Pryncesa zrazumieła, što jaje abrabavali, kali ŭbačyła svoj zaručalny piarścionak na vokładcy katałoha aŭkcyjonu

81‑hadovaja Firyjał Iršaid — byłaja žonka iardanskaha prynca Muchamada bin Tałała, małodšaha brata karala Chusejna. Jany ažanilisia ŭ 1964 hodzie, ale praz 14 hadoŭ ich šlub raspaŭsia. Žančyna šmat hadoŭ kalekcyjanuje juvielirnyja vyraby i ličyć ich nie tolki zachapleńniem, ale i ŭdałym układańniem hrošaj.

Jak piša The Independent, u listapadzie 2020 hoda pryncesie patelefanavaŭ jaje siabar Pjer Žane, źviazany ź viadomaj juvielirnaj kampanijaj JAR. Jon zadaŭ niečakanaje pytańnie: ci nie vyrašyła jana raspradać svaje ŭpryhažeńni?

«Ja adkazała: «Nie. Pra što ty havoryš?» Tady jon skazaŭ, što moj zaručalny piarścionak źmieščany na vokładcy katałoha aŭkcyjonnaha doma», — cytuje vydańnie słovy pryncesy ŭ sudzie.

Pavodle Firyjał, piarścionak byŭ zrobleny śpiecyjalna da jaje zaručyn, druhoha takoha ŭ śviecie nie isnuje, tamu pamylicca było niemahčyma.

U sudzie Iršaid pryznałasia, što ŭ svaim domie ŭ łondanskim rajonie Biełhravija zachoŭvała kaštoŭnaści davoli adkryta. Upryhažeńni lažali ŭ šafach, časta niezamknionych, a tyja, jakija jana nasiła na praciahu tydnia, mahli zastavacca prosta na stale.

«Ja ničoha nie chavała. Luby moh uziać toje, što chacieŭ, kali mieŭ taki namier», — skazała pryncesa.

U sakaviku 2020 hoda, na samym pačatku pandemii karanavirusa, žančynie patelefanavaŭ syn i paviedamiŭ, što ŭ jaje jość usiaho try hadziny, kab paśpieć na apošni samalot u Iardaniju da zakryćcia aeraporta. Pryncesa terminova źjechała, bo nie chacieła zastavacca ŭ Vialikabrytanii bieź siamji. Dahladać asabniak zastałasia tolki chatniaja rabotnica Maryja Virchielina Taborda Enaa, jakaja pracavała ŭ jaje ŭžo 11 hadoŭ. U adroźnieńnie ad achoŭnikaŭ, jakim dazvalałasia znachodzicca tolki zvonku, jana mahła svabodna pieramiaščacca pa domie.

Praź niekatory čas rabotnica paprasiła dazvolić svajoj siastry taksama tam pasialicca. Firyjał pahadziłasia, a paśla navat pryznačyła joj zarpłatu. Pavodle pryncesy, prośba zdałasia joj dziŭnaj, ale asablivych padazreńniaŭ nie vyklikała.

Kaštoŭnaści na aŭkcyjonie

Pakul pryncesa znachodziłasia ŭ Iardanii, na aŭkcyjonach u brytanskim Kienterbiery pačali źjaŭlacca juvielirnyja vyraby ź jaje kalekcyi. U sakaviku, mai i žniŭni 2020 hoda častku ŭpryhažeńniaŭ pradali, ale ich haspadynia pra heta ničoha nie viedała.

Usio źmianiŭ telefonny zvanok Pjera Žane. Paśla razmovy z daŭnim siabram pryncesa pačała raźbiracca, što zdaryłasia ź jaje kalekcyjaj. Jana atrymała katałohi papiarednich aŭkcyjonaŭ i sa ździŭleńniem znajšła tam inšyja svaje kaštoŭnaści.

Adnak viarnuć ich było niaprosta. Pavodle Firyjał, kali jana źviazałasia z kiraŭnikom aŭkcyjonnaha doma i paviedamiła pra kradziež, toj pastaviŭsia da jaje słoŭ ź niedavieram.

Kab dakazać prava ŭłasnaści, joj daviałosia źbirać dakumienty, jakija zachavalisia ŭ Iardanii: rachunki za pakupki, staryja katałohi i fatahrafii. Na adnym zdymku jana była ŭ zavušnicach, jakija paźniej apynulisia siarod skradzienych rečaŭ. Na inšym byŭ bačny branzalet u jaje domie.

Chto złodziej?

Pastupova rasśledavańnie pryviało da ludziej, jakim pryncesa davieryła svaju łondanskuju rezidencyju. Palicyja praviała pieratrus u domie chatniaj rabotnicy i znajšła jašče niekalki źnikłych pradmietaŭ, u tym liku šlubny piarścionak, paru zavušnic i karali z kaštoŭnymi kamianiami.

Pavialičyć

Śledstva miarkuje, što da prodažu kaštoŭnaściej byŭ datyčny i jaje plamieńnik Chulijan Ramires. Pavodle abvinavačańnia, jon byŭ adnym z hałoŭnych pasrednikaŭ pry pieradačy skradzienych rečaŭ na prodaž. U kastryčniku 2023 hoda, znachodziačysia na voli pad abaviazacielstvy pierad palicyjaj, mužčyna, jak miarkujecca, vylecieŭ u Kałumbiju.

Ciapier 71‑hadovuju Tabordu Enaa sudziać u Łondanie pavodle abvinavačańnia ŭ kradziažy majomaści pracadaŭcy. Žančyna svajoj viny nie pryznaje. Sudovy praces praciahvajecca.

• 0
• 0
• 1
• 5
• 3
• 0
• 1
• 0