Baćku i syna Kabarčukoŭ, asudžanych u Biełarusi za «teraryzm», źbirajucca sudzić i va Ukrainie
Ukrainskija pravaachoŭniki abviaścili ŭ vyšuk baćku i syna Siarhieja i Paŭła Kabarčukoŭ, jakich u Biełarusi asudzili da 20 hadoŭ źniavoleńnia kožnaha za nibyta teraryzm. Va Ukrainie ich padazrajuć u niezakonnaj vytvorčaści i kantrabandzie narkotykaŭ. Sud dazvoliŭ zatrymać mužčyn paśla taho, jak ich nie znajšli pa miescy žycharstva, kab prymusova dastavić na sudovaje pasiadžeńnie, piša «Radyjo Svaboda».
U Biełarusi Siarhieja i Paŭła Kabarčukoŭ zatrymali 15 lutaha 2024 hoda ŭ Lelčyckim rajonie padčas tak zvanaj kontrterarystyčnaj apieracyi. Tady KDB zajaviŭ pra zatrymańnie «terarystaŭ», a dziaržaŭnyja ŚMI apublikavali videa, na jakim Pavieł vyhladaŭ źbitym. U śledčy izalatar KDB mužčyn dastavili na viertalocie.
Paźniej ukraincaŭ asudzili pavodle čatyroch artykułaŭ Kryminalnaha kodeksa jak nibyta «dyviersantaŭ SBU». Ich źniavoleńnie pavinna skončycca ŭ 2043 hodzie. U 63‑hadovaha Siarhieja Kabarčuka ŭ śledčym izalatary vyjavili ankałahičnaje zachvorvańnie. Jon adbyvaje pakarańnie ŭ škłoŭskaj kałonii № 17, a jahony syn Pavieł — u mahiloŭskaj turmie № 4.
Pavodle krynicy «Radyjo Svaboda», baćka i syn niezakonna pierasiekli ŭkrainska-biełaruskuju miažu, sprabujučy ŭciačy ad kryminalnaha pieraśledu va Ukrainie. Pavodle artykułaŭ, jakija im inkryminujuć, im pahražaje da 12 hadoŭ pazbaŭleńnia voli z kanfiskacyjaj majomaści.
Kryminalnuju spravu suprać Kabarčukoŭ zaviali 27 śniežnia 2022 hoda, a jaje razhlad pryznačyli na 21 lutaha 2024-ha. Pakolki mužčyny nie źjavilisia ŭ sud, było pryniata rašeńnie ab ich prymusovym pryvodzie, adnak sudovyja vykanaŭcy nie znajšli ich pa miescy žycharstva.
Paźniej žonka i maci Siarhieja i Paŭła paznała ich na videazapisie KDB, jaki raspaŭsiudzili, u tym liku, u telehram-kanale «Biełaruski Hajun». Na padstavie jaje zajavy 17 lutaha mužčyn pryznali źnikłymi. Da taho času jany ŭžo dva dni znachodzilisia ŭ śledčym izalatary KDB Biełarusi. Pravaabaroncy pryznali Kabarčukoŭ palityčnymi źniavolenymi.
Va Ukrainie baćku i syna zatrymali 27 śniežnia 2022 hoda ŭ lasnym masivie kala vioski Sielazoŭka Koraścienskaha rajona Žytomirskaj vobłaści, niepadalok ad biełaruskaj miažy. Pamiežniki vyjavili ich razam ź inšymi ludźmi kala aŭtamabila. U mašynie znachodzilisia dźvie sumki i zaplečnik z 68 pakunkami rečyva, padobnaha da narkotykaŭ. Ekśpiertyza paćvierdziła, što heta narkatyčnyja rečyvy. Ahulnaja vaha ŭ pieraliku na suchoje rečyva składała 44,6 kiłahrama. Pavodle materyjałaŭ śledstva, zatrymanyja sprabavali pierapravić hruz u Biełaruś.
U pačatku lutaha 2023 hoda śledčyja, vyvučyŭšy telefonnyja razmovy, vyjavili inšych padazravanych, ustanavili suviazi pamiž imi i vyznačyli maršruty ich pieramiaščeńnia ŭ pamiežnaj zonie.
U žniŭni 2023 hoda sud pryznaŭ abhruntavanym abvinavačańnie i pačaŭ razhladać spravu pa sutnaści. Padazravanyja pryznali vinu tolki častkova, ale ŭ jakim abjomie — nieviadoma. Miarkujecca, što da listapada 2023 hoda Kabarčuki znachodzilisia pad vartaj, paśla čaho ich vyzvalili pad finansavy zakład. Urešcie baćka i syn uciakli.
Kabarčuki žyvuć u miastečku Staraja Vyžaŭka Kovielskaha rajona Vałynskaj vobłaści. U lipieni 2026 hoda ŭkrainski sud dazvoliŭ zatrymać ich dla prymusovaha pryvodu na pasiadžeńnie, dzie pavinny paŭtorna razhledzieć pytańnie ab uziaćci mužčyn pad vartu.
Kantrabandystam Kabarčukam prysudzili pa 20 hadoŭ źniavoleńnia
Čamu aficyjnaja viersija zatrymańnia «dyviersantaŭ SBU» vyhladaje niepraŭdziva. Važnyja padrabiaznaści
Na TB pakazali dopyt «dyviersantaŭ» i namiaknuli, što ich metaj była pravakacyja ŭ Rasii
KDB nazvaŭ imiony zatrymanych na miažy z Ukrainaj
Aryštavali pradstaŭnikoŭ kampanii Bayer u Biełarusi15
Kamientary