. U hetym vypadku — z pasady dyrektara sielhaspradpryjemstva.
Charakterna, što Pančanka ŭpieršyniu staŭ kiraŭnikom sielskahaspadarčaj arhanizacyi jašče 26 hadoŭ tamu — z 1998 hoda jon uznačalvaŭ rečycki kałhas «Čyrvony ściah».
Ciapier čytajuć
Były palitviazień znajšoŭ u Vilni padpracoŭku ŭ čacie — i trapiŭ pad kryminałku za pravakacyi suprać Ukrainy15
Kamientary
biez iźmienienij, raschodimsia ...